រាជធានីភ្នំពេញ ៖ សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាក បាទក្រហមកម្ពុជាបានឧបត្ថម្ភប្រាក់ចំនួន៥លានរៀលដល់លោកតាសង់ស៊ីស ដែលកំពុងសម្រាកព្យាបាលជំងឺ នៅមន្ទីរពេទ្យកាល់ម៉ែត ។ ប្រាក់នេះនាំយកទៅជូនលោកតាសង់ស៊ីស ដោយផ្ទាល់តាមរយៈលោកជំទាវ ម៉ែន នារីសោភ័គ អគ្គលេខាធិការរងទី១កាកបាទក្រហមកម្ពុជាកាលរសៀលថ្ងៃទី២៦ ខែកក្កដា ឆ្នាំ២០១៦ ។
នាឱកាសនោះលោកជំទាវម៉ែន នារីសោភ័គ ផ្តាំផ្ញើការសួរសុខទុក្ខពីសម្តេចកិត្តិព្រឹទ្ធបណ្ឌិតប៊ុន រា៉នី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាល តែងតែគិតគូរពីការលំបាករបស់សិល្បករជើងចាស់មានជំងឺធ្ងន់ និងជួបការលំបាកក្នុងជីវភាពរស់នៅ ។ លោកជំទាវបានថ្លែងអំណរគុណដល់ក្រុមគ្រូពេទ្យដែលយកចិត្តទុកដាក់ព្យាបាលជំងឺរបស់លោកតាសង់ ស៊ីស និងផ្តាំផ្ញើដល់កូនលោកតា ត្រូវយកចិត្តទុកដាក់ថែទាំឪពុកឱ្យបានល្អ ដើម្បីឆាប់បានជាសះស្បើយត្រឡប់ទៅគេហដ្ឋានវិញ ។
កញ្ញាសុន ស្រីពេជ្រ កូនស្រីរបស់លោកតាសង់ ស៊ីស បានថ្លែងអំណរគុណ សម្តេចកិត្តិព្រឹទ្ធបណ្ឌិតដែលជួយឧបត្ថម្ភចំពោះក្រុមគ្រួសារនាង ព្រមទាំងជូនពរសម្តេចកិត្តិព្រឹទ្ធបណ្ឌិតឱ្យជួបប្រទះតែនឹងពុទ្ធពរទាំងបួនប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ។ ក្រោយពីបានចូលសង្គ្រោះបន្ទាន់នៅមន្ទីរពេទ្យកាល់ម៉ែតអស់រយៈពេល៨ថ្ងៃ ដោយជំងឺស្ពៀតសរសៃឈាមខួរក្បាល និងបញ្ហាបេះដូង មក ស្ថានភាពជំងឺរបស់នាយសង់ស៊ីស បានធូរស្បើយមួយកម្រិតហើយ តែមិនទាន់និយាយបានច្រើនទេ។
តារាចម្រៀងកញ្ញាសុន ស្រីពេជ្រ បាននិយាយថា ពីដំបូងពុករបស់នាងនិយាយមិនបាន និងកម្រើកខ្លួនមិនរួចទេ តែពេលនេះអាចកម្រើកខ្លួនបាន អាចអង្គុយបាន និងអាចនិយាយបានតែពាក្យ«បាទ» ប៉ុណ្ណោះ ។ ទោះបីជាយ៉ាងណាក្តីនាងមានអារម្មណ៍ធូរស្បើយមួយកម្រិត នៅពេលឃើញឪពុករបស់នាងអាចមានចលនានិងនិយាយបានបែបនេះ ៕
ចែករំលែកព័តមាននេះ