បណ្តាកងឯកភាពនៃកងកម្លាំងពិសេសតួកគី គាំទ្រដោយឧទ្ធម្ភាគចក្រ បណ្តាយន្តហោះគ្មានមនុស្សបើក និងកងម៉ារីន កាលពីថ្ងៃទី២៦ កក្កដា បើកធ្វើប្រតិបត្តិការតាមប្រមាញ់អ្នកធ្វើរដ្ឋប្រហារមួយក្រុមដែលរត់គេចខ្លួន ដែលក្រុមនេះជាអ្នកតាមរកចាប់ ឬសម្លាប់ប្រធានាធិបតីលោករីស៊ីប តៃយីបអ័ដូហ្គាន ក្នុងពេលប៉ុនប៉ងធ្វើរដ្ឋប្រហារកាលពីថ្ងៃទី១៥ កក្កដា ។
បណ្តាអ្នកទទួលខុសត្រូវតួកគីរាយការណ៍ថា សមាជិកកងកម្លាំងសន្តិសុខដល់ទៅ១.០០០នាក់ត្រូវបានប្រើតាមប្រមាញ់រកទាហាន១១នាក់ នៅតាមតំបន់ភ្នំព័ទ្ធជុំវិញទីក្រុងកម្សាន្តមាត់សមុទ្រ MARMARIS ជាប់សមុទ្រមេឌីទែរ៉ាណេ ជាកន្លែងប្រធានាធិបតីទៅសម្រាកវិស្សមកាលនាយប់ធ្វើរដ្ឋប្រហារមិនបានសម្រេច ។ ទាហានទាំង១១នាក់នេះ ស្ថិតក្នុងកងកុំម៉ង់ដូមួយដែលបញ្ជូនតាមឧទ្ធម្ភាគចក្រមកវាយប្រហារសណ្ឋាគារជាកន្លែងស្នាក់របស់លោកអ័រដូហ្គាន ពេលលោកទើបចាកចេញពីទីនោះ រួចជិះយន្តហោះមួយគ្រឿងមកកាន់ក្រុងអីុស្តង់ប៊ុល ។ សមាជិក៧នាក់ទៀតរបស់កងកុំម៉ង់ដូនេះត្រូវចាប់ខ្លួនកាលពីថ្ងៃទី២៥ កក្កដា នៅប៉ុស្តិ៍ត្រួតពិនិត្យមួយរបស់ប៉ូលិស ។
ទន្ទឹមនឹងនេះការដាក់ទោសនៅបន្តក្នុងប្រទេសដោយនាថ្ងៃទី២៦ កក្កដា ផ្នែកដឹកនាំកិច្ចការសាសនាបានដកតំណែងមន្ត្រី៦២០នាក់ទៀត ក្នុងនោះមានអ្នកប្រដៅសាសនា និងបណ្តាគ្រូបង្រៀននៃសាលាកូរអាន ។
រដ្ឋមន្ត្រីការបរទេសតួកគីលោក MEVLUT CAVUSOGLU ថ្លែងថា ឯកអគ្គរដ្ឋទូតតួកគី២រូបដែលបច្ចុប្បន្នស្ថិតនៅក្រុងអង់ការ៉ាត្រូវដកហូតតំណែង ។ ចំណែកអតីតអភិបាលក្រុងអីុស្តង់ប៊ុល លោក HUSEYIN AVNI MULLU ត្រូវចាប់ខ្លួន ហើយផ្ទះរបស់លោកត្រូវគេលុកចូលឆែកឆេរ ។
រហូតមកទល់ពេលនេះ ក្រោយបរាជ័យនៃរដ្ឋប្រហារ ទាហាន ប៉ូលិស ចៅក្រម និងមន្ត្រីរដ្ឋការ ជាង៦០.០០០នាក់ត្រូវចាប់ខ្លួន ដកហូតការងារ ឬស្ថិតក្រោមការស៊ើបអង្កេត។ ១ភាគ៣នៃឧត្តមសេនីយ៍តួកគីទាំង៣៦០រូប ត្រូវចាប់ខ្លួនតាំងពីថ្ងៃទី១៥ កក្កដា មក ហើយជាង១០០នាក់ទទួលការចោទប្រកាន់រួចហើយ ។
ឧត្តមសេនីយ៍តួកគី២រូបស្ថិតនៅអាហ្វហ្គានីស្ថានត្រូវចាប់ខ្លួននៅក្រុងឌូបៃ គឺឧត្តមសេនីយ៍ CAHIT BAKIR មេបញ្ជាការម្នាក់នៃកងទ័ពដែលបម្រើការក្នុងផ្ទៃកងកម្លាំងសន្តិសុខអន្តរជាតិនៅអាហ្វហ្គានីស្ថាន និងឧត្តមសេនីយ៍ SENER TOPUC ។
សភាតួកគីបានបង្កើតនាថ្ងៃទី២៦ កក្កដា នូវគណៈកម្មការមួយគាំទ្រដោយគ្រប់គណបក្សនយោបាយទទួលបន្ទុកស៊ើបអង្កេតលើការធ្វើរដ្ឋប្រហារ និងតើចលនារបស់លោក GULEN ចូលជ្រៀតជ្រែកបែបណាក្នុងបណ្តាស្ថាប័ន ហើយធ្វើរដ្ឋប្រហារនេះ ។ រដ្ឋមន្ត្រីយុត្តិធម៌លោក BEKIR BOZDAG ក្នុងឱកាសនៃកិច្ចពិភាក្សាជាមួយគណៈកម្មការនេះថ្លែងថា បច្ចុប្បន្នមានការដាក់ពាក្យចោទប្រកាន់នានា រួចព័ត៌មាន និងឯកសារជាច្រើនត្រូវបានប្រមូល ៕
ចែករំលែកព័តមាននេះ