ខេត្តតាកែវ ៖ សេចក្តីរាយការណ៍បន្តឱ្យដឹងថា កាលពីព្រឹកថ្ងៃទី២៦ កក្កដា ២០១៦ កម្លាំងសមត្ថកិច្ចបាននាំឃាតករស្រី ដើម្បីទៅធ្វើត្រាប់ក្នុងការសម្លាប់មិត្តភក្តិរបស់ខ្លួន នៅឯមណ្ឌលទេសចរណ៍ទន្លេបាទីនោះ តែត្រូវសមត្ថកិច្ចប្តូរផែនការវិញ ព្រោះខណៈដែលកំពុងនាំនាងទៅកន្លែងកើតហេតុ ដែលមិនទាន់ដើរទៅដល់ផង ស្រាប់តែប្រជាពលរដ្ឋរាប់រយនាក់ បានមកព័ទ្ធចង់ដណ្តើមនារីសង្ស័យពីដៃសមត្ថកិច្ច ដើម្បីវាយសម្លាប់វិញ ឱ្យសមទៅនឹងទង្វើរបស់នាងនោះ ។ ផ្អើលរាប់រយនាក់នៅទន្លេបាទី ចង់ឃើញត្រាប់ឃាតករស្រីដ៏សាហាវ
ប្រភពបន្តថា ដោយឃើញសភាពការណ៍មិនស្រួលបែបនេះ សមត្ថកិច្ចបាននាំឃាតករស្រីនោះឡើងលើរថយន្តវិញ រួចបើកចេញពីកន្លែងមណ្ឌលទេសចរណ៍ទន្លេបាទីភ្លាមៗដែរ ។
ប្រភពពីលោកវរសេនីយ៍ទោ សែម សុជាតិ នាយការិយាល័យព្រហ្មទណ្ឌកម្រិតធ្ងន់ខេត្តឱ្យដឹងថា ពេលនេះ កម្លាំងរបស់លោកបាននាំខ្លួននារីសង្ស័យ ទៅយកម៉ូតូនៅកន្លែងបញ្ចាំក្នុងរាជធានីភ្នំពេញ ។ តែនៅមិនទាន់ដឹងនៅឡើយទេ ចំពោះកន្លែងលក់ទូរស័ព្ទ នៅក្រុងតាខ្មៅ ខណៈប៉ូលិសទៅសួរនាំ ត្រូវអ្នកលក់ប្រាប់ថា គាត់បានលក់ទៅឱ្យអ្នកផ្សេងបាត់ទៅហើយ ។
គួររំលឹកថា ទីបំផុត ស្ត្រីជាជនដៃដល់ត្រូវនគរបាលខេត្តតាកែវ សហការជាមួយនគរបាលខេត្តកំពតចាប់ខ្លួនបាន និងបញ្ជូនមកកាន់ស្នងការដ្ឋាននគរបាលខេត្ត ។
ស្ត្រីរូបនេះ គឺជាឃាតករ ដែលបានកាប់នារីម្នាក់ស្លាប់នៅមណ្ឌលទេសចរណ៍ទន្លេបាទី នាពេលថ្មីៗកន្លងទៅ ហើយរត់ទៅលាក់ខ្លួននៅផ្ទះឪពុកក្នុងខេត្តកំពត និងត្រូវចាប់ខ្លួនបាន កាលពីថ្ងៃទី២៥ កក្កដា វេលាម៉ោង០៤ និង៥០នាទីរសៀល ស្ថិតនៅភូមិត្រពាំងចក ឃុំភ្នំកុង ស្រុកអង្គរជ័យ ខេត្តកំពត ។
លោកវរសេនីយ៍ទោ សែម សុជាតិ នាយការិយាល័យនគរបាលព្រហ្មទណ្ឌកម្រិតធ្ងន់ខេត្តបានឱ្យដឹងថា ស្ត្រីដែលត្រូវបានចាប់ខ្លួននេះឈ្មោះសាត មករា ហៅនី អាយុ២៥ឆ្នាំ មុខរបរមិនពិតប្រាកដ រស់នៅភូមិត្រពាំងលាន ឃុំចំបក់ ស្រុកបាទី សព្វថ្ងៃស្នាក់នៅផ្ទះជួលក្នុងភូមិព្រែកហូរ សង្កាត់ព្រែកហូរ ក្រុងតាខ្មៅ ខេត្តកណ្តាល ។
លោកនាយការិយាល័យបន្តថា កាលពីថ្ងៃទី២០ កក្កដា ស្ត្រីរូបនេះបានសម្លាប់នារីជាមិត្តភក្តិម្នាក់ នៅលើផ្ទះទឹកក្នុងមណ្ឌលទេសចរណ៍ទន្លេបាទី ស្ថិតក្នុងភូមិបាទី ឃុំក្រាំងធ្នង់ ស្រុកបាទី ហើយរុញសពនាងទម្លាក់ទៅក្នុងទឹក រួចជិះម៉ូតូរត់គេចខ្លួនបាត់រហូតដល់ថ្ងៃចាប់ខ្លួន ។
លោកនាយការិយាល័យបញ្ជាក់ថា ពេលនេះ យើងកំពុងធ្វើការសាកសួរ និងមិនទាន់ដឹងពីមូលហេតុនៃការសម្លាប់បែបណានោះទេ តែ គឺស្ត្រីសង្ស័យនេះ ពិតជាឃាតករហើយ ។
គួរបញ្ជាក់ទៀតថា កាលពីមុននេះ ឪពុករបស់នារីរងគ្រោះបានច្រានចោលថា ការសម្លាប់នោះ មិនមែនដោយសារស្នេហាភេទដូចគ្នាទេ តែជាអំពើប្លន់ ។ ទោះជាបែបណា សមត្ថកិច្ចមិនទាន់បានចម្លើយពីស្ត្រីសង្ស័យរូបនេះនៅឡើយទេ ។
ចែករំលែកព័តមាននេះ