រថយន្តដឹកទំនិញ ថយដាក់ទំនិញចូលឃ្លាំងផុងបែកលូ
ខេត្តស្វាយរៀង ៖ មានរថយន្តដឹកទំនិញធុនយក្សមួយគ្រឿងម៉ាកហ៊ីយ៉ាន់ដាយ ពណ៌ខៀវពាក់ស្លាកលេខ ភ្នំពេញ 3C-3527 មានផ្ទុកទំនិញពេញទ្រុងប្រមាណជា៣០តោន ថយចូលដាក់ទំនិញក្នុងឃ្លាំង
ខេត្តស្វាយរៀង ៖ មានរថយន្តដឹកទំនិញធុនយក្សមួយគ្រឿងម៉ាកហ៊ីយ៉ាន់ដាយ ពណ៌ខៀវពាក់ស្លាកលេខ ភ្នំពេញ 3C-3527 មានផ្ទុកទំនិញពេញទ្រុងប្រមាណជា៣០តោន ថយចូលដាក់ទំនិញក្នុងឃ្លាំងបណ្តាលឲ្យស្រុតផុងដី បែកលូបង្ហូរទឹក មួយកង់ កាលពីវេលាម៉ោង៣និង៥០នាទីថ្ងៃទី២៦ កក្កដា ២០១៦ នៅលើកំណាត់ ស្ថិតនៅភូមិស្រះវង្ស សង្កាត់ស្វាយរៀង ក្រុងស្វាយរៀង។ ទាក់ទិនករណីរថយន្តធុនយក្សថយដាក់ទំនិញបែកលូនេះដែរ មានម្ចាស់ទំនិញម្នាក់ចេញមក អះអាងថា គាត់បានឲ្យម្ចាស់រថយន្ត ថយចូលខាងមុខឃ្លាំង ដើម្បីលើកអីវ៉ាន់ចុះដាក់ចូលក្នុងឃ្លាំង ក៏ប៉ុន្តែដោយសារមានភ្លៀងធ្លាក់បណ្តាលឲ្យដីជ្រាយ ម្យ៉ាងទៀតមន្ទីរសាធារណៈការ និងដឹកជញ្ជូនខេត្ត ទើបកាយដាក់លូថ្មីៗ ធ្វើឲ្យដីមិនទាន់ហាប់ពេលថយរថយន្តទៅក៏ផុងតែម្តង ទើបបណ្តាលឲ្យបែកលូ លោកជាម្ចាស់ផ្ទះមិនឲ្យអាជ្ញាធរពិបាកទេគឺ ខ្លួននឹងជួសជុលសងវិញ។
ចំពោះករណីខាងលើនេះដែរ លោកសំសាវុធប្រធានមន្ទីរសាធារណៈការនិងដឹកជញ្ជូនខេត្តបានឲ្យមន្ត្រីជំនាញចុះទៅពិនិត្យមើលជាក់ស្តែង បើបែកលូលោកនឹងឲ្យម្ចាស់រថយន្ត និងម្ចាស់ទំនិញធ្វើកិច្ចសន្យា ជួសជុលដាក់លូថ្មីវិញ។ លោកបន្តទៀតថា រថយន្តបង្កនេះផ្ទុកទំនិញលើសទម្ងន់កំណត់ ហើយបើតាមការពិនិត្យលើបច្ចេកទេសឃើញថា រថយន្តនេះកែច្នៃ តសាក់ស៊ីទៅក្រោយ និងតទ្រុងខុសបច្ចេកទេស នៃទ្រង់ទ្រាយប្រទេសផលិត។លោក សំ សាវុធ បន្តទៀតថា អាជ្ញាធរបានដាក់បម្រាម ហាមមិនអនុញ្ញាតឲ្យរថយន្តដឹកទំនិញធុនយក្សចរាចរណ៍ចូលក្នុងក្រុងស្វាយរៀងទេ គឺអនុញ្ញាតឲ្យរថយន្តធុនធ្ងន់ផ្ទុកទំនិញត្រឹមចំណុះ២០តោន ទើបឲ្យដឹកចូលក្នុងបេន ឬក្នុងក្រុង។ ចំពោះរថយន្តផ្ទុកទំនិញចាប់ពី២៥តោនឡើងទៅមិនអនុញ្ញាតបើកបរលើដងផ្លូវក្នុងក្រុងឡើយ។
ចំពោះរថយន្តកែច្នៃ តសាក់ស៊ី ឬ តទ្រុងខុសបច្ចេកទេសប្រទេសផលិត។ លោករដ្ឋមន្ត្រីក្រសួងសាធារណៈការ និងដឹកជញ្ជូនបានដាក់ឱសានវាទត្រឹមថ្ងៃទី១ សីហា ២០១៦ ឲ្យម្ចាស់រថយន្តយករថយន្តមកចូលយានដ្ឋានកាត់ទ្រុងដោយស្មគ្រ័ចិត្ត បើមិនព្រមយករថយន្តមកកាត់ទ្រុងទេនោះក្រសួងនឹងចាត់វិធានការក្តៅ ចាប់ឃាត់រថយន្តល្មើសទាំងអស់មកកាត់ទ្រុងហើយផាកពិន័យតាមច្បាប់ជាធរមាន។ បើតាមការពិនិត្យរថយន្តធុនធ្ងន់ដែលកែឆ្នៃតសាក់ស៊ី ឬតទ្រុងនៅតែធ្វើចរាចរណ៍តាមដងផ្លូវនិងផ្ទុកទំនិញលើសទម្ងន់ច្បាប់កំណត់ដដែល ហើយក៏មិនទាន់យករថយន្តមកកាត់ទ្រុងដែរដើម្បីសុវត្ថិភាពផ្លូវស្ពានថ្នល់ ក្រសួងគួរធ្វើប្រតិភូកម្មអំណាចឲ្យមន្ទីរតាមខេត្តបង្កើតគណកម្មការចុះចាប់ឃាត់រថយន្តល្មើសកាត់ទ្រុងទើបមានប្រសិទ្ធិភាព៕
ចែករំលែកព័តមាននេះ