រាជធានីភ្នំពេញ ៖ ស្ត្រីទើបសម្រាលកូនបាន៤ខែម្នាក់បានខាំអណ្តាតខ្លួនឯងសន្លប់ស្តូកស្តឹង ត្រូវបានប្តីនិងអ្នកជិតខាងចងអង្រឹងសែងជិត១០គីឡូម៉ែត្រយកទៅសង្គ្រោះនៅមន្ទីរពេទ្យ បង្កឲ្យមានការភ្ញាក់ផ្អើលកាលពីវេលាម៉ោង១០យប់ ថ្ងៃទី២៧ ខែកក្កដា ឆ្នាំ២០១៦ នៅចំណុចការដ្ឋានសាងសង់ឃ្លាំងស្តុកអង្ករ ស្ថិតក្នុងភូមិអន្សរ សង្កាត់ត្រពាំងក្រសាំង ខណ្ឌពោធិ៍សែនជ័យ ។
ស្ត្រីដែលខាំអណ្តាតខ្លួនឯងប៉ុនប៉ងសម្លាប់ខ្លួននេះមានឈ្មោះ ង៉ូយ សោភា អាយុ២៥ឆ្នាំ មុខរបរនៅផ្ទះ មានស្រុកកំណើតនៅភូមិអង្គក្នុង ឃុំអង្គព្រះស្រែ ស្រុករមាសហែក ខេត្តព្រៃវែង ។ ចំណែកប្តីរបស់នាងមានឈ្មោះធឿន ធី អាយុ៣១ឆ្នាំ មុខរបរជាងសំណង់ ស្នាក់នៅកន្លែងកើតហេតុ មានស្រុកកំណើតនៅស្រុកកោះធំ ខេត្តកណ្តាល មានកូន៣នាក់ ។
ប្រភពព័ត៌មានពីបងប្អូនជីដូនមួយរបស់ស្ត្រីរងគ្រោះបានឲ្យដឹងថា បុរសជាប្តីនោះបានមកធ្វើការសំណង់តាំងពីប្រពន្ធឆ្លងទន្លេបានជិតមួយខែម្ល៉េះ តែមិនដែលទៅផ្ទះទេ បែរជាលួចសម្ងំមានស្រីថ្មីនៅភ្នំពេញ ។ បន្ទាប់មកក៏បែកធ្លាយរឿងនេះដល់ប្រពន្ធ ដឹងថាប្តីមានស្រីជិតចូលរោងការទៀតផង ទើបនៅព្រឹកថ្ងៃទី២៧ ខែកក្កដា ស្ត្រីជាប្រពន្ធបាននាំកូនប្រុសដែលទើបនឹងសម្រាលបាន៤ខែនោះមកភ្នំពេញ មកជួបប្តីជាមួយអ្នកជិតខាងដែលគេមកលេងប្តីរបស់គេធ្វើការជាមួយគ្នា ។
ប្រភពដដែលបន្តទៀតថា ស្ត្រីជាប្រពន្ធមកភ្នំពេញលើកនេះមានបំណងមកនាំប្តីទៅស្រុកកំណើតវិញ ប៉ុន្តែបុរសជាប្តីមិនព្រមត្រឡប់ទៅស្រុកកំណើតវិញជាមួយប្រពន្ធទេ ធ្វើឲ្យស្ត្រីជាប្រពន្ធខឹងរហូតរឹងថ្គាមខាំអណ្តាតខ្លួនឯង ។ ភ្លាមៗនោះអ្នកជិតខាង និងបុរសជាប្តីបានទូរស័ព្ទហៅរថយន្តសង្គ្រោះរបស់មន្ទីរពេទ្យរដ្ឋ និងឯកជនជាច្រើនដង តែមិនមានរថយន្តសង្គ្រោះទៅដឹកយកមកព្យាបាលឡើយ ទើបអ្នកជិតខាង និងបុរសជាប្តីបានសម្រេចចិត្តចងអង្រឹងសែងដើរចម្ងាយជិត១០គីឡូម៉ែត្រ ទាំងភ័យស្លន់ស្លោ ហើយបុរសជាប្តីដើរបណ្តើរទូរស័ព្ទបណ្តើរ និងលូកដៃឲ្យប្រពន្ធខាំបណ្ដើរ ព្រោះខ្លាចប្រពន្ធខាំអណ្តាតស្លាប់ ។ ដោយសារតែភ័យខ្លាំងពេក បាននាំគ្នាសែងហួសមណ្ឌលសុខភាពសំរោងក្រោមបន្តិច ទើបត្រឡប់ក្រោយចូលឲ្យគ្រូពេទ្យជួយសង្គ្រោះ ។
ខណៈពេលទៅដល់មណ្ឌលសុខភាព គ្រូពេទ្យបានសួរនាំថា មានរឿងអីពិតប្រាកដបានជាអ្នកជម្ងឺខាំអណ្តាតជាប់បែបនេះ ត្រូវបានអ្នកជិតខាងប្រាប់ថា សង្ស័យទាស់ចំណី ព្រោះស្ត្រីរូបនេះទើបតែសម្រាលកូនបាន៤ខែបានហូបសម្លម្ជូរដើមចេក តែភ្លាមៗនោះមានអ្នកខ្លះទៀតបានលើកឡើងថា មានអ្នកទើបនឹងសម្រាលកូនដូចគ្នាហូបសម្លនឹងដែរ តែមិនឃើញមានទាស់ចំណីទេ ក៏ត្រូវបានអ្នកជិតខាងប្រាប់គ្រូពេទ្យថា សង្ស័យតែស្ត្រីរូបនេះខឹងប្តីមានស្រីថ្មី ហើយមានបំណងចូលរោងការទៀតផង ធ្វើឲ្យស្ត្រីរូបនោះខឹងចិត្តរហូតរឹងថ្គាមខាំអណ្តាតសន្លប់បែបនេះតែម្តង ។ បន្ទាប់ពីគ្រូពេទ្យធ្វើការព្យាបាល ស្ថានភាពស្ត្រីខាងលើបានធូរស្រាលវិញហើយ ។
ជាមួយគ្នានោះដែរប្រជាពលរដ្ឋរស់នៅតំបន់កើតហេតុខាងលើត្អូញត្អែរថា នៅភូមិសាស្ត្រដែលពួកគាត់រស់នៅខាងលើនេះ ពេលដែលមានជម្ងឺត្រូវការរថយន្តសង្គ្រោះបន្ទាន់ដឹកទៅមន្ទីរពេទ្យ គឺមិនដែលមានរថយន្តសង្គ្រោះរបស់មន្ទីរពេទ្យរដ្ឋ និងរថយន្តសង្គ្រោះគ្លីនិកឯកជនណាមួយទៅដឹកយកទៅព្យាបាលទេ ទោះបីជាខំប្រឹងទូរស័ព្ទចូលលេខរថយន្តសង្គ្រោះជាច្រើនដងយ៉ាងណាក៏បានមិនត្រឹមតែឲ្យទូរស័ព្ទទៅខាងនេះទៅខាងណោះចុងក្រោយរង់ចាំបន្តិចគឺបាត់ឈឹងតែម្តង ។
ប្រជាពលរដ្ឋសំណូមពរដល់ក្រសួងសុខាភិបាល និងស្ថាប័នពាក់ព័ន្ធ មេត្តាជួយសម្រួលដល់ពួកគាត់ដែលរស់នៅតំបន់ជាយក្រុងឲ្យមានរថយន្តសង្គ្រោះទៅជួយសង្គ្រោះពួកគាត់ផង ព្រោះពួកគាត់កំពុងតែជួបឧបសគ្គនៅចំពោះមុខជាញឹកញាប់ណាស់ ពិសេសនៅពេលយប់ ៕
ចែករំលែកព័តមាននេះ