រាជធានីភ្នំពេញ ៖ ពិតជាសាហា.វខ្លាំងណាស់ដែលជនសង្ស័យមួយក្រុមហ៊ានធ្វើសកម្មភាពនៅមុខមន្ត្រីសមត្ថកិច្ចអាវុធហត្ថពោធិ៍សែនជ័យ ដោយបា.ញ់គំរាម២គ្រាប់ប្លន់យកម៉ូតូ១គ្រឿងទៅបាត់ដោយសុវត្ថិភាព ។
រាជធានីភ្នំពេញ ៖ ពិតជាសាហាវខ្លាំងណាស់ដែលជនសង្ស័យមួយក្រុមហ៊ានធ្វើសកម្មភាពនៅមុខមន្ត្រីសមត្ថកិច្ចអាវុធហត្ថពោធិ៍សែនជ័យ ដោយបាញ់គំរាម២គ្រាប់ប្លន់យកម៉ូតូ១គ្រឿងទៅបាត់ដោយសុវត្ថិភាព ។ ហេតុការណ៍នេះកើតឡើងកាលពីវេលាម៉ោង១១ និង៣០នាទីយប់ ថ្ងៃទី២៨ ខែកក្កដា ឆ្នាំ២០១៦ នៅមុខ វ៉ាវ ឌីស្កូ ក្លិប ស្ថិតនៅតាមបណ្តោយផ្លូវជាតិ៣ ភូមិព្រៃព្រីងត្បូង សង្កាត់ចោមចៅ ខណ្ឌពោធិសែនជ័យ ។
ជនរងគ្រោះជាម្ចាស់ម៉ូតូមានឈ្មោះ ម៉ែន ពិសិទ្ធ ភេទប្រុស អាយុ២៣ឆ្នាំ ស្នាក់នៅបុរីសន្តិភាព២ សង្កាត់ចោមចៅ ខណ្ឌពោធិសែនជ័យ មានស្រុកកំណើតភូមិត្រពាំងសង្កែ ឃុំជ្រៃលាស់ ស្រុកពញាឮ ខេត្តកណ្តាល ។ ចំណែកម៉ូតូដែលត្រូវចោរប្លន់ម៉ាក MSX ពណ៌ស មិនចាំស្លាកលេខ ។
ប្រភពពីជនរងគ្រោះបានប្រាប់ឲ្យដឹងថា មុនពេលកើតហេតុពួកគេមានគ្នា៣នាក់ ស្រី២នាក់ និងប្រុសម្នាក់ ជិះម៉ូតូម៉ាក MSX មួយគ្រឿង បានចូលទៅរាំលេងកំសាន្តនៅក្នុង វ៉ាវ ឌីស្កូ ក្លឹប លុះមកដល់ម៉ោងកើតហេតុ ពួកគេបានចេញមកវិញបំណងត្រលប់ទៅផ្ទះ តែមិត្តស្រីរបស់គេ២នាក់ទៀតឡើងជិះរ៉ឺម៉កម៉ូតូទៅផ្ទះមុន ចំណែករូបគេបានជិះម៉ូតូចេញមកដល់មុខក្លឹបស្រាប់តែមានជនសង្ស័យ៣នាក់ជិះម៉ូតូម៉ាក ស្មាស់ ពណ៌ខ្មៅ មិនចាំស្លាកលេខ មកស្ទាក់ពីមុខរួចដកកាំភ្លើងខ្លីមកភ្ជង់គំរាមប្លន់យកម៉ូតូនៅមុខមន្ត្រីអាវុធហត្ថខណ្ឌពោធិ៍សែនជ័យនិងសន្តិសុខដែលយាមនៅមុខក្លឹប ស្របពេលដែលជនសង្ស័យឃើញអាវុធហត្ថនៅទីនោះក៏បានរេកាណុងកាំភ្លើងទៅរកអាវុធហត្ថ ធ្វើឲ្យអាវុធហត្ថដែលមានកាំភ្លើងដែរនោះតែមិនបានដាក់នៅជិតខ្លួនភ័យបានរត់ប្រាស់ចេញពីកាណុងកាំភ្លើង ដើម្បីទៅយកកាំភ្លើង ក៏ត្រូវជនសង្ស័យបាញ់ភ្ជុចដី២គ្រាប់ ហើយប្លន់យកម៉ូតូ ទៅបាត់ដោយសុវត្ថិភាព ហើយទើបអាវុធហត្ថរត់ទៅយកកាំភ្លើងបានបាញ់៣គ្រាប់វិញ បង្កឲ្យមានការភ្ញាក់ផ្អើល ។
ក្រោយពេលកើតហេតុ កម្លាំងប៉ូលិសមូលដ្ឋានបានចុះទៅដល់កន្លែងកើតហេតុ រកជនរងគ្រោះសួរនាំ និងបាននាំជនរងគ្រោះមកដាក់ពាក្យបណ្តឹងនៅប៉ុស្តិ៍នគរបាលចោមចៅដើម្បីកំណត់មុខសញ្ញា ។ ដោយឡែកប្រជាពលរដ្ឋនៅកន្លែងកើតហេតុមានការភ័យស្លន់ស្លោដោយសារតែឃើញជនសង្ស័យហ៊ានធ្វើសកម្មភាពប្លន់នៅមុខមន្ត្រីអាវុធហត្ថ ហើយបាញ់គំរាមកម្លាំងអាវុធហត្ថទៀតបែបនេះ ៕
ចែករំលែកព័តមាននេះ