បន្តសវនាការ រឿងក្តីជួញដូរគ្រឿងញៀ.នឆ្លងដែនជិត៥៥ គីឡូក្រាម
រាជធានីភ្នំពេញ ៖ សាលាដំបូងរាជធានីភ្នំពេញ នៅរសៀលថ្ងៃទី២៥ កក្កដា នេះបានបន្តសវនាការ លើសំណុំរឿងក្តីជួញដូរគ្រឿងញៀ.នឆ្លងដែនជិត៥៥គីឡូក្រាម
រាជធានីភ្នំពេញ ៖ សាលាដំបូងរាជធានីភ្នំពេញ នៅរសៀលថ្ងៃទី២៥ កក្កដា នេះបានបន្តសវនាការ លើសំណុំរឿងក្តីជួញដូរគ្រឿងញៀនឆ្លងដែនជិត៥៥គីឡូក្រាម ដែលស្មើទឹកប្រាក់ជាង៣ លានដុល្លាររអាមេរិក និងឧបករណ៍កែច្នៃ ផលិត មកបើកសវនាការបន្តទៀត ។ លោក ពេជ្រ វិជ្ជាធរ ប្រធានក្រុមប្រឹក្សាជំនុំជម្រះ កាលពីព្រឹកថ្ងៃទី៦ កក្កដា ២០១៦ បានលើកយកសំណុំរឿងក្តីជួញដូរគ្រឿងញៀនឆ្លងដែនជិត៥៥គីឡូក្រាម ដែលស្មើទឹកប្រាក់ជាង៣ លានដុល្លាររអាមេរិក និងឧបករណ៍ កែច្នៃផលិត មកបើកសវនាការផ្តន្ទាទោសលើជនជាប់ចោទម្តងរួចមកហើយ។
ប៉ុន្តែការសារសួរដេញដោលលើជនជាប់ចោទ នៅមិនទាន់បានបញ្ចប់នៅឡើយទេ ដល់ម៉ោងសម្រាកប្រធានក្រុមប្រឹក្សាជំនុំជម្រះ បានប្រកាសលើកពេលសវនាការ សំណុំរឿងមួយនេះ ទៅថ្ងៃទី២៥ កក្កដា ២០១៦ វេលារសៀលបន្តទៀត ។ គួរបញ្ជាក់ទៀតថាសំណុំរឿងនេះមានជនជាប់ចោទ៤នាក់ ក្នុងនោះមានមេខ្លោងជួញដូរគ្រឿងញៀនដ៏ធំម្នាក់ និងបក្ខពួក៣នាក់ទៀត ត្រូវបាននគរបាលមន្ទីរប្រឆាំងគ្រឿងញៀនក្រសួងមហាផ្ទៃឃាត់ខ្លួន និងដកហូតថាំ្នញៀន បានប្រមាណជិត៥៥គីឡូក្រាម ។ នៅវេលាម៉ោង២រសៀលថ្ងៃទី២០ មិថុនា សមត្ថកិច្ចបានធ្វើសន្និសីទសារព័ត៌មានភ្លាមៗដែរ។
ដោយបង្ហាញមុខក្រុមជួញដូរគ្រឿងញៀនដ៏ធំសម្បើមនោះ មុនពេលបញ្ជូនទៅសាលាដំបូងរាជធានីភ្នំពេញ ។ ជនដែលត្រូវសមត្ថកិច្ចចាប់ខ្លួននោះមាន ១-ឈ្មោះ លីវ ស៊ឺ ភេទប្រុស អាយុជាង៤០ឆ្នាំ ជនជាតិចិន ជាមេខ្លោង ត្រូវចាប់ខ្លួននៅខេត្តស្ទឹងត្រែង និងត្រូវបញ្ជូនមកកាន់រាជធានីភ្នំពេញនៅយប់ថ្ងៃទី២១ មិថុនា ។ ២-ឈ្មោះ ផល រ៉ានី ហៅខេខេ ភេទស្រី អាយុ២២ឆ្នាំ ជាសង្សាររបស់ឈ្មោះ លីវ ស៊ឺ សា្នក់នៅផ្ទះជួល លេខ C១៩ ផ្លូវបេតុង