ទ្រព្យសម្បត្តិពាក់ព័ន្ធនឹង បទល្មើសគ្រឿងញៀ.ន
រាជធានីភ្នំពេញ ៖ នាយឧត្តមសេនីយ៍ មាស វីរិទ្ធ អគ្គលេខាធិការនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀ.ន និងតំណាងក្រុមប្រឹក្សាត្រួតពិនិត្យគ្រឿងញៀ.ន នៃព្រះរាជាណាចក្រថៃ
រាជធានីភ្នំពេញ ៖ នាយឧត្តមសេនីយ៍ មាស វីរិទ្ធ អគ្គលេខាធិការនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន និងតំណាងក្រុមប្រឹក្សាត្រួតពិនិត្យគ្រឿងញៀន នៃព្រះរាជាណាចក្រថៃ បានចូលរួមផ្សព្វផ្សាយ និងចែករំលែកបទពិសោធន៍ស្តីការរឹបអូសទ្រព្យសម្បត្តិពាក់ព័ន្ធនឹងបទល្មើសគ្រឿងញៀន នៅភោជនីយដ្ឋានទន្លេបាសាក់២ កាលពីព្រឹកថ្ងៃទី២៨ ខែកក្កដា ឆ្នាំ២០១៦ ។ នៅពិធីនេះលោកនាយឧត្តមសេនីយ៍ មាស វីរិទ្ធ អគ្គលេខាធិការនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន បានមានប្រសាសន៍ថា នៅក្នុងការអនុវត្តជាក់ស្តែងកន្លងមកយើងមិនទាន់ឃើញមានការរឹបអូសនិងដាក់លក់ទ្រព្យសម្បត្តិដែលជាប់ពាក់ព័ន្ធនឹងបទល្មើសគ្រឿងញៀននៅឡើយទេ។
ដូច្នេះដើម្បីធានាប្រសិទ្ធភាពនៃការអនុវត្តច្បាប់ស្តីពីការត្រួតពិនិត្យគ្រឿងញៀន រាជរដ្ឋាភិបាលនៃព្រះរាជាណាចក្រកម្ពុជាបានចេញអនុក្រឹត្យលេខ ៣៣ អនក្រ.ប.ក ចុះថ្ងៃទី០៣ ខែមិនា ឆ្នាំ២០១៦ ស្តីពីការរៀបចំ និងការប្រព្រឹត្តទៅនៃមូលនិធិជាតិ សម្រាប់ការប្រយុទ្ធប្រឆាំងគ្រឿងញៀន។ អាជ្ញាធរជាតិប្រយុទ្ធប្រឆាំងគ្រឿងញៀន និងក្រសួងសេដ្ឋកិច្ច និងហិរញ្ញវត្ថុ បានចេញប្រកាសរួមចំនួនពីរគឺ ទី១-ប្រកាសរួមលេខ៥៧៦ សហវ.ប្រ.ក ចុះថ្ងៃទី១៦ខែឧសភាឆ្នាំ២០១៦ ស្តីពីការតាមដាន ការប្រមូល ការគ្រប់គ្រង និងការចាត់ចែងទ្រព្យសម្បត្តិដែលពាក់ព័ន្ធនឹងបទល្មើសគ្រឿងញៀននិងទី២-ប្រកាសរួមលេខ៥៧៧សហវ.ប្រ.ក ចុះថ្ងៃទី១៦ ខែឧសភា ឆ្នាំ២០១៦ស្តីពីការគ្រប់គ្រង និងការប្រើប្រាស់ប្រាក់ចំណូលដែលបានមកពីការបង្ក្រាបបទល្មើសគ្រឿងញៀន។
ក្នុងចំណោមបណ្តាប្រទេសអាស៊ាន ព្រះរាជាណាចក្រថៃ ជាប្រទេសដែលមានមូលនិធិប្រយុទ្ធប្រឆាំងគ្រឿងញៀន ស្រដៀងគ្នានឹងព្រះរាជាណាចក្រកម្ពុជាផងដែរ។ លោកមានជំនឿយ៉ាងមុតមាំថា បទបង្ហាញ និងការចែករំលែកបទពិសោធន៍ នៃវិធានច្បាប់នៃប្រទេសទាំងពីរពាក់ព័ន្ធនឹងការរឹបអូសទ្រព្យសម្បត្តិ ដែលជាផលបានមកពីបទល្មើសគ្រឿងញៀនជូនដល់តំណាងក្រសួង-ស្ថាប័នពាក់ព័ន្ធ អង្គភាពអនុវត្តច្បាប់ ស្ថាប័នអយ្យការ និងតុលាការនឹងផ្តល់ជាទុនមួយបន្ថែមទៀត ដើម្បីស្វែងយល់ឲ្យបានកាន់តែស៊ីជម្រៅ នៃនីតិវិធីរឹបអូសទ្រព្យសម្បត្តិក្នុងករណីបទល្មើសគ្រឿងញៀន។ គួរំលឹកថា នៅក្នុងឆ្នាំ២០១៥បទល្មើសគ្រឿងញៀនដែលបង្ក្រាបបានមាន ៣.០៦១ករណី ជនសង្ស័យឃាត់ខ្លួនបាន ៧.០០៨នាក់។
ទ្រព្យសម្បត្តិសំខាន់ៗចាប់បានក្នុងប្រតិបត្តិការបង្ក្រាបបទល្មើសគ្រឿងញៀនដែលទៅសាលាដំបូងរាជធានី ខេត្ត រួមមាន រថយន្ត៥៨គ្រឿង,ម៉ូតូ១.៣០៧គ្រឿង,ប្រាក់កម្ពុជា២៩២.៣៩២.០០០រៀល,ប្រាក់ថៃ៦៦.២៣៩បាត,ប្រាក់វៀតណាម១២.៧៣៨.០០០ដុង,ប្រាក់អាមេរិក១៧៣.៣៥៣ដុល្លារ,ប្រាក់ឡាវ១៥៤.០០០គីប,ប្រាក់ចិន១០០០យាន់។ ក្នុងអំឡុងឆមាសទី១ឆ្នាំ២០១៦ បទល្មើសគ្រឿងញៀនដែលបង្ក្រាបបានមាន២.១៥៨ករណី ជនសង្ស័យឃាត់ខ្លួនបាន៥.២៦៦នាក់៕
ចែករំលែកព័តមាននេះ