រាជធានីភ្នំពេញ ៖ សេចក្តីរាយការណ៍បឋមឱ្យដឹងថា បុគ្គលិកមីក្រូហិរញ្ញវត្ថុម្នាក់ បានជិះម៉ូតូទៅបុកពីក្រោយរថយន្តម៉ាកទីកូចតនៅចិញ្ចើមលើស្ពានជ្រោយចង្វារយ៉ាងពេញទំហឹង បណ្តាលឱ្យរងរបួសបាក់ភ្លៅម្ខាង ដែលហេតុការណ៍នេះកើតឡើងកាលពីវេលាម៉ោង០៨ និង១៥នាទីព្រឹកថ្ងៃទី២៩ កក្កដា ២០១៦ ស្ថិតលើស្ពានជ្រោយចង្វារថ្មីខាងកើត ក្នុងសង្កាត់ជ្រោយចង្វារ ខណ្ឌជ្រោយចង្វារ ហើយគេបញ្ជូនទៅសង្គ្រោះភ្លាមៗ ។
ប្រភពឱ្យដឹងថា ជនរងគ្រោះឈ្មោះណុប គឹមសាន្ត អាយុ២៣ឆ្នាំ ជាបុគ្គលិកមីក្រូហិរញ្ញវត្ថុប្រាក់សាក់ មានទីលំនៅក្នុងសង្កាត់ទឹកថ្លា ជិះម៉ូតូហុងដាឌ្រីម C125 ពាក់ស្លាកលេខភ្នំពេញ 1CN-9183 ។ ចំណែកខាងរថយន្តទីកូមានពាក់ស្លាកលេខភ្នំពេញ 2L-8230 ដែលមានម្ចាស់រថយន្តត្រូវគេដឹងថា ជាអ្នកចម្រៀងតាមភោជនីដ្ឋាន ។
ប្រភពពីម្ចាស់រថយន្តទីកូឱ្យដឹងថា គាត់ទើបតែចេញពីភោជនីយដ្ឋាន ធ្វើដំណើរទៅច្រៀងនៅហាងមួយទៀត ស្រាប់តែមកដល់ចំណុចកើតហេតុរថយន្តរបស់គាត់ខូច ក៏ចតទុកទៅរកជាងឱ្យជួសជុល ។ ស្រាប់តែម៉ូតូខាងលើ ជិះមកបុកយ៉ាងពេញទំហឹងបណ្តាលឱ្យរងរបួសខ្លួនឯងតែម្តង ។
ចែករំលែកព័តមាននេះ