រាជធានីភ្នំពេញ ៖ នៅយប់ថ្ងៃសុក្រ ទី២៩ កក្កដា នេះ កីឡាករកម្ពុជា២រូបគឺ ឆៃ សារ៉ា និងរឿង សោភ័ណ្ឌ នឹងឡើងសង្វៀនទូរទស្សន៍អាស៊ីអាគ្នេយ៍ប្រកួតជាមួយកីឡាករថៃ និងឡាវ នៅក្នុងព្រឹត្តិការណ៍ប្រដាល់អន្តរជាតិ K-Cement ជាថ្មីទៀតហើយដើម្បីរំលេចនូវការចាប់អារម្មណ៍ ។ គេមិនទាន់ដឹងថា រវាងកីឡាករកម្ពុជាទាំងពីរ នឹងមានវាសនាយ៉ាងដូចម្ដេចនោះទេ ដោយសារតែសមាសភាពកីឡាករបរទេសដែលពួកគេត្រូវប៉ះជាមួយក៏មិនមែនជើងថ្មី និងធ្លាប់មានប្រវត្តិស៊ីជើងខ្លាំងកម្ពុជាផងដែរ ។
ការប្រកួតដែលនឹងធ្វើឡើងចាប់ពីម៉ោង៥និង៣០នាទីល្ងាចរហូតដល់ម៉ោង៨យប់ស្អែកនេះ តាំងពីបើកដំណើរការគេកត់សម្គាល់ថា មានការទស្សនាយ៉ាងកកកុញតែម្ដង គឺមិនខុសពីការប្រកួតនៅពេលរសៀលថ្ងៃសៅរ៍ក្នុងពេលមិនទាន់ប្ដូរពេលនោះទេ ។ ការប្រដាល់នៅវេលាយប់នេះ មានការរំពឹងថា នឹងមានអ្នកទស្សនាកកកុញ បើទោះជាការប្រដាល់នៅយប់ថ្ងៃសុក្រ គឺជាព្រឹត្តិការណ៍ដែលបានប្ដូរពីថ្ងៃសៅរ៍ដែលធ្វើឱ្យអ្នកខ្លះមិនបានដឹង និងមិនមានពេលទស្សនា។ នោះគឺដោយសារតែវត្តមានរបស់កីឡាករដែលបានឡើងប្រកួតត្រូវគេកត់សម្គាល់ថា មានសមត្ថភាពខ្ពស់ ។ អ្នករៀបចំការប្រកួតបានប្រកាសពីការសម្រិតសម្រាំងកីឡាករសម្រាប់ការប្រកួតយប់នេះ ដោយវត្តមានរបស់កីឡាករកម្ពុជា និងបរទេសទាំង៤រូបហាក់ធ្វើឱ្យមានការជឿជាក់ខ្លាំងថា ពួកគេនឹងបើកឆាកប្រយុទ្ធខ្លាំងៗដាក់គ្នា ដោយសារតែចង់ឈ្នះមិនចង់ចាញ់។
កីឡាករ ឆៃ សារ៉ា ដែលជាម្ចាស់ពានក្នុងព្រឹត្តិការណ៍K-Cementកាលពីថ្ងៃសៅរ៍ ជាជើងខ្លាំងម្នាក់ប្រចាំសមាគមកីឡាប្រដាល់ក្រសួងការពារជាតិ នឹងត្រូវជួបប្រកួតជាមួយកីឡាករថៃឈ្មោះ ផា យ៉ាក់ឡេក ដែលល្បីឈ្មោះនៅក្នុងប្រទេសថៃ ។ ជំនួបប៉ះគ្នារវាងអ្នកទាំងពីរត្រូវគេរំពឹងថា នឹងបែកផ្កាភ្លើងនៅលើសង្វៀន ដោយសារតែពួកគេសុទ្ធតែត្រូវការឈ្នះដើម្បីរក្សាមុខមាត់ និងក្រេឌីត ។ ផ្អែកតាមបទពិសោធន៍អ្នកទាំងពីរមានកម្រិតចាញ់គ្នាមិនច្រើនទេ ដោយកីឡាករកម្ពុជាក៏មានប្រវត្តិប្រកួតច្រើន ហើយកីឡាករថៃក៏មានប្រវត្តិប្រកួតច្រើនដូចគ្នា ។ លោកញាណ សុធី អ្នករៀបចំការប្រកួតបានអះអាងថា លោកសម្រេចដាក់ឱ្យកីឡាករទាំងពីរប៉ះគ្នា ដោយសារតែ ឆៃ សារ៉ា ក៏ហ្វឹកហាត់បានច្រើនក្នុងការត្រៀមខ្លួន ហើយ ផា យ៉ាក់ឡេក