សង្កាត់ជ្រោយចង្វា ខណ្ឌជ្រោយចង្វា ៣-ឈ្មោះ នី យ៉ុន ភេទប្រុស អាយុ៤២ឆ្នាំ ជនជាតិចិន មកស្នាក់នៅផ្ទះជួលក្បែរភោជនីយដ្ឋានម្លប់ស្វាយ៩៩ សង្កាត់ទួលស្វាយព្រៃ ខណ្ឌចំការមន និង៤-ឈ្មោះ តឹង យានភីង ភេទប្រុស អាយុ៥៣ឆ្នាំ ជនជាតិចិន ស្នាក់នៅផ្ទះជួល (អឹផាតមែន) បន្ទប់លេខ៧ ជាន់ទី៧ ផ្លូវលេខ៤៦០ សង្កាត់ទួលទំពូងទី១ ខណ្ឌចំការមន ។
លោកឧត្តមសេនីយ៍ត្រី សាន សុទ្ធី នាយករងមន្ទីរប្រឆាំងគ្រឿងញៀនក្រសួងមហាផ្ទៃឲ្យដឹងថា កាលពីថ្ងៃទី១៦ មិថុនា កម្លាំងសមត្ថកិច្ចការិយាល័យសម្អាតប្រាក់ ដឹកនាំដោយរូបលោកផ្ទាល់ ក្រោមការចង្អុលបង្ហាញពីសំណាក់លោកឧត្តមសេនីយ៍ឯក ម៉ក់ ជីតូ បានស្រាវជ្រាវបង្ក្រាបមុខសញ្ញាជួញដូរគ្រឿងញៀនចំនួន៤នាក់ ក្នុងនោះដកហូតបានថ្នាំញៀនប្រមាណជិត៥៥គីឡូក្រាម ។ លោក សាន សុទ្ធី បន្តថា ករណីបង្ក្រាបក្រុមជួញដូរគ្រឿងញៀនដ៏ធំមួយនេះ សមត្ថកិច្ចបានប្រឹងប្រែងស្រាវជ្រាវអស់រយៈពេលជិត៣ខែមកហើយទើបប្រមូលបានព័ត៌មាន និងឈានទៅដល់ការឃាត់ខ្លួនជនសង្ស័យ និងមេខ្លោង ។
ការឃាត់ខ្លួនក្រុមជួញដូរគ្រឿងញៀននេះដែរ កាលពីប៉ុន្មានថ្ងៃមុននេះ នគរបាលខេត្តស្ទឹងត្រែងបានឃាត់ខ្លួនជនឈ្មោះ លីវ ស៊ឺ ជាមេខ្លោងនៅខេត្តស្ទឹងត្រែង។ រូបគេជាប់ពាក់ព័ន្ធរឿងកាន់កាប់អាវុធដោយខុសច្បាប់ និងប្រើប្រាស់គ្រឿងញៀន ។ ក្រោយពីឃាត់ខ្លួនឈ្មោះ លីវ ស៊ឺ ជាមេខ្លោង សមត្ថកិច្ចក៏បានដាក់ការសង្ស័យថា ជននោះអាចជាប់ពាក់ព័ន្ធនឹងគ្រឿងញៀនថែមទៀត ។ អ្វីដែលធ្វើឲ្យសមត្ថកិច្ចមានការសង្ស័យ គឺផ្អែកតាមរូបភាពជាច្រើនដូចជា ស្ត្រីឈ្មោះ ផល រ៉ានី ហៅខេខេ ជាសង្សាររបស់គេតែងឡើងចុះពីភ្នំពេញទៅស្ទឹងត្រែង ដើម្បីជួបឈ្មោះ លីវ ស៊ឺ គឺ ១-ទៅធ្វើជាសួរសុខទុក្ខធម្មតា ២-ណែនាំប្រាប់ឲ្យមានការទំនាក់ទំនងជាមួយជនសង្ស័យជនជាតិចិន២នាក់ជាអ្នកលក់ដូរគ្រឿងញៀន ។
