រាជធានីភ្នំពេញ ៖ យុវជនម្នាក់ត្រូវបានកម្លាំងនគរបាលប៉ុស្ដិ៍ចោមចៅ ធ្វើការឃាត់ខ្លួន បន្ទាប់ពីក្រុមគ្រួសារ យុវជនម្នាក់ទៀត ដាក់ពាក្យបណ្ដឹងចោទប្រកាន់ថា បានរៀបគម្រោងស៊ីដាច់ម៉ូតូមិត្តភក្ដិ១គ្រឿង បានខ្ចីម៉ូតូស៊េរីទំនើប១គ្រឿងនោះ ឲ្យមិត្តភក្ដិផ្សេងទៀតជិះ បន្តហើយក៏ត្រូវបានមិត្តភក្ដិនោះ ក្បត់ទំនុកចិត្តយកម៉ូតូនោះជិះគេចខ្លួនទៅបាត់ស្រមោល កាលពីវេលាម៉ោង ១១យប់ថ្ងៃទី១៣ ខែកក្កដា ឆ្នាំ២០១៦ ក្នុងខណៈពេលដែលពួកគេចូលទៅសប្បាយ ភ្លើតភ្លើន នៅក្នុងក្លឹបឌីស្កូ មីតណាយ ដែលមានទីតាំងស្ថិតនៅ ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ បន្ទាប់មកក្រុមគ្រួសារម្ចាស់ម៉ូតូ បានដាក់ពាក្យបណ្ដឹងម្ដងរួចមកហើយ ប៉ុន្តែខាងក្រុមគ្រួសារយុវជនសង្ស័យ បានសុំពេលតាមរក ជនដែលយកម៉ូតូទៅនោះសិន។ ប៉ុន្តែតាមរករយៈពេល១០ថ្ងៃហើយ មិនឃើញទើប នៅវេលាម៉ោង១១ព្រឹកថ្ងៃទី២៥ ខែកក្កដា ឆ្នាំ២០១៦ នាំជនសង្ស័យទៅកាន់ប៉ុស្ដិ៍ចោមចៅ ដើម្បីឲ្យនគរបាលសាកសួរ ហើយនគរបាលក៏បាន ឃាត់ខ្លួនជននោះតែម្ដង។
ម៉ូតូដែលត្រូវបានគេបោកយកទៅបាត់នោះ ម៉ាកហុងដា MSX ពណ៌ខ្មៅលាយស ពាក់ស្លាកលេខភ្នំពេញ1DG-7725 ជាកម្មសិទ្ធិរបស់យុវជនឈ្មោះ គុជ បណ្ឌិត អាយុ១៦ឆ្នាំ ស្នាក់នៅក្នុងភូមិត្រពាំងថ្លឹង សង្កាត់ចោមចៅ។ ដោយឡែកជនសង្ស័យឈ្មោះ ជាង ជិនឡុង អាយុ២០ឆ្នាំ មុខរបរកម្មកររោងចក្រកាត់ដេរ មានស្រុកកំណើតនៅក្នុងភូមិខ្ពប ឃុំសំពៅពូន ស្រុកស្អាង ខេត្តកណ្ដាល។ យុវជនដែលជាម្ចាស់ម៉ូតូបានឲ្យដឹងថា នៅមុនពេលកើតហេតុ កាលពីវេលាម៉ោង១១យប់ថ្ងៃទី១៣ ខែកក្កដា ឆ្នាំ២០១៦ ជនសង្ស័យបានបបួលរូបគេ ចូលទៅផឹកស៊ីសប្បាយ នៅក្នុងក្លឹបកំសាន្តឌីស្កូ មួយកន្លែងយីហោ មីតណាយ ដែលមានទីតាំងស្ថិតនៅ ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ដោយនៅក្នុងពេលនោះបានជិះម៉ូតូម្នាក់១គ្រឿង ម៉ាកហុងដាMSX ដូចគ្នា ប៉ុន្តែម៉ូតូរបស់គេស៊េរីខ្ពស់ជាង។ លុះពេលទៅដល់ក្នុងក្លឹបនោះ បានឃើញមិត្តភក្ដិជនសង្ស័យ ២នាក់ទៀតកំពុងស្ថិតនៅទីនោះស្រាប់ដែលឈ្មោះ ជាង ជិនឡុង បានណាត់មុនរួចទៅហើយ។ ប្រភពដដែលបានបន្តថា ក្រោយពេលផឹកអស់ស្រាបៀរជាច្រើនថូស្រវឹងរៀងៗខ្លួន ស្រាប់តែជនសង្ស័យខាងលើបានខ្ចីម៉ូតូរបស់ខ្លួន ឲ្យមិត្តភក្ដិម្នាក់ទៀតដែលរូបគេមិនស្គាល់(មិត្តភក្ដិជនសង្ស័យ)ជិះជូនគ្នាទៅផ្ទះ។ ខណៈនោះដោយសារតែទុកចិត្តលើជនស្ស័យឈ្មោះ ជាង ជិនឡុង ខ្លួនក៏បានព្រមឲ្យខ្ចីហើយជននេះគឺជាអ្នកយកកូនសោម៉ូតូពីរូបគេទៅឲ្យមិត្តភក្ដិរបស់ខ្លួន។ មិនតែប៉ុណ្ណោះជននោះក៏បានបបួលខ្លួនឲ្យទៅជាមួយដែរ ប៉ុន្តែដោយសារស្រវឹងខ្លួនមិនបានទៅជាមួយឡើយ បន្ទាប់មកពួកគេបាននាំគ្នាជិះម៉ូតូចេញទៅបាត់ ហើយខ្លួនបានអង្គុយចាំនៅក្នុងក្លឹបនោះ ចំណែកជនសង្ស័យក៏បានទៅជាមួយមិត្តភក្ដិរបស់គដែរ ដោយនិយាយថាខ្លាចមិត្តភក្ដិខ្លួនស៊ីដាច់ម៉ូតូនោះ។
យុវជនម្ចាស់ម៉ូតូបានឲ្យដឹងបន្តទៀតថា លុះដល់ពេលកើតហេតុទើបឃើញ តែជនសង្ស័យនោះត្រឡប់ទៅក្នុងក្លឹបនោះវិញម្នាក់ឯង រីឯមិត្តភក្ដិរបស់គេមិនបានឃើញឡើយ និងបានប្រាប់ថាម៉ូតូ របស់អានិតឯងបាត់ហើយ។ បន្ទាប់មកខ្លួន និងក្រុមគ្រួសារបាននាំគ្នាទៅដាក់ពាក្យបណ្ដឹង ហើយខាងជនសង្ស័យឈ្មោះ ជាង ជិនឡុង ក៏បានជួយដើររក និងបានអះអាងថាខ្លួនក៏មានចំណែកខុសដែរព្រោះបានខ្ចីសោម៉ូតូនោះពីយុវជនរងគ្រោះ ឲ្យមិត្តភ្ដិខ្ចីយកទៅបាត់។ មិនតែប៉ុណ្ណោះបានធានាថា បើរកម៉ូតូនោះមិនឃើញទេគេនឹងលក់ម៉ូតូរបស់ខ្លួនសង លុះក្រោយពេលដើររករយៈពេល១០ថ្ងៃហើយមិនបានឃើញទើបខ្លួន និងក្រុមគ្រួសារ នាំខ្លួនជនសង្ស័យទៅប្រគល់ឲ្យនគរបាលប៉ុស្ដិ៍ចោមចៅសាកសួរ ហើយគរបាលក៏បានឃាត់ខ្លួននោះតែម្ដង។
ដោយឡែកជនសង្ស័យបានបដិសេធថា ខ្លួនមិនបានខ្ចីម៉ូទូនោះពីជនរងគ្រោះនោះឡើយ ហើយក៏មិនបានធានាថា សងនោះដែរ គឺជនរងគ្រោះបានឲ្យម៉ូតូទៅមិត្តភក្ដិខ្លួនខ្ចីដោយខ្លួនឯងប៉ុណ្ណោះ ហើយពេលនោះខ្លួនបានឲ្យ ជនរងគ្រោះនោះទៅជាមួយដែរ ប៉ុន្តែគេមិនព្រមទៅ ទើបខ្លួនទៅជាមួយអ្នកខ្ចីម៉ូតូ ព្រោះខ្លាចបាត់ម៉ូតូនោះ ប៉ុន្តែដោយសារតែពេលនោះម៉ូតូខ្លួនបែកកង់ ទើបជាឱកាសអ្នកដែលខ្ចីម៉ូតូជិះយកទៅបាត់ស្រមោលតែម្ដង ហើយដោយឃើញអាណិត ទើបខ្លួនជួយដើររកម៉ូតូ ហើយទីបំផុតក៏ត្រូវជាប់ចោទបែបនេះទៅវិញ៕
ចែករំលែកព័តមាននេះ