រាជធានីភ្នំពេញ ៖ រដ្ឋសភាកម្ពុជា និងចិន បានគាំទ្រក្នុងការធ្វើកិច្ចសហប្រតិបត្តិការរបស់រដ្ឋាភិបាលប្រទេសទាំងពីរ។ នេះបើតាមការលើកឡើងក្នុងជំនួបពិភាក្សាការងាររវាងសម្តេច ហេង សំរិន ប្រធានរដ្ឋសភាកម្ពុជា ជាមួយលោក យូ ហ្សេងសេង (Yu Zhengsheng) ប្រធានក្រុមប្រឹក្សាពិគ្រោះយោបល់នយោបាយប្រជាជនចិនទូទាំងប្រទេសចិនរួចមក និងជួបពិភាក្សាការងារទ្វេភាគីជាមួយលោក ចាង តឺជាំង (Zhang Dejiang) ប្រធានសភាប្រជាជនចិនទូទាំងប្រទេស ពេលដំណើរទស្សនកិច្ចជាផ្លូវការនៅប្រទេសចិន ។
យោងតាមទំព័រហ្វេសប៊ុករដ្ឋសភាបានឲ្យដឹងថា នៅក្នុងជំនួបនេះ ថ្នាក់ដឹកនាំស្ថាប័ននីតិប្បញ្ញត្តិប្រទេសទាំងពីរមានសេចក្តីសោមនស្សរីករាយក្នុងការគាំទ្រចំពោះវឌ្ឍនភាពនៃកិច្ចសហប្រតិបត្តិការរវាងរដ្ឋាភិបាលកម្ពុជា-ចិន ទាំងវិស័យនយោបាយការទូត សេដ្ឋកិច្ច ពាណិជ្ជកម្ម វប្បធម៌ ទេសចរណ៍ និងកិច្ចសហប្រតិបត្តិការដទៃទៀត សំដៅនាំមកនូវឧត្តមប្រយោជន៍ទៅវិញទៅមក។
សម្តេច ហេង សំរិន បានលើកឡើងពីការអភិវឌ្ឍសេដ្ឋកិច្ចសង្គមរបស់ប្រទេសកម្ពុជា ក្នុងរយៈពេលជាងមួយទសវត្សរ៍ចុងក្រោយនេះ ជម្រាបដល់ភាគីចិន ដោយបានគូសបញ្ជាក់ ថា កម្ពុជាសម្រេចបានកំណើនសេដ្ឋកិច្ចថេរ ជាមធ្យមក្នុងរង្វង់ ៧% ក្នុង១ឆ្នាំ។ ឆ្នាំ២០១៦ នេះ សេដ្ឋកិច្ចកម្ពុជា អាចនឹងសម្រេចបានកំណើនក្នុងរង្វង់ ៧,១% អត្រានៃភាពក្រីក្រ នឹងត្រូវបានកាត់បន្ថយនៅក្រោម ១៣% កម្រិតជីវភាពរស់នៅរបស់ប្រជាជនទូទៅ ត្រូវបានលើកកម្ពស់ពីមួយឆ្នាំទៅមួយឆ្នាំ។
សម្តេចបន្តថា ការរីកចម្រើនផ្នែកសេដ្ឋកិច្ចនេះ មិនអាចកាត់ផ្តាច់បានពីការរួមចំណែកដ៏ធំធេងក្នុងការជួយឧបត្ថម្ភគាំទ្ររបស់ប្រទេសចិន ទាំងហិរញ្ញទានឥតសំណង និងកម្ចីសម្បទាននោះទេ។ ក្នុងនាមរដ្ឋសភាសម្តេចបានគាំទ្រ និងវាយតម្លៃខ្ពស់ចំពោះគំនិតផ្តួចផ្តើមរបស់ប្រធានាធិបតី ស៊ី ជិនពីង នូវគោលនយោបាយខ្សែក្រវាត់មួយ ផ្លូវសេដ្ឋកិច្ចសូត្រ និងការបង្កើតធនាគារ វិនិយោគហេដ្ឋារចនាសម្ព័ន្ធអាស៊ី ដែលជានយោបាយតភ្ជាប់បណ្តាប្រទេសក្នុងតំបន់អាស៊ានទាំងមូល។ ទាំងនេះមិនត្រឹមតែបានរួមចំណែកដល់ការថែរក្សាសន្តិភាព ស្ថិរភាព សន្តិសុខ និងកិច្ចសហប្រតិបត្តិការជិតស្និទ្ធប៉ុណ្ណោះទេ ប៉ុន្តែធានាបាននូវការអភិវឌ្ឍ និងវិបុលភាពទាំងអស់គ្នាសម្រាប់បណ្តាប្រទេសតាមបណ្តោយខ្សែក្រវាត់វិថីសូត្រ រួមទាំងកម្ពុជផងដែរ។
ចំណែកលោក ចាង តឺជាំង ប្រធានសភាប្រជាជនចិនទូទាំងប្រទេសបានមានប្រសាសន៍ថា ប្រទេសចិនបានជួយអភិវឌ្ឍន៍ប្រទេសកម្ពុជាតាមរយៈរាជរដ្ឋាភិបាលកម្ពុជា ក្នុងការលើកកម្ពស់ជីវភាពប្រជាជនកម្ពុជា។ លោកបានលើកឡើងថា កម្ពុជាជាប្រទេសដែលមានសក្តានុពលសេដ្ឋកិច្ច ទេសចរណ៍ និងវប្បធម៌។ ទោះបីមិនធ្លាប់អញ្ជើញមកទស្សនាប្រទេសកម្ពុជាដោយផ្ទាល់ក៏ដោយ ប៉ុន្តែលោកប្រធានសភាបានដឹងពីការអភិវឌ្ឍ និងការរីកចម្រើនរបស់កម្ពុជា។
ឆ្លើយតបការអញ្ជើញរបស់សម្តេច ហេង សំរិន លោក ចាង តឺជាំង នឹងរកពេលវេលាសមស្របណាមួយមកបំពេញទស្សនកិច្ចផ្លូវការ និងមិត្តភាពនៅកម្ពុជានាពេលខាងមុខ។
ចែករំលែកព័តមាននេះ