ខេត្តត្បូងឃ្មុំ ៖ សម្លេងឈ្លោះប្រកែកគ្នាទៅវិញទៅមករហូតផ្ទុះអំពើហឹង្សា ដោយជនរងគ្រោះត្រូវបានគេប្រើឧបករណ៍រឹងចុងស្រួចចាក់ចំភ្លៅឆ្វេងបណ្ដាលឲ្យឈាមហូរបា.ញ់ជោគធរណីឡើងខ្សោះអស់ពីខ្លួន
ខេត្តត្បូងឃ្មុំ ៖ សម្លេងឈ្លោះប្រកែកគ្នាទៅវិញទៅមករហូតផ្ទុះអំពើហឹង្សា ដោយជនរងគ្រោះត្រូវបានគេប្រើឧបករណ៍រឹងចុងស្រួចចាក់ចំភ្លៅឆ្វេងបណ្ដាលឲ្យឈាមហូរបាញ់ជោគធរណីឡើងខ្សោះអស់ពីខ្លួន ។ ហេតុការណ៍នេះកើតឡើងកាលពីវេលាម៉ោង៩ និង១០នាទីយប់ ថ្ងៃទី២៦ ខែកក្កដា ឆ្នាំ២០១៦ នៅភូមិស្រែសោមថ្មី ឃុំកំពាន់ ស្រុកមេមត់ ខេត្តត្បូងឃ្មុំ ។
លោកវរសេនីយ៍ត្រី ហុង គឹមហឿន អធិការនគរបាលស្រុកមេមត់ បានឲ្យដឹងថា ជនបង្កឈ្មោះ ស្រឿន ការ៉ា ភេទប្រុស អាយុ២២ឆ្នាំ រស់នៅភូមិ-ឃុំកើតហេតុ បានប្រើប្រាស់ឧបករណ៍រឹងចុងស្រួចចាក់ទៅលើអ្នករងគ្រោះឈ្មោះ ប៊ុន ចេងហំ ភេទប្រុស អាយុ២១ឆ្នាំ រស់នៅភូមិឃុំជាមួយគ្នា រងរបួសជាទម្ងន់ ឈាមហូរឡើងខ្សោះពីខ្លួន ត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែកស្រុកមេមត់ តែដោយសារស្ថានភាពរបួសធ្ងន់ធ្ងរពេក ក៏បណ្ដាលឲ្យស្លាប់បាត់ទៅ ចំណែកជនបង្កបានរត់គេចខ្លួនចូលព្រៃចម្ការដំឡូងបាត់ស្រមោល ។
លោកវរសេនីយ៍ត្រី ហុង គឹមហឿន ឲ្យដឹងទៀតថា ក្រោយពេលកើតហេតុ សមត្ថកិច្ចបានចុះទៅពិនិត្យសាកសព និងបានប្រគល់សពឲ្យទៅសាច់ញាតិដើម្បីរៀបចំធ្វើបុណ្យទៅតាមប្រពៃណី ។ បន្ទាប់មករូបលោកបានរាយការណ៍ទៅលោកស្នងនគរបាលខេត្ត និងបានបញ្ជាឲ្យប៉ុស្តិ៍រដ្ឋបាលឃុំកំពាន់ ព្រមទាំងជំនាញព្រហ្មទណ្ឌស្រុក ចុះស្រាវជ្រាវទាំងយប់ ។ លោកបញ្ជាក់ថា តាំងពីយប់ថ្ងៃទី២៦កក្កដា រហូតមកដល់ព្រឹកថ្ងៃទី២៧កក្កដានេះ ឃាតករមិនទាន់ត្រូវបានកម្លាំងសមត្ថកិច្ចចាប់ខ្លួនបាននៅឡើយទេ ។
មន្ត្រីនគរបាលស្រុកមេមត់ បញ្ជាក់ឲ្យដឹងដែរថា មុនពេលកើតហេតុផ្ទុះអំពើហិង្សាមនុស្សឃាតនេះ ដំបូងគេបានឃើញជនរងគ្រោះ និងជនបង្ក បានដើរបណ្ដើរឈ្លោះប្រកែកគ្នាបណ្តើរតាមផ្លូវក្នុងភូមិ ហើយបន្ទាប់មកក៏មានជម្លោះប្រតាយប្រតប់គ្នាទៅវិញទៅមក បណ្តាលឲ្យជនសង្ស័យដួលទៅលើដី ហើយជនរងគ្រោះបានទៅសង្កត់ពីលើ តែត្រូវបានជនបង្កឈ្មោះ ការ៉ា ចាក់បណ្ដាលឲ្យហូរឈាមខ្សោះអស់ពីខ្លួនមិនអាចសង្គ្រោះបានតែម្តង ៕
ចែករំលែកព័តមាននេះ