រាជធានីភ្នំពេញ ៖ ឡុង សុវណ្ណឌឿន មកពីក្លិបសាលវ័ន្តកីឡា នឹងឡើងសង្វៀនទូរទស្សន៍PNNប្រកួតសាជាថ្មីនៅថ្ងៃអាទិត្យទី៣១ កក្កដា បន្ទាប់ពីខកខានអស់មួយ
សប្ដាហ៍ដោយសារបាក់ក្ដោងច្រមុះកាលប្រកួតជាមួយកីឡាករថៃឈ្មោះSumaee Sor Weerawanនៅវគ្គជម្រុះជុំទី១ឈានទៅដណ្ដើមខ្សែក្រវាត់ជើងឯកគោជល់កាលពីថ្ងៃអាទិត្យទី៣ កក្កដា ។ ប្រកួតលើកនេះ ឡុង សុវណ្ណឌឿន ត្រូវជួបប្រកួតជាមួយកីឡាករថៃឈ្មោះ ឈោគ ឌី ដែលជាជើងខ្លាំងមួយរូបក្នុងពិភពប្រដាល់ថៃ ទើបគេមានមន្ទិលមិនដឹងថា ទៅរួចឬអត់ ។
ឡុង សុវណ្ណឌឿន ទោះបីមិនហ៊ានសន្យាទុកមុនពីលទ្ធផលចាញ់ឈ្នះ ប៉ុន្តែអ្នកគាំទ្ររូបគេភាគច្រើនសុទ្ធតែរំពឹងទុកមុនថា កីឡាកររូបនេះច្បាស់ជាមានសំណាងរកបាន៣ពិន្ទុបន្ថែមពីកីឡាករថៃ ជាក់ជាមិនខាន ។ បានជាគេហ៊ានអះអាងបែបនេះ ដោយសារគេជាអ្នកប្រដាល់មានបទពិសោធន៍ប្រកួតយូរឆ្នាំមកហើយ ជាពិសេសទាំងផ្លែកែង ជង្គង់ និងកណ្ដាប់ដៃពេលវាយចេញម្ដងៗបានត្រង់ល្អ និងមានទម្ងន់ធ្ងន់ទៀតផង ។ អ្នកប្រដាល់មកពីក្លិបសាលវ័ន្តកីឡារូបនេះក៏មានចិត្តចិត្តសឿងខ្លាំងណាស់ដែរ ជាក់ស្ដែងកាលពីលើកមុនទោះបីត្រូវគូប្រកួតវាយឱ្យបាក់ក្ដោងច្រមុះក៏គេមិនបោះបង់ចោលការប្រកួតដែរ ផ្ទុយទៅវិញ គេបែរជាប្រឹងប្រែងប្រកួតរហូតយកឈ្នះទាល់តែបាន ។ ចាំមើលលើកនេះគេមានសំណាងអាក្រក់ ឬល្អខណៈកីឡាករថៃត្រូវគេដឹងថាខ្លាំងមិនធម្មតាបែបនេះ។
នៅក្នុងសប្ដាហ៍នេះ ក្រៅពីគូដណ្ដើមខ្សែក្រវាត់១គូនេះទៅក៏មានគូប្រកួតជាលក្ខណៈមិត្តភាពអន្តរជាតិរវាងកីឡាករកម្ពុជានិងថៃ១គូទៀតដែរ ។ កីឡាករ ឃីម ឌីម៉ា មកពីក្លិបរស្មីភូមិគាបខេត្តបន្ទាយមានជ័យ ត្រូវប្រកួតជាមួយកីឡាករថៃឈ្មោះ ណាត់តាភុន គៀតអាវ៉ន ក្នុងប្រភេទទម្ងន់៦៣,៥គីឡូក្រាម ។ រីឯគូប្រកួតមិត្តភាពរវាងកីឡាករកម្ពុជាគ្នាឯងវិញមានកីឡាករ ធន់ មករា មកពីមជ្ឈមណ្ឌលកីឡា ខ ភ ម ប្រកួតជាមួយកីឡាករ អេ លីតភក្ដី មកពីក្លិបកងអង្គរក្ស ។ កីឡាករ លី ជិនហឺ មកពីក្លិបកងពលតូចអន្តរាគមន៍លេខ៨ភ្នំទ្រព្យ ប្រកួតជាមួយកីឡាករ ឌីន ថៃណា មកពីក្លិបសុភានូមានជ័យ និងកីឡាករ ខុន សុវណ្ណ មកពីក្លិបកងពលតូចអន្តរាគមន៍លេខ៨ភ្នំទ្រព្យ ប្រកួតជាមួយកីឡាករ សិដ្ឋ វណ្ណា មកពីក្លិបសាមគ្គីកូនខ្មែរ ៕
ចែករំលែកព័តមាននេះ