ខេត្តមណ្ឌលគិរី ៖ យោងតាមលោក អ៊ាង ម៉េងលី បុគ្គលិកអង្គការអាដហុកប្រចាំខេត្តមណ្ឌលគីរី បានឲ្យដឹងថា កាលពីល្ងាចថ្ងៃទី២៤ ខែកក្កដា ឆ្នាំ២០១៦ មានជនរងគ្រោះឈ្មោះ ម្រាស់ ក្លើក ភេទប្រុស អាយុ៥០ឆ្នាំជនជាតិភាគតិចព្នងជាឪពុកក្មេក និងកូនប្រសាឈ្មោះ ក្លិក ក្លើប បានធ្វើដំណើរមកស្នាក់ការនៃសមាគមអាដហុកខេត្តមណ្ឌលគិរី ដើម្បីធ្វើពាក្យបណ្តឹងសុំជួយអន្តរាគមន៍លើឈ្មោះ ក្រោន ស្រើល តួនាទីក្រុមប្រឹក្សាសង្កាត់រមនា ក្រុងសែនមនោរម្យ និងប្រពន្ធឈ្មោះ ណាន យេន រំលោភយកដីចម្ការវិលជុំដោយខុសច្បាប់និងគំរាមកំហែងដោយប្រើប្រាស់ប្រព័ន្ធតុលាការ។
បុគ្គលិកអង្គការអាដហុកបានលើកឡើងថា ដោយអ្នកទាំងពីរនាក់រៀបរាប់អង្គហេតុដូចតទៅ កាលពីឆ្នាំ២០១៣ កូនស្រីគាត់ឈ្មោះ សេង នី បានរៀបការជាមួយឈ្មោះ ក្លិក ក្លើប នៅភូមិពូតាំង សង្កាត់រមនា ក្រុងសែនមនោរម្យ ខេត្តមណ្ឌលគិរី។ ជនរងគ្រោះបានលើកឡើងថា បន្ទាប់ពីរៀបការរួច យើងខ្ញុំបានចុះទៅធ្វើស្រែនៅត្រើយខាងលិចអូរទេ។ ចំណែកដីចម្ការវិលជុំរបស់យើងខ្ញុំនៅត្រើយខាងកើតពុំត្រូវបានចុះទៅធ្វើនោះទេ ពីព្រោះដីតំបន់នេះទុកឲ្យមានជីជាតិឡើងវិញដោយសារតែអាក់ខានធ្វើតាំងពីឆ្នាំ២០០៣មកម្ល៉េះ។
គ្រួសាររងគ្រោះបាននិយាយថាលុះដល់អំឡុងឆ្នាំ២០១៥ដីដែលទុកចោលត្រូវបានឈ្មោះ ក្រោន ស្រើល ជាសមាជិកសង្កាត់រមនា បានដឹកនាំកូនចៅចុះទៅកាប់ឆ្ការរំលោភយកដី តែត្រូវបានយើងខ្ញុំចុះទៅហាមឃាត់ ហើយប្រាប់ថាដីដែលកាប់រួចយើងខ្ញុំឲ្យធ្វើចុះ។ ចំណែកឈ្មោះ ក្រោន ស្រើល ក៏ផ្អាកសកម្មភាពស្រាប់តែបានរយៈពេល២ទៅ៣ថ្ងៃ យើងខ្ញុំក៏ចុះទៅពិនិត្យម្តងទៀតក៏ឃើញឈ្មោះ ក្រោន ស្រើល ដាក់កម្លាំងចុះទៅកាប់ឆ្ការបន្តទៀតដដែល ពេលនោះយើងខ្ញុំនិយាយថា បើអ៊ុំឯងនៅកាប់ខាងខ្ញុំក៏កាប់ដែរព្រោះដីនេះជារបស់យើងខ្ញុំធ្លាប់ធ្វើពីមុនមក(ដីចម្ការវិលជុំ)។ គ្រួសាររងគ្រោះអះអាងថា ដោយខ្លាចឈ្មោះ ក្រោន ស្រើល កាប់យកដីអស់ ម្យ៉ាងពុំមានដីឯណាធ្វើស្រែចម្ការទៀតផង យើងខ្ញុំក៏ចុះកាប់ឆ្ការដណ្តើមដីគ្នាពេលនោះឈ្មោះ ក្រោន ស្រើល ក៏ផ្អាកសកម្មភាពកាប់។
