រាជធានីភ្នំពេញ ៖ ក្រោយពីកោះសន្តិភាពបានចុះផ្សាយពីគម្រោងពង្រីកសេវាកម្មរបស់រដ្ឋាករស្វយ័តដឹកជញ្ជូនសាធារណៈរថយន្ដក្រុងរបស់រដ្ឋបាលសាលារាជធានីភ្នំពេញទៅតាមបណ្ដាខេត្ត មានមតិសាធារណជនជាច្រើន ពិសេសបណ្ដានិស្សិត កម្មករ-កម្មការិនី និងបុគ្គលិកទាំងវិស័យរដ្ឋ និងឯកជន ដែលមកសិក្សានិងធ្វើការនៅភ្នំពេញ ក៏ដូចជាអ្នកដំណើរ បានសម្ដែងការគាំទ្រយ៉ាងពេញទំហឹង និងចង់ឲ្យសេវាកម្មមួយនេះដំណើរការឲ្យបានឆាប់ ព្រោះពួកគេយល់ថា នឹងអាចជួយសម្រាលដល់ការលំបាកក្នុងការធ្វើដំណើរបានច្រើន ទាំងការចំណាយ និងមិនខ្វះមធ្យោបាយក្នុងការធ្វើដំណើរទៀត ជាពិសេសនៅរដូវបុណ្យទាន ដូចជាភ្ជុំបិណ្ឌ ឬចូលឆ្នាំជាដើម ។
បច្ចុប្បន្ន រាជរដ្ឋាភិបាលមិនអាចទប់ស្កាត់ការឡើងថ្លៃលើមធ្យោបាយធ្វើដំណើរពីសំណាក់ក្រុមហ៊ុនដឹកអ្នកដំណើរ និងតាក់ស៊ីបាននៅឡើយទេ ពិសេសនៅរដូវបុណ្យទានម្ដងៗ តម្លៃធ្វើដំណើរទាំងរថយន្តក្រុង និងតាក់ស៊ី តែងតែឡើងថ្លៃជាប្រចាំ បើទោះបីជាមានការអំពាវនាវ និងស្នើសុំពីសំណាក់ថ្នាក់ដឹកនាំកំពូលក៏ដោយ។ ដូចនេះ នៅពេលគម្រោងពង្រីកសេវាកម្មរថយន្ត ក្រុងសាធារណៈរបស់រដ្ឋដំណើរការ ប្រជាពលរដ្ឋជឿថា ការដំឡើងថ្លៃនឹងមិនមានទៀតទេ ឬយ៉ាងហោចណាស់ ក៏ការដំឡើងថ្លៃនោះមិនហួសហេតុពេកដែរ ។
លោក សៀង រដ្ឋា មន្ត្រីអង្គការមិនមែនរដ្ឋាភិបាលមួយនៅខេត្តព្រះសីហនុ ដែលតែងតែធ្វើដំណើរទៅមកភ្នំពេញជាញឹកញាប់ បានបញ្ចេញមតិថា ប្រសិនជារាជរដ្ឋាភិបាលពង្រីកសេវាកម្មរថយន្តក្រុងទៅតាមបណ្ដាខេត្តមែននោះ វាពិតជាល្អណាស់សម្រាប់ប្រជាពលរដ្ឋ ក៏ដូចជារូបលោកផ្ទាល់ ។ លោក រដ្ឋា និយាយថា ៖ « បើសិនជារាជរដ្ឋាភិបាលពង្រីកសេវាកម្មរថយន្តក្រុងសាធារណៈពីភ្នំពេញទៅបណ្ដាខេត្ត និងពីបណ្ដាខេត្តទៅភ្នំពេញនោះ ខ្ញុំនឹងជ្រើសរើសយកសេវាកម្មមួយនេះធ្វើជាមធ្យោបាយធ្វើដំណើរឡើងចុះភ្នំពេញ និងខេត្តព្រះសីហនុ ឬពីភ្នំពេញទៅបណ្ដាខេត្តផ្សេងៗទៀត ព្រោះការធ្វើដំណើរតាមរថយន្តក្រុងសាធារណៈរបស់រដ្ឋ ខ្ញុំគិតថា រដ្ឋមិនគិតពីរឿងលុយជាធំដូចឯកជននោះទេ ហើយនៅរដូវបុណ្យទាន ខ្ញុំក៏ជឿជាក់ថា រដ្ឋមិនដំឡើងថ្លៃលើមធ្យោបាយធ្វើដំណើរដែរ។ មួយវិញទៀត ការជ្រើសរើសយកសេវាកម្មរបស់រដ្ឋ ក៏អាចចូលរួមចំណែកក្នុងការអភិវឌ្ឍប្រទេសយើង ដោយយើងបានបង់ថ្លៃសេវាទៅរដ្ឋ ហើយរដ្ឋក៏យកសេវានោះទៅធ្វើអ្វីផ្សេងទៀតដែលចាំបាច់ » ។