យោងលើការស្រាវជ្រាវតាមរយៈជនសង្ស័យជាមេខ្លោង និងស្ត្រីជាសង្សារ គឺសមត្ថកិច្ចបានកំណត់ និងដាក់ការសង្ស័យលើឈ្មោះ ផល រ៉ានី ហៅខេខេ ថា ពិតជាពាក់ព័ន្ធក្នុងករណីជួញដូរគ្រឿងញៀនដែរ ទើបមានការស្នើសុំទៅស្ថាប័នអយ្យការអមសាលាដំបូងរាជធានីភ្នំពេញ បើកការស៊ើបអង្កេតលើស្ត្រីម្នាក់នោះ ។ នៅថ្ងៃទី១៦ មិថុនា សមត្ថកិច្ចបានសុំគោលការណ៍ឃាត់ខ្លួនស្ត្រីឈ្មោះ ផល រ៉ានី មកសាកសួរ ។ នៅពេលឃាត់ខ្លួន សមត្ថកិច្ចបានដកហូតថ្នាំញៀនជាច្រើនគីឡូក្រាមនៅផ្ទះជនសង្ស័យ ដែលនោះបង្ហាញឲ្យកាន់តែច្បាស់ថា ពិតជាក្រុមជួញដូរគ្រឿងញៀនដ៏ធំប្រាកដមែន ។
ក្រោយពីឃាត់ខ្លួនស្ត្រីសង្ស័យ នៅយប់ថ្ងៃដដែលសមត្ថកិច្ចបានឈានទៅឃាត់ខ្លួនជនជាតិចិន២នាក់ទៀត ដែលជាមនុស្សមានទំនាក់ទំនងជាមួយឈ្មោះ លីវ ស៊ឺ និងនាង ផល រ៉ានី ជាសង្សារ ព្រមទាំងដកហូតថ្នាំញៀនបានច្រើនសន្ធឹកសន្ធាប់រហូតទៅដល់ជិត៥៥គីឡូក្រាម ។ ការបង្ក្រាបនោះមានសភាពស្ងៀមស្ងាត់បំផុត មិនបែកធ្លាយទៅណាទេ ។ ក្រោយពីឃាត់ខ្លួនជន៣នាក់ជាក្រុមជួញដូរគ្រឿងញៀននៅរាជធានីភ្នំពេញនេះ កាលព្រឹកថ្ងៃទី២០ មិថុនា សមត្ថកិច្ចបានកសាងសំណុំរឿង និងវត្ថុតាងបញ្ជូនទៅកាន់សាលាដំបូងរាជធានីភ្នំពេញ ដោយប្រើប្រាស់កម្លាំងការពារយ៉ាងប្រុងប្រយ័ត្នខ្ពស់ ។
លុះនៅវេលាម៉ោង២រសៀលថ្ងៃដដែល ទើបមានបញ្ជាពីថ្នាក់លើអនុញ្ញាតឲ្យលោកឧត្តមសេនីយ៍ឯក មាស វិរិទ្ធ អគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងលោកឧត្តមសេនីយ៍ឯក ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរងនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនក្រសួងមហាផ្ទៃ ធ្វើសន្និសីទសារព័ត៌មានរៀបរាប់ពីស្នាដៃដ៏ធំធេងដែលនគរបាលមន្ទីរប្រឆាំងគ្រឿងញៀន បង្ក្រាបក្រុមជួញដូរគ្រឿងញៀន និងមេខ្លោងដ៏ធំមិនធ្លាប់មានពីមុនមក។ សន្និសីទសារព័ត៌មានបានធ្វើនៅមន្ទីរប្រឆាំងគ្រឿងញៀនក្រសួងមហាផ្ទៃ ដោយមានអ្នកសារព័ត៌មានជាច្រើនចូលរួម ។ ក្នុងសន្និសីទបានបង្ហាញមុខជនសង្ស័យចំនួន៣នាក់ មានស្ត្រីម្នាក់ជាជនជាតិខ្មែរ និងបុរស២នាក់ជាជនជាតិចិនដីគោក រួមជាមួយវត្ថុតាងថ្នាំញៀនជិត៥៥គីឡូក្រាម ។
