AFP កាលពីពេល ថ្មីៗកន្លងមកផ្សាយថា ដោយយោងតាមតួលេខពីវិទ្យាស្ថានស្ថិតិជាតិរបស់ម៉ិកស៊ិក (INEGI) ថា ចំនួនអ្នកស្លាប់ពីអំពើឃាតកម្មនៅក្នុងម៉ិកស៊ិកកើនខ្ពស់ដល់២០.៥២៥នាក់ ក្នុងឆ្នាំ២០១៥ ដោយកើនលើសពីឆ្នាំ២០១៤ ឬបើគិតជាអត្រាឃើញថា ជនរងគ្រោះដោយឃាតកម្មជាមធ្យម១៧នាក់ ក្នុងចំណោមពលរដ្ឋ១០០.០០០នាក់ ។
តាមតួលេខ «INEGI» ឱ្យដឹងថា ក្នុងចំនួនអ្នកស្លាប់ពីអំពើឃាតកម្មនៅម៉ិកស៊ិកដែលកើនខ្ពស់ដល់២០.៥២៥នាក់ នៅក្នុងឆ្នាំ២០១៥នោះ គឺចំនួនអ្នកស្លាប់ពីការបាញ់ប្រហារដោយអាវុធមានច្រើនជាង១២.០០០នាក់ និងនៅបរិវេណរដ្ឋ «Guerrero» ភាគខាងត្បូងប្រទេស គឺជាមជ្ឈមណ្ឌលនៃការធ្វើឃាតខ្ពស់បំផុត ។ ចំពោះតួលេខចំនួនអ្នកស្លាប់ដែលត្រូវធ្វើឃាតនៅម៉ិកស៊ិកឡើងខ្ពស់ដល់២០.៥២៥នាក់ នៅឆ្នាំ២០១៥ នៅតែចាត់ទុកថា ទាបជាងឆ្នាំ២០១១ ដែលជនរងគ្រោះកើនខ្ពស់ជាប្រវត្តិសាស្ត្រដល់ទៅ២៧.២១៣នាក់ ឬប្រហែល២៤នាក់ ក្នុងចំណោមពលរដ្ឋ១០០.០០០នាក់ ។
តាំងពីខែធ្នូ២០០៦ ម៉ិកស៊ិកបានប្រែក្លាយជាដែនដីនៃអំពើឃាតកម្មនៅលើពិភពលោក ដោយសារតែគោលនយោបាយនៃការបង្ក្រាបគ្រឿងញៀនរបស់រដ្ឋាភិបាលនៅក្នុងអាណត្តិរបស់លោកប្រធានាធិបតី Felipe Calderon៕
ចែករំលែកព័តមាននេះ