លោកបន្តថា ចំពោះបញ្ហាតម្លៃ បើសិនជារដ្ឋអាចដាក់តម្លៃឱ្យទាបជាងតម្លៃសំបុត្ររបស់ឯកជននោះ វាជាការល្អប្រសើរបំផុត ព្រោះរដ្ឋអាចជួយដោះស្រាយ និងសម្រួលដល់ជីវភាពប្រជាពលរដ្ឋ ជាពិសេសបងប្អូនកម្មករ កម្មការិនី ដែលត្រូវការធ្វើដំណើរទៅលេងស្រុកម្តងម្កាល ចំណាយកាន់តែតិច និងអាចសន្សំសំចៃបានច្រើន ។
លោក គង់ ម៉ៅ អ្នកដំណើរដែលតែងតែប្រើសេវាកម្មរថយន្តក្រុងក្រុមហ៊ុនឯកជន ក៏បានឱ្យដឹងដែរថា លោកជាអ្នកដំណើរតែងតែចង់បានការចំណាយតិច ហើយបើសិនជាគម្រោងពង្រីកសេវាកម្មរថយន្តក្រុងសាធារណៈរបស់រដ្ឋលេចរូបរាងឡើង និងមានភាពប្រហាក់ប្រហែលនឹងសេវាកម្មរថយន្តក្រុងរបស់ឯកជន ក៏លោកនៅតែទទួលយកសេវាកម្មរថយន្តក្រុងរបស់រដ្ឋដែរ ពីព្រោះអាចជួយរកចំណូលដល់រដ្ឋដោយគ្រាន់តែជិះរថយន្តក្រុង ។ ទោះបីយ៉ាងណា លោកថា បើសិនជាមានតម្លៃទាប វាកាន់តែល្អថែមទៀត ព្រោះចំណាយអស់តិច និងជួយកាត់បន្ថយការចំណាយរបស់ពលរដ្ឋ ហើយថែមទាំងធ្វើឱ្យការដឹកជញ្ជូនរបស់កម្ពុជាកាន់តែមានភាពរីកចម្រើនទៅមុខជាលំដាបថែមទៀត ។
លោក ប៉ោ វុទ្ធី អ្នកគ្រប់គ្រងក្រុមហ៊ុនដឹកអ្នកដំណើរថោង ស៊ីង បានឱ្យដឹងថា ក្នុងនាមលោកជាអ្នករកទទួលទានខាងវិស័យដឹកជញ្ជូនអ្នកដំណើរ លោកគ្មានការភ័យព្រួយរឿងសេវាកម្មរបស់រថយន្តក្រុងសាធារណៈរបស់រដ្ឋនោះទេ តែថែមទាំងសប្បាយរីករាយ និងសាទរចំពោះសមិទ្ធផលរបស់រដ្ឋទៀតផង ដែលអាចបង្កើតសេវាកម្មដឹកអ្នកដំណើរទៅតាមបណ្ដាខេត្ត ។ លោកថា បើសិនជារដ្ឋធ្វើបាននូវការមិនឡើងថ្លៃ និងគោរពទៅតាមក្រមសីលធម៌ មានការយោគយល់ដល់អ្នកដំណើរនោះ ក្នុងនាមក្រុមហ៊ុនឯកជន ក៏នឹងអនុវត្តតាមអ្វីដែលរដ្ឋចង់បានផងដែរ ។
លោកបន្តថា ៖ « កន្លងមក ក្រុមហ៊ុនថោងស៊ីង បានអនុវត្តរួចទៅហើយនូវគោលការណ៍ មិនដំឡើងថ្លៃសំបុត្រនៅពេលមានបុណ្យទាន ដូចជា ចូលឆ្នាំ និងភ្ជុំបិណ្ឌជាដើម។ មិនតែប៉ុណ្ណោះ ពេលខ្លះយើងក៏មិនយកកម្រៃពីអ្នកដំណើរក្នុងថ្ងៃចូលឆ្នាំ ឬថ្ងៃភ្ជុំ ដើម្បីអបអរជាមួយប្រជាពលរដ្ឋខ្មែររបស់យើង។ តែយ៉ាងណា ការភ្លាំងភ្លាត់របស់ក្រុមហ៊ុនក៏តែងតែមាន ដូចជាការលក់សំបុត្រលើសពីតម្លៃកំណត់ ដោយភ្នាក់ងារលក់តាមទីតាំងផ្សេងៗក្នុងរាជធានីភ្នំពេញ ឬខេត្តផ្សេងៗដែលមិនមែនជាភ្នាក់ងាររបស់ក្រុមហ៊ុន
