ខេត្តកំពង់ចាម ៖ ក្រុមគ្រួសារ និងសាច់ញាតិក្មេងស្រីឈ្មោះ ខុន ស៊ាងឡេង អាយុ២ឆ្នាំ ដែលបានស្លាប់ក្រោមផ្លែដាវរបស់ក្រុមក្មេងទំនើងមួយក្រុមមានគ្នា៣នាក់ បានទន្ទឹងរង់ចាំភាពយុត្តិធម៌ពីស្ថាប័នតុលាការជាង១ឆ្នាំមកហើយ ហើយសំណង១ម៉ឺនដុល្លារក៏ទាន់បានទៀត ។
សូមបញ្ជាក់ថា លោក ខៀវ សន ប្រធានក្រុមប្រឹក្សាជំនុំជំរះ លោក សែត វិសិដ្ឋមុនី ចៅក្រមប្រឹក្សា លោក សោ សុតា ចៅក្រមប្រឹក្សា និងលោក ស៊ន មុនី ព្រះរាជអាជ្ញារង កាលពីព្រឹកថ្ងៃទី២៦ ខែកក្កដា ឆ្នាំ២០១៦ បន្ទាប់សាលាដំបូងខេត្តបានបើកសវនាការកាត់ក្តីរឿងឃាតកម្មលើក្មេងស្រីអាយុ២ឆ្នាំខាងលើនេះ បាននាំគ្នាចេញពីសាលប្រជុំទៅពិភាក្សានៅខាងក្រៅមួយសន្ធុះ លុះពេលនាំគ្នាចូលមកវិញ បានទាមទារឲ្យមានសាក្សី២នាក់ចូលរួមនៅពេលសវនាការកាត់ក្តីលើឈ្មោះ ស៊ន់ ផល ភេទប្រុស អាយុ១៩ឆ្នាំ ជាមួយនោះសូមឲ្យកម្លាំងសមត្ថកិច្ចបន្តធ្វើការស៊ើបអង្កេតបន្ថែមទៀត ដើម្បីរកភស្តុតាងដាក់បន្ទុក ។
សូមរំលឹកថា ក្មេងស្រីក្មេងស្រីរងគ្រោះខាងលើបានស្លាប់យ៉ាងអាណោចអាធ័មកាលពីវេលាម៉ោង៧យប់ ថ្ងៃទី១៤ ខែមេសា ឆ្នាំ២០១៥ លើផ្លូវក្រាលគ្រួសក្រហម ស្ថិតក្នុងភូមិត្រពាំងកក់ ឃុំអូរស្វាយ ស្រុកកំពង់សៀម ដោយសារក្មេងស្ទាវ៣នាក់បានជិះម៉ូតូយ៉ាងលឿនមកដល់ដកដាវចាក់សំដៅឈ្មោះ សច្ចារ ភេទប្រុស អាយុ១៨ឆ្នាំ តែបុរសឈ្មោះ សច្ចារ បានគេចទាន់ពេលវេលា បែរជាទៅត្រូវក្មួយស្រីតូចអាយុ២ឆ្នាំ ដែលបងស្រីកំពុងតែពរ បណ្ដាលឲ្យខ្ទាតប្លោងទៅទើរនឹងគម្ពោធព្រៃស្លាប់យ៉ាងអាណោចអាធ័ម ដោយត្រូវដាវដោតជាប់នៅក្រោមឃ្លៀកឆ្វេងធ្លុះពីម្ខាងទៅម្ខាង ។
អ្នកស្រី ស៊ាង ហ៊ត់ អាយុ៣០ឆ្នាំ ត្រូវជាម្តាយក្មេងស្រីដែលស្លាប់ខាងលើ បានឲ្យដឹងថា បន្ទាប់ពីកើតហេតុអ្នកស្រីបានសូមឲ្យសមត្ថកិច្ចតាមស្រាវជ្រាវចាប់ក្រុមឃាតករមកផ្តន្ទាទោសឲ្យបានធ្ងន់ធ្ងរបំផុត ព្រមទាំងទាមទារសំណងជំងឺចិត្តចំនួន១ម៉ឺនដុល្លារផងដែរ ។
លោកវរសេនីយ៍ទោ ប៉ាក ជាតិ អតីតអធិការនគរបាលស្រុកកំពង់សៀម បានឲ្យដឹងថា រហូតមកដល់ព្រឹកថ្ងៃទី១៥ ខែមេសា សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ ស៊ន់ ផល ភេទប្រុស អាយុ១៩ឆ្នាំ នៅភូមិត្រពាំងកក់ ឃុំអូរស្វាយ ស្រុកកំពង់សៀម ដោយចោទប្រកាន់ពីបទឃាតកម្មមានស្ថានទម្ងន់ទោស ហើយត្រូវបាននាំខ្លួនមកកាន់អធិការដ្ឋានគរបាលស្រុកកំពង់សៀមដើម្បីសួរនាំ ។
ឈ្មោះ ស៊ន់ ផល ដែលរងការចោទប្រកាន់ បាននិយាយថា ក្នុងថ្ងៃកើតហេតុខាងលើរូបគេមិនបាននៅកន្លែងកើតហេតុឡើយ គឺនៅហាងម្លប់សណ្តាន់ ឃុំទន្លេបិទ ស្រុកត្បូងឃ្មុំ ហើយសូមឲ្យតុលាការខេត្តជួយផ្តល់ភាពយុត្តិធម៌ និងដោះលែងរូបគេឲ្យនៅក្រៅឃុំផង ព្រោះរូបគេបានជាប់ឃុំជាង១ឆ្នាំហើយ ៕
ចែករំលែកព័តមាននេះ