ស្ថិតនៅចំពោះមុខអ្នកសារព័ត៌មាន លោកឧត្តមសេនីយ៍ឯក ម៉ក់ ជីតូ មានប្រសាសន៍ថា ថ្ងៃនេះដោយបានការអនុញ្ញាតពីលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានឲ្យអាជ្ញាធរជាតិប្រយុទ្ធប្រឆាំងគ្រឿងញៀន និងព្រះរាជអាជ្ញាអមសាលាដំបូងរាជធានីភ្នំពេញ និងមានការចូលរួមពីលោក អ៊ិន បូរ៉ា ប្រធាននាយកដ្ឋានកណ្តាលនគរបាលយុត្តិធម៌ក្រសួងមហាផ្ទៃ បង្ហាញពីស្នាដៃនៃកិច្ចបង្ក្រាបក្រុមជួញដូរគ្រឿងញៀនដ៏ធំនេះ ដើម្បីជម្រាបជូនអ្នកសារព័ត៌មាន និងសាធារណជនបានជ្រាប ។
លោកបន្តថា បញ្ហាគ្រឿងញៀននៅកម្ពុជានេះ ក៏ដូចជានៅលើសាកលលោកមានការស្មុគស្មាញណាស់ ពិសេសនៅកម្ពុជាត្រូវបានមជ្ឈដ្ឋានជាតិ និងអន្តរជាតិយកចិត្តទុកដាក់បំផុត ក្នុងនោះរាជរដ្ឋាភិបាលបានដាក់បទបញ្ជាយ៉ាងច្បាស់លាស់ធ្វើយ៉ាងម៉េចទប់ស្កាត់ បង្ការ និងបង្ក្រាបគ្រឿងញៀនឲ្យបាន ។ លោកឧត្តមសេនីយ៍ឯក ម៉ក់ ជីតូ បន្តទៀតថា អស់លោកឃើញហើយ កន្លងមកនេះយើងចាប់ និងបង្ក្រាបតាំងពីការប្រើប្រាស់តូចតាច បានន័យថា អ្នកប្រើប្រាស់ក៏ចាប់ អ្នកជួញដូរក៏ចាប់ មិនមែនចាប់តែអ្នកប្រើតូចតាចដូចអ្នកកាសែតខ្លះថាទេ ។
ហេតុអ្វីបានជាចាប់អ្នកតូចតាច គឺព្រមានគាត់ ដើម្បីឲ្យគាត់ខ្លាចលែងហ៊ានប្រព្រឹត្តបទល្មើសគ្រឿងញៀននេះ ដែលនោះអ្នកប្រើប្រាស់១គ្រាប់ក៏មានទោស និងកន្លះគ្រាប់ក៏មានទោស ។ លោកឧត្តមសេនីយ៍ឯកបន្តថា កន្លងមកយើងបានបើកកិច្ចប្រតិបត្តិការមួយស្រាវជ្រាវករណីជួញដូរធំណាស់ មានរចនាសម្ព័ន្ធទំនាក់ទំនងពីខាងក្រៅចូលមកក្នុងពីក្នុងទៅក្រៅប្រទេសទៀត ។ កន្លងមកយើងបានប្រើប្រាស់កម្លាំងជំនាញស្រាវជ្រាវ និងមន្ត្រីអនុវត្តច្បាប់ប្រឹងប្រែង ទាំងអស់គ្នាស៊ើបអង្កេតរហូតដល់ថ្ងៃទី១៦ និង១៧ មិថុនា បានកំណត់ថា ត្រូវបំបែកសំណុំរឿង។
