រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញ លោកវេង ហ៊ត កាលព្រឹកថ្ងៃទី២៧ កក្កដា ២០១៦ បានប្រកាសសាល ក្រមផ្ដន្ទាទោសមន្ត្រីក្រសួងការបរទេសម្នាក់កំណត់២ឆ្នាំ ។ តែទោសនេះ តម្រូវឱ្យអនុវត្តក្នុងពន្ធនាគារត្រឹម១ឆ្នាំប៉ុណ្ណោះ និងពិន័យជាប្រាក់ចូលថវិការដ្ឋចំនួន៦លានរៀល ទោសសល់ត្រូវព្យួរ ក្រោមការចោទប្រកាន់ពីបទ វីតិក្រម តាមមាត្រា៥៩២ និងមាត្រា ៥៩៣ នៃក្រមព្រហ្មទណ្ឌ ។
សាលក្រមនោះ បានបើកផ្លូវទុកឱ្យជនជាប់ចោទប្តឹងទៅសាលាឧទ្ធរណ៍ តាមកំណត់ច្បាប់ បើជនជាប់ចោទមិនសុខចិត្ត ចំពោះការសម្រេចក្តីនេះ ។
ជនជាប់ចោទឈ្មោះអ៊ា សែ ភេទប្រុស អាយុ៤២ឆ្នាំ មានលំនៅផ្ទះលេខ៤ ផ្លូវលេខ៤០២ សង្កាត់ទំនប់ទឹក ខណ្ឌចំការមន ជាប្រធានការិយាល័យនៃក្រសួងការបរទេស ។
គួរបញ្ជាក់ថា ចៅក្រមសាលាដំបូងរាជធានីភ្នំពេញ លោកវេង ហ៊ត កាលពីថ្ងៃទី៤ កក្កដា ២០១៦ បានបើកសវនាការលើសំណុំរឿងវីតិក្រម របស់មន្ត្រីក្រសួងការបរទេសម្នាក់ ដែលពាក់ព័ន្ធក្នុងបទល្មើសទារប្រាក់ពីតំណាងក្រុមហ៊ុននាំចេញនាំចូលសំលៀកបំពាក់ និងឧបករណ៍កីឡា ។
ក្នុងសវនាការជនជាប់ចោទឈ្មោះអ៊ា សែ អាយុ៤២ឆ្នាំ បានសារភាពនូវការទាមទារប្រាក់៣០០ដុល្លារ ពីតំណាងក្រុមហ៊ុនរោងចក្រផលិតសម្ភារកីឡា ។ លោកអ៊ា សែ បានឆ្លើយថា នៅអំឡុងខែមករា និងខែមីនា ឆ្នាំ២០១៦ មានស្ត្រីម្នាក់ឈ្មោះស្រីល័ក្ខ ជាតំណាងក្រុមហ៊ុនផលិតសម្ភារកីឡា បានយកឯកសារនាំសម្ភារកីឡាចេញទៅប្រទេសប្រេស៊ីល មកឱ្យខ្កួនរត់ការបញ្ជាក់ពីក្រសួងការបរទេស ដោយសារប្រទេសប្រេស៊ីល ពុំមានស្ថានកុងស៊ុប្រចាំនៅកម្ពុជា ប៉ុន្តែពេលយកឯកសារនោះ ទៅប្រគល់ឱ្យលោកសុខ ខឿន ជាអនុប្រធាននាយកដ្ឋានផ្នែកច្បាប់ធ្វើការបញ្ជាក់ ត្រូវលោកសុខ ខឿន បានបដិសេធមិនទទួលយក ទាំងឯកសារ និង
កម្រៃ ។
ក្រោយមក នៅថ្ងៃទី២៨ មីនា ២០១៦ ស្រីល័ក្ខ បានយកឯកសារដូចគ្នាចំនួន៣ មកប្រគល់ឱ្យបញ្ជាក់ទៀត ព្រមទាំងប្រាក់១០០០ដុល្លារផង ពេលនោះ មន្ត្រីអង្គភាពប្រឆាំងអំពើពុករលួយ ក៏ឃាត់ខ្លួនតែម្ដង ។
សំណុំរឿងវីតិក្រមនេះ តំណាងអយ្យការបានតម្កល់ការចោទប្រកាន់អោយនៅដដែល និងសុំឱ្យតុលាការសម្រេចតាមច្បាប់ ហើយចៅក្រមតុលាការ បានប្រកាសសាលក្រមផ្តន្ទាទោសជនជាប់ចោទ ឱ្យអនុវត្តទណ្ឌកម្មទោសក្នុងពន្ធនាគារ១ឆ្នាំប៉ុណ្ណោះ និងពិន័យប្រាក់៦លានរៀល បង់ចូលថវិការដ្ឋ ។
ចែករំលែកព័តមាននេះ