ផ្ទាល់ » ។
លោក មាន ចាន់យ៉ាដា អ្នកនាំពាក្យសាលារាជធានីភ្នំពេញ មិនបាននិយាយអ្វីច្រើនទាក់ទងនឹងការពង្រីកសេវាកម្មរថយន្តក្រុងសាធារណៈទៅតាមបណ្ដាខេត្តនោះទេ ដោយគ្រាន់និយាយថា វាគ្រាន់តែជាការគិតគូររបស់សាលារាជធានីភ្នំពេញ ក៏ដូចជារាជរដ្ឋាភិបាលដើម្បីសម្រួលដល់ជីវភាពរបស់ប្រជាពលរដ្ឋកម្ពុជាប៉ុណ្ណោះ ត្រង់ថា ផែនការនឹងអនុវត្តពេលណា លោកពុំទាន់ច្បាស់នៅឡើយ ។ លោកនិយាយថា ៖ « វានៅពេលយូរទៀត ដែលសាលារាជធានីភ្នំពេញត្រូវសិក្សា និងពិគ្រោះយោបល់នៅឡើយ ពីព្រោះសាលារាជធានីភ្នំពេញ និងរាជរដ្ឋាភិបាលទាំងមូលចង់ឱ្យពលរដ្ឋមានភាពល្អប្រសើរក្នុងការធ្វើដំណើរការ ដោយសារតែនៅពេលបុណ្យទាន ប្រជាពលរដ្ឋពិតជាមានផលពិបាកក្នុងការធ្វើដំណើរមកពីតម្លៃឡើងថ្លៃ ឬកង្វះមធ្យោបាយដឹកអ្នកដំណើរជាដើម » ។
គួររំឭកថា នៅក្នុងពិធីចុះហត្ថលេខាលើកំណត់ហេតុនៃកិច្ចពិភាក្សាស្តីពីការសិក្សារៀបចំគម្រោងហិរញ្ញប្បទានឥតសំណង សម្រាប់ពង្រីកសមត្ថភាពសេវាដឹកជញ្ជូនសាធារណៈដោយរថយន្តក្រុង ជាមួយទីភ្នាក់ងារសហប្រតិបត្តិការអន្តជាតិជប៉ុន (JICA) កាលពីថ្ងៃទី២១ កក្កដា កន្លងមក មន្ត្រីរដ្ឋបាលរាជធានីភ្នំពេញបានអះអាងថា តាមការគ្រោងទុក កម្ពុជានឹងទទួលរថយន្តក្រុងពីអង្គការ JICA ប្រទេសជប៉ុនជំហានទី១ ចំនួន៣០គ្រឿងនៅដើមឆ្នាំ២០១៧ និងជំហានទី២ ចំនួន៥០គ្រឿងបន្ថែមទៀតនៅពាក់កណ្តាលឆ្នាំ២០១៨ គឺសរុបចំនួន៨០គ្រឿង ដើម្បីបម្រើឲ្យសេវាដឹកជញ្ជូនសាធារណៈ និងកាត់បន្ថយការកកស្ទះចរាចរណ៍នៅក្នុងក្រុងឲ្យបានប្រសើរ ។
សូមបញ្ជាក់ថា ចាប់តាំងពីរាជធានីភ្នំពេញ ដាក់ឲ្យដំណើរការសេវាដឹកជញ្ជូនសាធារណៈរថយន្តក្រុងចាប់ពីដើមខែកុម្ភៈ ឆ្នាំ២០១៤ រហូតមកដល់ពេលនេះ រាជធានីភ្នំពេញមានសេវាដឹកជញ្ជូនរថយន្តក្រុងសាធារណៈចំនួន៣ខ្សែគឺ៖
ខ្សែទី១-ចេញពីគីឡូម៉ែត្រលេខ៩ ផ្សារព្រែកព្នៅ ឆ្ពោះទៅបឹងឈូក ផ្លូវជាតិលេខ១ មានចំណត៦៧កន្លែង ។
ខ្សែទី២-ចេញពីផ្សាររាត្រីទៅក្រុងតាខ្មៅខេត្តកណ្តាល មានចំណត៦៨កន្លែង ។
ខ្សែទី៣-ចេញពីផ្សាររាត្រីឆ្ពោះទៅរង្វង់មូលចោមចៅ មានចំណត៤៨កន្លែង ៕
ចែករំលែកព័តមាននេះ