ខេត្តតាកែវ ៖ សេចក្តីរាយការណ៍បឋមឱ្យដឹងថា នារីជាឃាតករសម្លាប់មិត្តស្រីរបស់ខ្លួន នៅរមណីយដ្ឋានទន្លេបាទី កាលពីពេលកន្លងមក ត្រូវសមត្ថកិច្ចនាំខ្លួនបង្ហាញពីសកម្មភាពត្រាប់ក្នុងការសម្លាប់ដ៏សាហាវនេះ កាលពីវេលាព្រឹកថ្ងៃទី២៦ កក្កដា ២០១៦ ស្ថិតនៅចំណុចលើរោងលំហែកាយរមណីយដ្ឋានទន្លេបាទី ក្នុងភូមិថ្នល់ទក្សិណ ឃុំក្រាំងធ្នង់ ស្រុកបាទី ខេត្តតាកែវ ។
គួររំលឹកថា ឃាតករដែលសម្លាប់មិត្តស្រីរបស់ខ្លួន ត្រូវបានសមត្ថកិច្ចចាប់ខ្លួន កាលពីរសៀលថ្ងៃទី២៥ កក្កដា ២០១៦ នៅក្នុងផ្សារតានី ស្រុកអង្គរជ័យ ខេត្តកំពត ។
ស្ត្រីសង្ស័យដែលត្រូវឃាត់ខ្លួនឈ្មោះសាត មករា ហៅស្រីនី អាយុ២៥ឆ្នាំ ស្នាក់នៅភូមិត្រពាំងលាន ឃុំចំបក់ ស្រុកបាទី ខេត្តតាកែវ ដោយយកសួរនាំនៅអធិការដ្ឋាននគរបាលស្រុកបាទី ខេត្តតាកែវ ។ ចំណែកនារីគ្រោះឈ្មោះជា សុជាតិអាយុ២២ឆ្នាំ ជា
និសិត្សឆ្នាំទី៣ ផ្នែកអក្សរសាស្ត្រអង់គ្លេស និងជាបុគ្គលិកបណ្ដែត នៃមន្ទីរទេសចរណ៍ខេត្តកណ្តាល និងជាគ្រូបង្រៀនភាសាអង់គ្លេសនៅសាលាអន្តរជាតិអាសា៑នៅភ្នំពេញ មានទីលំនៅបច្ចុប្បន្ននៅភូមិព្រែកសំរោង១ សង្កាត់តាខ្មៅ ក្រុងតាខ្មៅ ។
គួររំលឹកទៀតថា កាលពីវេលាម៉ោង១០ព្រឹក ថ្ងៃទី២០ កក្កដា ឆ្នាំ២០១៦ កន្លងមក មានហេតុការណ៍ភ្ញាក់ផ្អើលមួយនៅមណ្ឌលទេសចរណ៍ទន្លេបាទី ខណៈគេបានឃើញឈាមមនុស្សក្រហមច្រាលនៅលើកន្ទេល លើរោងលំហែកាយក្នុងទន្លេបាទី ស្ថិតនៅភូមិថ្នល់ទក្សិណ ឃុំក្រាំងធ្នង់ ស្រុកបាទី ខេត្តតាកែវ ហើយបានរាយការណ៍ទៅសមត្ថកិច្ចមកពិនិត្យ និងចុះរាវក្នុងទឹក ទើបបានប្រទះឃើញសាកសពនារីរងគ្រោះត្រូវគេកាប់ត្រង់ក្បាលជាច្រើនកាំបិត ច្រានទម្លាក់ចោលក្នុងទឹក ។
សមត្ថកិច្ចសន្និដ្ឋានថា ជាអំពើឃាតកម្មគិតទុកជាមុន ដែលឃាតករអាចជាអ្នកស្គាល់គ្នាជាមួយជនរងគ្រោះ ដោយបានរៀបចំផែនការបបួលជនរងគ្រោះទៅលេងនៅទន្លេបាទី ដែលជាថ្ងៃមិនមានមនុស្សទៅកម្សាន្តស្ងាត់ងាយស្រួលក្នុងធ្វើសកម្មភាពសម្លាប់ជនរងគ្រោះ ។
ចែករំលែកព័តមាននេះ