រាជធានីភ្នំពេញ ៖ កញ្ញារ៉េត រ៉ាដា ក្នុងវ័យ២៣ឆ្នាំដ៏ស្រស់សោភាបានក្លាយជាអ្នកចំរៀងតាមរយៈការប្រឡងក្នុងកម្មវិធីស្ពានតារានៃស្ថានីយទូរទស្សន៍ CTN ជាប់ចំណាត់ថ្នាក់លេខ១នាឆ្នាំ២០០៨ ហើយនៅឆ្នាំ២០០៩នាងបានថតសំលេងចូលស៊ីឌី និងសំដែងកាយវិការខារ៉ាអូខេឱ្យផលិតកម្មស្វាងតារា និងច្រៀងជាកិត្តិយសតាមកម្មវិធីប្រគំតន្ត្រីចុងសប្តាហ៍របស់ស្ថានីយទូរទស្សន៍នានាផងដែរ។ តាមរយៈទឹកដមសម្លេងពីរោះគួបផ្សំនឹងរូបសម្ផស្សស្រស់ស្អាតផងនោះនៅពេលកញ្ញារ៉ាដាឡើងច្រៀងនៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានាម្តងៗគេសង្កេតឃើញមានអ្នកទស្សនាផ្ទាល់ទះដៃសំដែងការគាំទ្រយ៉ាងច្រើនកុះករ ជាពិសេសនោះយុវវ័យតែម្តង។ ជាក់ស្តែងកាលពីថ្ងៃទី២០ ខែកុម្ភៈ ឆ្នាំ២០១១ នៅពេលនាងច្រៀងនៅលើឆាកប្រគំតន្ត្រីថ្ងៃអាទិត្យក្នុងកម្មវិធីតន្ត្រីយុវវ័យរីករាយ របស់ស្ថានីយទូរទស្សន៍អប្សរាប៉ុស្តិ៍លេខ១១ តាមរយៈបទ«មនុស្សប្រុសហេងស៊យ» និង«បទប្តីខ្ញុំទេនាង» មានការគាំទ្រពីសំណាក់ប្រិយមិត្តអ្នកទស្សនាយ៉ាងច្រើនកុះករ។
កញ្ញារ៉េត រ៉ាដា តារាថ្មីទើបរះឡើងក្នុងរយៈពេល២ឆ្នាំមកនេះទទួលជោគជ័យជាបន្តបន្ទាប់ ហើយធ្លាប់បានយុវវ័យទទួលស្គាល់តាមរយៈបទខូចខ្លួនកុំខូចចិត្ត ហើយក្នុងឆ្នាំ២០១១នេះកំពុងត្រៀមចេញបទថ្មីៗជាច្រើនទៀតដូចជាបទ ហេតុផលចំលែក បទឆូតកាតទៅលេងស្រុក ជាដើម។
កញ្ញារ៉េត រ៉ាដា និយាយថា ថ្វីបើសព្វថ្ងៃនាងពុំទាន់មានកេរ្តិ៍ឈ្មោះល្បីនៅក្នុងពិភពសិល្បៈយ៉ាងណាក្តីក៏នាងមានចិត្តសប្បាយរីករាយក្នុងអាជីពដែរ ហើយកំពុងតែកសាងកេរ្តិ៍ឈ្មោះតាមរយៈការថតសំលេងចូលស៊ីឌី និងសម្តែងខារ៉ាអូខេ និងឡើងច្រៀងជាកិត្តិយសក្នុងកម្មវិធីប្រគំតន្ត្រីរបស់ស្ថានីយទូរទស្សន៍នានាស្ទើររាល់សប្តាហ៍ ។
កញ្ញារ៉េត រ៉ាដា ជាអ្នករាជធានីភ្នំពេញមានបងប្អូន៧នាក់ ក្នុងនោះប្រុស៣នាក់ ចំណែករូបនាងជាកូនទី៥ក្នុងគ្រួសារ ៕
ចែករំលែកព័តមាននេះ