ខេត្តរតនគិរី ៖ ផ្ទះជួលមួយកន្លែងត្រូវបានអគ្គិភ័យឆាបឆេះអស់ទាំងស្រុង និងផ្ទះអ្នកជិតខាង២ខ្នងទៀត ត្រូវឆេះរោលៗជញ្ជាំងមួយចំហៀង ហើយករណីនេះសង្ស័យបណ្តាលមកពីឆ្លងចរន្តអគ្គិសនី ។ ហេតុការណ៍ឆេះផ្ទះល្វែងជួលនេះបានកើតឡើង កាលពីវេលាម៉ោង៩និង១៥នាទីព្រឹកថ្ងៃទី១៤ កុម្ភៈ ស្ថិតក្នុងភូមិទេសអន្លុង សង្កាត់បឹងកន្សែង ក្រុងបានលុង ខេត្តរតនគិរី ។
លោកវរៈសេនីយ៍ឯក ហួត បូរី អធិការនគរបាលក្រុងបានលុងថា ហេតុការណ៍អគ្គីភ័យឆាបឆេះផ្ទះជួលខាងលើនោះអាចបណ្តាលមកពីឆ្លងចរន្តអគ្គិសនី។ នៅក្នុងប្រតិបត្តិការជួយពន្លត់នោះ ក៏មានកម្លាំងនគរបាលបានប្រើប្រាស់រថយន្តពន្លត់ដោយបាញ់ទឹកអស់៩រថយន្ត ទើបគ្រប់គ្រងសភាពបានជាស្ថាពរ ។
លោកអធិការក្រុងបន្តថា ម្ចាស់ផ្ទះជួលមួយល្វែងនេះ ឈ្មោះ ហ៊ូ សុី វត្ថា ភេទស្រី អាយុ៦០ឆ្នាំ ហើយផ្ទះដែលឆេះនោះ មានទំហំ៥ម៉ែត្រ x ៣៥ម៉ែត្រ ស្មើនិង៧បន្ទប់ ចំណែក២ខ្នងទៀត គ្រាន់តែឆេះរោលៗជញ្ជាំងតែប៉ុណ្ណោះ។
ករណីខាងលើនេះដែរ លោកវរសេនីយ៍ឯក ហួត បូរី អធិការនគរបាលក្រុងបានលុងក៏បានអំពាវនាវដល់បងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្នផង មុនពេលចាកចេញពីផ្ទះ ឬទៅណាត្រូវពន្លត់ភ្លើងចង្រ្កាន និងបិទបារ៉ែតភ្លើងឱ្យបានត្រឹមត្រូវជាសវាងមានហេតុការណ៍នោះកើតឡើងជាយថាហេតុ ។ ក្នុងករណីអគ្គីភ័យខាងលើនេះ សមត្ថកិច្ចនៅមិនទាន់ដឹងពីការបាត់បង់ខូចខាត ទ្រព្យសម្បត្តិអស់ប៉ុន្មាននៅឡើយទេ ៕
ចែករំលែកព័តមាននេះ