លោកអគ្គស្នងការរង ម៉ក់ ជីតូ បន្តថា ពេលនោះយើងបានចាប់ឃាត់ខ្លួនមនុស្ស៣នាក់ នៅលើគោលដៅ៥ ដកហូតវត្ថុតាងមានថ្នាំញៀនច្រើនគីឡូក្រាម សម្ភារសម្រាប់ច្នៃ ក្នុងនោះនាង ផល រ៉ានី ហៅខេខេ គឺជាប្រពន្ធ ឬសង្សារមេខ្លោងម្នាក់ទៀតដែលមិនទាន់យកមកដល់ ប៉ុន្តែបានរៀបចំឲ្យយកមកភ្នំពេញហើយ។ ចំណែកជនជាតិចិន២នាក់គឺ ឈ្មោះ នី យ៉ុង និងឈ្មោះ តឹង យានភីង គឺជាអ្នកបច្ចេកទេសមកពីស្រុកចិន អាចកែច្នៃ និងបង្កើនគុណភាពបរិមាណគ្រឿងញៀន ។ លោកអគ្គស្នងការរងបានបញ្ជាក់ទៀតថា សារធាតុគ្រឿងញៀនសុទ្ធ គឺបុរសចិន២នាក់នេះ គេយកទៅកែច្នៃបង្កើតពី១គីឡូក្រាមទៅ២,៣គីឡូក្រាម ហើយបើលេខ ឬពណ៌មិនសូវល្អ ខ្មៅ គេធ្វើឲ្យទៅជាស ដូចដែលបានដាក់បង្ហាញនេះ។ គ្រឿងញៀនដែលចាប់បាននេះជាប្រភេទមេតំហ្វេតាមីន (ម៉ាទឹកកក) មេតំហ្វេតាមីនគ្រាប់ ហើយនិងហេរ៉ូអ៊ីនជិត៥៥គីឡូក្រាម ។
ប្រតិបត្តិការនេះយើងបានសហការជាមួយស្នងការដ្ឋាននគរបាលរាជធានីភ្នំពេញ និងខេត្តស្ទឹងត្រែង ទើបបង្ក្រាបករណីនេះបាន ។ សួរថា តើថ្នាំញៀននេះមកពីណា ? ជម្រាបជូនថា នេះលំហូរចូលពីតំបន់ត្រីកោណមាសប្រទេសឡាវ និងកម្ពុជាយើងតាមខេត្តស្ទឹងត្រែងមកដល់ភ្នំពេញ ។ មកដល់ភ្នំពេញ ពួកនេះបានកែច្នៃបង្កើនបរិមាណពី៥០គីឡូក្រាមទៅ១០០គីឡូក្រាម ហើយបានបែងចែកលក់នៅក្នុងស្រុក និងបញ្ជូនទៅតៃវ៉ាន់។ នេះជាបណ្តាញពីក្រៅប្រទេសចូលមកក្នុងប្រទេស និងចេញទៅក្រៅប្រទេសវិញ ។
លោក ម៉ក់ ជីតូ បញ្ជាក់ជាចុងក្រោយថា នេះជាការបង្ក្រាបករណីជួញដូរដ៏ធំមួយក្នុងចំណោមការបង្ក្រាបក្រុមជួញដូរគ្រឿងញៀនកន្លងមក។ បន្ទាប់ពីប្រសាសន៍លោកឧត្តមសេនីយ៍ឯក ម៉ក់ ជីតូ លោកឧត្តមសេនីយ៍ឯក មាស វិរិទ្ធ បានបន្តបកស្រាយបន្ថែមជុំវិញសមត្ថកិច្ចមន្ទីរប្រឆាំងគ្រឿងញៀនបង្ក្រាបករណីជួញដូរគ្រឿងញៀនដ៏ធំនេះ ។ ក្រោយពីធ្វើសន្និសីទសារព័ត៌មានហើយ ជនសង្ស័យ និងវត្ថុតាងត្រូវបានបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី ។ ចំណែកមេខ្លោងឈ្មោះ លីវ ស៊ឺ ត្រូវផ្ទេរ និងបញ្ជូនពីខេត្តស្ទឹងត្រែង មកដល់ភ្នំពេញនៅយប់ថ្ងៃទី២១ មិថុនា៕
ចែករំលែកព័តមាននេះ