រាជធានីភ្នំពេញ ៖ រថយន្តពីរគ្រឿងបើកដេញកៀរគ្នាឲ្យឈប់នៅមុខទីស្តីការគណៈរដ្ឋមន្ត្រី ហើយចុះពីលើរថយន្តដេញវាយប្រតាយប្រតប់គ្នាបង្កឲ្យមានការភ្ញាក់ផ្អើលទើបដឹងថា ប្តីបើករថយន្តដេញតាមប្រពន្ធកំពុងតែជិះរថយន្តជាមួយប្រុសស្នេហ៍ថ្មី
រាជធានីភ្នំពេញ ៖ រថយន្តពីរគ្រឿងបើកដេញកៀរគ្នាឲ្យឈប់នៅមុខទីស្តីការគណៈរដ្ឋមន្ត្រី ហើយចុះពីលើរថយន្តដេញវាយប្រតាយប្រតប់គ្នាបង្កឲ្យមានការភ្ញាក់ផ្អើលទើបដឹងថា ប្តីបើករថយន្តដេញតាមប្រពន្ធកំពុងតែជិះរថយន្តជាមួយប្រុសស្នេហ៍ថ្មី ចំណែកប្រុសស្នេហ៍ពេលដែលប្តីគេតាមទាន់បានចូលទៅពួននៅក្នុងទីស្តីការគណៈរដ្ឋមន្ត្រីបាត់ ដែលហេតុការណ៍នេះកើតឡើងកាលពីវេលាម៉ោង១១យប់ថ្ងៃទី២៦ ខែកក្កដា ឆ្នាំ២០១៦ តាមបណ្តោយផ្លូវសហព័ន្ធរុស្សី ស្ថិតក្នុងសង្កាត់មិត្តភាព ខណ្ឌ៧មករា ។
សាក្សីដែលបានឃើញហេតុការបានឲ្យដឹងថា មុនពេលកើតហេតុគេបានឃើញរថយន្ត២គ្រឿង ១គ្រឿងម៉ាក Hammer ពណ៌ខ្មៅ ជិះគ្នា២នាក់ ប្រុសម្នាក់ស្រីម្នាក់ និង១គ្រឿងទៀតម៉ាក native ពណ៌ទឹកប៊ិច បើកបរដោយបុរសជាប្តី គ្រាន់តែដឹងថាជាអ្នកសារព័ត៌មានមួយរូប ធ្វើដំណើរតាមបណ្តោយផ្លូវសហព័ន្ធរុស្សី ក្នុងទិសដៅពីកើតទៅលិច ក្នុងល្បឿនលឿនដេញកៀរគ្នារហូតដល់មុខទីស្តីការគណៈរដ្ឋមន្ត្រី រថយន្តបុរសជាប្តីបានបើកកៀររថយន្ត Hammer ឲ្យឈប់ រួចហើយបុរសជាប្តីបានចុះទៅប្រតាយប្រតប់ជាមួយស្ត្រីជាប្រពន្ធ ចំណែកបុរសដែលជាប្រុសស្នេហ៍របស់ប្រពន្ធដែលគេដឹងថាជាមន្ត្រីរាជការមួយរូបដែរនោះបានបើកទ្វាររថយន្ត Hammer រត់គេចចូលទីស្តីការគណៈរដ្ឋមន្ត្រីបាត់ ។
បើតាមសម្តីបុរសជាប្តីបានឲ្យដឹងថា លោកនិងប្រពន្ធបានរៀបអាពាហ៍ពិពាហ៍ស្របច្បាប់ជាច្រើនឆ្នាំមកហើយ ទើបតែរយៈពេល២ខែចុងក្រោយនេះប្រពន្ធលោកចុះចោលផ្ទះបាត់ៗ មិនសូវនៅផ្ទះ ធ្វើឲ្យរូបលោកមានការសង្ស័យ និងតាមដានដឹងថា ប្រពន្ធលោកលួចមកនៅជាមួយបុរសម្នាក់ ដែលជិះរថយន្ត Hammer ខាងលើ ដោយបានដើរលេងជាមួយគ្នា ចូលមើលកុន និងចូលខុនដូស្នាក់នៅជាមួយគ្នាទៀតផង ប៉ុន្តែគាត់មិនមានភស្តុតាងគ្រប់គ្រាន់ ទើបតែយប់កើតហេតុគាត់បានបើករថយន្តដេញតាមប្រពន្ធរហូតមកដល់ចំណុចខាងលើបានកៀររថយន្តឲ្យឈប់ ដើម្បីនិយាយគ្នា ទោះបីជាពួកគេបានលែងលះគ្នាពិតមែន តែមិនទាន់ដាច់ស្រេចគ្នានៅឡើយទេ ។
ចំណែកស្ត្រីជាប្រពន្ធវិញបានចោទបុរសជាប្តីថា មិនចេះរកស៊ីអីទេ គឺដេកចាំចាយលុយនាងចិញ្ចឹម ធ្វើឲ្យនាងអស់ចិត្ត បានទៅដាក់ពាក្យប្តឹងទៅតុលាការដើម្បីលែងលះគ្នា តែអតីតប្តីនាងមិនព្រមលែងទេ ហើយចេះតែមកតាមរករឿងនាងធ្វើឲ្យរូបនាងខ្មាស់គេ ។
ក្រោយពេលប្រតាយប្រតប់គ្នាមួយសន្ទុះរួចមក សមត្ថកិច្ចមូលដ្ឋានបានចុះមកដល់កន្លែងកើតហេតុ និងបានធ្វើការសំរបសំរួល ដើម្បីអោយភាគីទាំងសងខាងចេញផុតពីមុខទីស្តីការគណៈរដ្ឋមន្ត្រី ស្របពេលនោះគេឃើញបុរសដែលជិះរថយន្ត Hammer បានរត់ចេញមកលួចបើករថយន្តចេញទៅបាត់ ចំណែក២នាក់ប្តីប្រពន្ធបានត្រឡប់ទៅផ្ទះវិញរៀងៗខ្លួន ៕
ចែករំលែកព័តមាននេះ