រាជធានីភ្នំពេញ ៖ យស់ សំអាល់ មកពីក្លិបឃ្លាំងមឿងកីឡា និងយ៉េន ឌីណា មកពីក្លិបអប្សរាគុនខ្មែរដែលត្រូវឡើងប្រកួតជាមួយកីឡាករថៃថ្ងៃសៅរ៍ ទី៣០ កក្កដា នៅលើសង្វៀនទូរទស្សន៍ CTN សប្ដាហ៍នេះ មិនដឹងថា
រាជធានីភ្នំពេញ ៖ យស់ សំអាល់ មកពីក្លិបឃ្លាំងមឿងកីឡា និងយ៉េន ឌីណា មកពីក្លិបអប្សរាគុនខ្មែរដែលត្រូវឡើងប្រកួតជាមួយកីឡាករថៃថ្ងៃសៅរ៍ ទី៣០ កក្កដា នៅលើសង្វៀនទូរទស្សន៍ CTN សប្ដាហ៍នេះ មិនដឹងថា ទៅរួចឬអត់នោះទេ ។
យស់ សំអាល់ ត្រូវជួបប្រកួតជាមួយកីឡាករថៃឈ្មោះSorndeang Sitkamnanlee ខណៈយ៉េន ឌីណា ប្រកួតជាមួយកីឡាករថៃឈ្មោះFanam chhai por Mongkhun Thap ក្នុងប្រភេទទម្ងន់៦០គីឡូក្រាម ។
យស់ សំអាល់ ធ្លាប់ប្រកួតបាន១២៩ដង ឈ្នះ៩៥ដង ចាញ់២៧ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន២០ដង ។ រីឯកីឡាកថៃSorndeang Sitkamnanlee ធ្លាប់ប្រកួតបានត្រឹមតែ៨៧ដង ឈ្នះ៦៦ដង ចាញ់១៨ដង ស្មើ៣ដង និងផ្ដួលគូប្រកួតឱ្យសន្លប់បាន១ដង ។ ថ្វីដ្បិតតែកីឡាករថៃរូបនេះមានប្រវត្តិប្រកួតមិនច្រើនដូចយស់ សំអាល់មែន ប៉ុន្តែកុំមើលស្រាលឱ្យសោះ ព្រោះកីឡាករថៃដែលមកប្រកួតនៅស្រុកខ្មែរសុទ្ធតែជាជើងខ្លាំងពិបាកផ្ដួល បំផុត ។ មិនតែប៉ុណ្ណោះកីឡាករថៃរូបនេះមិនធ្លាប់មកប្រកួតនៅស្រុកខ្មែរផង ទើបគេពិបាកប៉ាន់ស្មានពីលទ្ធផលចុងក្រោយ ។
ចំណែក យ៉េន ឌីណា ធ្លាប់ប្រកួតបានត្រឹមតែ៦៨ដងប៉ុណ្ណោះ ក្នុងនោះឈ្នះ៦៤ដង ចាញ់៣ដង ស្មើ១ដង និងធ្លាប់ផ្ដួលគូប្រកួតឱ្យសន្លប់បាន១៣ដង ខណៈកីឡាករថៃដែលជាគូប្រកួតរបស់គេធ្លាប់ប្រកួតបានរហូតដល់ទៅ១២០ដង ឈ្នះ៩៥ដង ចាញ់២០ដង ស្មើ៥ដង និងធ្លាប់ផ្ដួលគូប្រកួតបាន១០ដង ។ ដូច្នេះ សម្រាប់ការជួបគ្នាលើកនេះ ពិតជាពិបាកប៉ាន់ស្មានខ្លាំងណាស់ ។ យ៉េន ឌីណា ថ្វីដ្បិតតែប្រកួតបានតិចជាងកីឡាករថៃមែន តែល្បិចប្រយុទ្ធនៅលើសង្វៀនរបស់គេល្អគួរសម ។ ជាពិសេសការប្រើស្នៀតកែង និងជង្គង់របស់គេតែម្ដង គឺអាចវាយចេញបានត្រង់ល្អ និងចំគោលដៅទៀតផង ។ ចាំមើល យ៉េន ឌីណា អាចទប់ទល់ជាមួយកីឡាករជើងខ្លាំងថៃរូបនេះបានប៉ុន្មានទឹក ?
រីឯគូប្រកួតមិត្តភាពធម្មតាវិញ កីឡាករ អាន ទាវ មកពីក្លិបសុភានូមានជ័យ ប្រកួតជាមួយកីឡាករ សិទ្ធ ចន្ទ្រា មកពីក្លិបសាមគ្គីកូនខ្មែរ។ កីឡាករ ឡុង ជិន មកពីក្លិបខ្លារខិនមានរិទ្ធ ប្រកួតជាមួយកីឡាករហែល វ៉ា មកពីក្លិបឃ្លាំងមឿងកីឡា និងកីឡាករ ឡុង សុវណ្ណពៅ មកពីក្លិបសាលវ័ន្តកីឡា ប្រកួតជាមួយកីឡាករ ទេស សំខាន់ មកពីក្លិបកងពលតូចលេខ៧០ ៕
ចែករំលែកព័តមាននេះ