រាជធានីភ្នំពេញ ៖ ប្តីប្រពន្ធ២នាក់បានជិះម៉ូតូឌុបមកកាន់ប៉ុស្តិ៍នគរបាលចោមចៅដើម្បីឲ្យសមត្ថកិច្ចជួយអន្តរាគមន៍ ហើយចោទប្រកាន់បុរសម្នាក់ថាបានស៊ីដាច់ម៉ូតូរបស់ខ្លួនទៅបាត់កាលពីព្រឹកថ្ងៃទី២៧ ខែកក្កដា ឆ្នាំ២០១៦ នៅចំណុចម្តុំរោងចក្រ៦ជាន់ ស្ថិតក្នុងភូមិជ្រែកោង សង្កាត់ចោមចៅ ខណ្ឌពោធិ៍សែនជ័យ ។
នារីជាប្រពន្ធបានប្រាប់សមត្ថកិច្ចឲ្យដឹងថា នាងបានបាត់ប្អូនប្រុសម្នាក់រយៈ២ថ្ងៃហើយ ហើយកាលពីព្រឹកមិញនាងពឹងជនសង្ស័យដែលស្នាក់នៅបន្ទប់ជួលក្បែរគ្នាឲ្យជួយជូនជូនទៅរកប្អូននៅម្តុំរោងចក្រ៦ជាន់ ខណៈទៅដល់ម្តុំរោងចក្រ៦ជាន់ពេលដែលចុះពីលើម៉ូតូ ស្រាប់តែជនសង្ស័យជិះម៉ូតូទៅបាត់តែម្តង ហើយនាង និងប្តីរបស់នាងក៏បាននាំគ្នាមកដាក់ពាក្យបណ្តឹងដើម្បីឲ្យសមត្ថកិច្ចជួយស្វែងរកជនសង្ស័យខាងលើមកផ្តោន្ទាទោសតាមច្បាប់ ។
ប្រភពពីសមត្ថកិច្ចបានឲ្យដឹងថា នារីរងគ្រោះឈ្មោះ ធឿន ស្រីមុំ អាយុ២៣ឆ្នាំ ជាកម្មការិនីរោងចក្រ ស្នាក់នៅភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ ចំណែកម៉ូតូដែលជនសង្ស័យជិះយកទៅបាត់នោះម៉ាកហុងដា ឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1CE-6074 ។ ចំណែកជនសង្ស័យដែលស៊ីដាច់ម៉ូតូនោះត្រូវបាននារីរងគ្រោះថាឈ្មោះ ថៃ អាយុ១៨ឆ្នាំ ស្នាក់នៅបន្ទប់ជួលក្បែរគ្នា ៕
ចែករំលែកព័តមាននេះ