ខេត្តក្រចេះ ៖ សមត្ថកិច្ចនគរបាលបានឲ្យដឹងថា សមត្ថកិច្ចមានតម្រុយខ្លះៗហើយពីក្រុមជនសង្ស័យដែលបានធ្វើសកម្មភាពបាញ់ប្លន់ផ្ទះជនរងគ្រោះមួយកន្លែងក្នុងភូមិត្រពាំងស្រែ ឃុំ២ធ្នូ ស្រុកស្នួល ក្បែរព្រំដែនវៀតណាម កាលពីយប់ថ្ងៃទី២៤ ខែកក្កដា ឆ្នាំ២០១៦ ។
ក្នុងសកម្មភាពនៃអំពើរប្លន់ដែលក្រុមជនប្រដាប់អាវុធបានបាញ់មួយគ្រាប់គំរាមប្តីនៅក្រៅរបងផ្ទះ ខណៈដែលបានមកទាន់ហេតុការណ៍ ក៏ដូចជាសំដីសំដៅរបស់ក្រុមជនសង្ស័យដែលនិយាយគំរាមគ្រួសារជនរងគ្រោះ ត្រូវបាននគរបាលសន្និដ្ឋានថា ចរិកនៃអំពើនេះអាចជាការប្លន់លាយឡំ និងគំនុំ ។
លោកវរសេនីយ៍ទោ ចាន់ សុគីម អធិការនគរបាលស្រុកស្នួល បានបញ្ជាក់ឲ្យដឹងថា ក្រុមជនសង្ស័យមានគ្នាចាប់ពី៥នាក់ឡើងទៅ ប្រដាប់ដោយអាវុធវែង ខ្លី ដោយមួយចំនួនបានចូលទៅក្នុងផ្ទះធ្វើសកម្មភាពប្លន់ស្ត្រីរងគ្រោះជាម្ចាស់ផ្ទះឈ្មោះ សួង ហុង អាយុ៤៤ឆ្នាំ ខណៈដែលស្ត្រីរងគ្រោះកំពុងនៅក្នុងផ្ទះជាមួយកូនៗ ។ ក្នុងសកម្មភាពនោះ ក្រុមជនសង្ស័យដែលបានចូលទៅក្នុងផ្ទះបានធ្វើសកម្មភាពគំរាមប្លន់ និងបានវាយស្ត្រីរងគ្រោះរងរបួសចំក្បាល ប្លន់យកគ្រឿងអលង្ការ មាស និងប្លាទីនមួយចំនួន ។
ប្រភពព័ត៌មានពីកន្លែងកើតហេតុបានឲ្យដឹងទៀតថា ក្រៅពីជនសង្ស័យប្រដាប់អាវុធចូលទៅក្នុងផ្ទះជនរងគ្រោះធ្វើសកម្មភាពប្លន់ នៅមានគ្នីគ្នារបស់ពួកគេមួយចំនួននៅចាំនៅរបងខាងក្រៅផ្ទះ គាប់ជួនពេលនោះបុរសជាប្តីរបស់ស្ត្រីរងគ្រោះឈ្មោះ តាំង ម៉ានី អាយុ៤១ឆ្នាំ បានមកដល់ផ្ទះ ក្រុមជនសង្ស័យក៏បានបាញ់គំរាម មួយគ្រាប់ តែមិនត្រូវ និងបាននាំគ្នាគេចខ្លួនចូលព្រៃខាងក្រោយផ្ទះបាត់អស់ ។
លោកវរសេនីយ៍ទោ ចាន់ សុគីម បានបញ្ជាក់ទៀតថា ក្រុមជនប្រដាប់អាវុធបានធ្វើសកម្មភាពប្លន់មានរយៈពេលតែជិតកន្លះម៉ោង និងបានគេចខ្លួន ហើយក៏មិនបានបង្កឲ្យមានគ្រោះថ្នាក់ដល់អាយុជីវិតក្រុមគ្រួសារជនរងគ្រោះនោះទេ ។
លោកថា ភ្លាមៗកម្លាំងនគរបាលដឹកនាំដោយលោកឧត្តមសេនីយ៍ លន់ សុផាត ស្នងការនគរបាលខេត្ត និងលោកឧត្តមសេនីយ៍ត្រី អ៊ុំ ភី ស្នងការរងទទួលបន្ទុកព្រហ្មទណ្ឌ បានចុះទៅដល់កន្លែងកើតហេតុដើម្បីពិនិត្យមើលទីតាំង និងសាកសួរ ដើម្បីកំណត់លើមុខសញ្ញារបស់ក្រុមជនសង្ស័យមួយក្រុមនេះ ៕
ចែករំលែកព័តមាននេះ