គ្រួសារជនរងគ្រោះបានលើកឡើងថា ចំណែកយើងខ្ញុំនៅបន្តកាប់ឆ្ការ និងដុតឈើដែលកាប់រួចនៅដីតែម្តងបានរយៈពេលប្រហែល៣ខែដើមឆ្នាំ២០១៦ ស្រាប់តែឈ្មោះ ក្រោន ស្រើល ប្តឹងយើងខ្ញុំទៅសាលាសង្កាត់រមនា ដោយចោទយើងខ្ញុំបាទថា បានរំលោភយកដីគាត់ទៅវិញ ហើយខាងអាជ្ញាធរសង្កាត់បានកោះហៅយើងខ្ញុំឲ្យទៅដោះស្រាយគ្នា។ គ្រួសារជនរងគ្រោះបាននិយាយថា តែមុនពេលចូលទៅដោះស្រាយនៅសាលាសង្កាត់ យើងខ្ញុំរួមទាំងភាគីម្ខាងទៀតឈ្មោះ ក្រោន ស្រើល និងប្រពន្ធចៅសង្កាត់ នគរបាលប៉ុស្តិ៍សរុប៧នាក់បានចុះទៅពិនិត្យលើដីទីតាំងទំនាស់ជាក់ស្តែង ហើយខាងភាគីអាជ្ញាធរបាននិយាយថា ឲ្យយើងខ្ញុំទាំងពីរភាគីដោះស្រាយគ្នា។
លុះបានបន្តិចក៏នាំគ្នាទៅដោះស្រាយនៅសាលាសង្កាត់ ឈ្មោះ ក្រោនស្រើល បានឯកភាពប្រគល់លុយចំនួន១លានរៀលឲ្យមកយើងខ្ញុំជាថ្នូរនឹងការប្រគល់ដីទីតាំងនោះឲ្យទៅគាត់ ប៉ុន្តែយើងខ្ញុំមិនយល់ព្រម។ បន្ទាប់ពីការដោះស្រាយគ្នាលើកទី១មិនត្រូវរ៉ូវគ្នាមក យើងខ្ញុំក៏បានឲ្យអ្នកស្គាល់គ្នាឈ្មោះ ណារ៉ូ ជួលមន្ត្រីចុចGPS កំណត់ទំហំដីឃើញថាមានទំហំ១ហិកតា៤៨អា ហើយបានចេញទំហំជាឯកសារឲ្យថែមទៀតផង។ ប៉ុន្តែមិនមានអាជ្ញាធរទទួលស្គាល់នោះទេ បានរយៈពេលប្រហែល២ ខែខាងសង្កាត់ក៏ហៅយើងខ្ញុំទៅម្តងទៀត ដើម្បីដោះស្រាយគ្នាតែនៅមិនឯកភាពគ្នាដដែល ហើយខាងភាគីអាជ្ញាធរបាននិយាយបើមិនឯកភាពគ្នាទេនឹបញ្ជូនរឿងនេះទៅថ្នាក់លើជាមិនខាន។
ស្រាប់តែនៅថ្ងៃទី១៨ ខែកក្កដា ឆ្នាំ២០១៦កន្លងទៅថ្មីៗនេះ យើងខ្ញុំត្រូវបានតុលាការកោះហៅឲ្យចូលឆ្លើយបំភ្លឺរឿងភាគីឈ្មោះ ក្រោន ស្រើល ប្តឹងចោទប្រកាន់យើងខ្ញុំថាបានបំផ្លិចបំផ្លាញទ្រព្យសម្បត្តិរបស់គាត់ទៅវិញ។ គ្រួសារជនរងគ្រោះនៅពេលចូលឆ្លើយបំភ្លឺយើងខ្ញុំបានឆ្លើយថារឿងឈ្មោះ ក្រោន ស្រើល ចោទប្រកាន់នេះយើងខ្ញុំមិនបានបំផ្លិចបំផ្លាញដូចការចោទប្រកាន់នោះទេ។ រឿងដុតចម្ការគឺយើងខ្ញុំបានដុតប្រាកដមែន តែដុតសំអាតខាងចម្ការខ្ញុំនោះទេ។ តែភ្លើងឆេះរាលដាលដល់ចម្ការរបស់គាត់ដែលភាគីខ្ញុំប្រគល់ដីឲ្យនោះគឺឆេះបានបន្តិចបន្តួច ហើយយើងខ្ញុំបាននាំគ្នាពន្លត់ទាន់ពេលវេលា។
គ្រួសារជនរងគ្រោះលើកឡើងថា ចំពោះការឆ្លើយបំភ្លឺនេះយើងខ្ញុំបានឆ្លើយរឿងហេតុដូចការរៀបរាប់ខាងលើ ហើយខាងតុលាការក៏អនុញ្ញាតឲ្យយើងខ្ញុំត្រឡប់មកផ្ទះវិញ។សំណូមពរ ១.ស្នើសុំអង្គការអាដហុកជួយអន្តរាគមន៍ ស្វែងរកយុត្តិធម៌ ២.ស្នើសុំឲ្យឈ្មោះ ក្រោន ស្រើល ប្រគល់ដីដែលរំលោភយកមកឲ្យយើងខ្ញុំវិញ ៣.ប្តឹងឈ្មោះ ក្រោន ស្រើល ទៅស្ថាប័នពាក់ព័ន្ធដើម្បីផ្តន្ទាទោសទៅតាមច្បាប់ ៤.ទាមទារជំងឺចិត្តចំនួន៦០០០ដុល្លារ (ប្រាំមួយពាន់ដុល្លារអាមេរិក) ៥.ស្នើសុំអង្គការអាដហុកជួយតាមដានឃ្លាំមើលស៊ើបអង្កេតករណីនេះ៕
ចែករំលែកព័តមាននេះ