ក៏ជាកីឡាករដែលមានស្នាដៃម្នាក់នៅលើសង្វៀនប្រទេសថៃ និងសង្វៀនទូរទស្សន៍អាស៊ីអាគ្នេយ៍ ។ គូនេះ កីឡាករកម្ពុជាធ្លាប់ប្រកួតបាន៥៨លើក ឈ្នះ៤៧លើក ចាញ់១០លើក និងស្មើ១លើក ក្នុងពេលដែលកីឡាករថៃធ្លាប់ប្រកួតបាន៦៨លើក ឈ្នះ៥៧លើក និងចាញ់១១លើក ។ កីឡាករកម្ពុជាបានប្រកាសប្រាប់ថា នឹងប្រឹងយកឈ្នះលើកីឡាករថៃឱ្យខាងតែបាន ដោយសារតែមុនផ្គូផ្គងលោកហ្វឹកហាត់ច្រើននៅលើសង្វៀនក្នុងក្លិប ។ យ៉ាងណាក៏ដោយ កីឡាករថៃក៏មានជំនឿចិត្តបែបនេះផងដែរ។
នេះបើយោងតាមការអះអាងរបស់លោកថៃ អ៊ូ ជាអ្នកដឹកនាំកីឡាករថៃឱ្យមកប្រកួត និងផ្អែកតាមថ្វីដៃដែលកីឡាករថៃធ្វើបាននាពេលកន្លងមក។ គូនេះត្រូវគេរំពឹងច្រើនថានឹងវាយអស់ពីសមត្ថភាព ដោយសារតែឆៃ សារ៉ា ថ្វីបើខានឡើងរេញក្នុងមួយរយៈចុងក្រោយ តែអ្វីដែលគេធ្វើបានគឺមិនដែលបណ្ដោយឱ្យគូប្រកួតទៅរួចដោយស្រួលនោះឡើយ។
កីឡាកររឿង សោភ័ណ្ឌ ឯណោះវិញនឹងត្រូវជួបប្រកួតជាមួយកីឡាករឡាវឈ្មោះ ចំប៉ាសាក់ នៅក្នុងព្រឹត្តិការណ៍នេះដែរ ។ អ្នកទាំងពីរប៉ះគ្នាក្នុងតំណែងគូឯកដោយកីឡាករម្ខាងៗសុទ្ធតែអួតរៀងខ្លួនថា ពួកគេនឹងប្រឹងឱ្យឈ្នះ។ ទោះបីយ៉ាងណា គេមិនទាន់ដឹងថា អ្នកណានឹងឈ្នះអ្នកណាសម្រាប់ការប្រកួតនេះនៅឡើយទេ ដោយសារកីឡាករទាំងពីរសុទ្ធតែត្រូវបានមហាជនស្គាល់ថាខ្លាំងមិនធម្មតាដូចគ្នា ។ គាប់ជួនជាការប្រកួតចុងក្រោយរបស់រឿង សោភ័ណ្ឌ ជួនក៏បានលទ្ធផលល្អ និងជួនក៏បានលទ្ធផលអវិជ្ជមាននោះផង ទើបការប្រាកដចិត្តថាកីឡាករកម្ពុជានឹងឈ្នះកីឡាករឡាវគឺមិនច្រើន។ កីឡាករឡាវ ចំប៉ា សាក់ ត្រូវបានប្រកាសថាជាជើងខ្លាំងម្នាក់នៅក្នុងប្រទេសឡាវផង និងថៃផង បើទោះជាបទពិសោធន៍របស់គេតិចជាងកីឡាករកម្ពុជា ។ រឿង សោភ័ណ្ឌ ធ្លាប់ប្រកួតបាន១៣៩លើក ឈ្នះ១២៦លើក ចាញ់១១លើក និងស្មើ១លើក ខណៈដែលកីឡាករឡាវ ក៏ឡើងរេញបាន១០១លើក ឈ្នះ៨៥លើក ចាញ់១៥លើក និងស្មើ១លើក។
លោក ញាណ សុធី បញ្ជាក់ថា គូនេះបើឱ្យលោកទាយ គឺលោកមានទំនុកចិត្តលើកីឡាករកម្ពុជា ប៉ុន្តែបើឱ្យលោកជឿជាក់មានមិនច្រើននោះទេ ដោយសារតែរឿង សោភ័ណ្ឌ ក៏ល្អ ហើយកីឡាករឡាវ ចំប៉ា សាក់ ក៏មិនណយ។ ដូច្នេះលោកបានត្រឹមតែហ៊ានអះអាងថា នឹងប្រកួតគ្នាអស់ពីសមត្ថភាពប៉ុណ្ណោះ ចំណែករឿងចាញ់ឈ្នះលោកទុកឱ្យកីឡាករទាំងពីរប្រកួតគ្នាជាក់ស្ដែងចុះ ៕
ចែករំលែកព័តមាននេះ