រាជធានីភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានថ្លែងប្រាប់កោះសន្តិភាពតាមទូរស័ព្ទ កាលពីរសៀលថ្ងៃអាទិត្យទី២៤ កក្កដា ថា ការលើកឡើងរបស់មនុស្សម្នាក់ ចោទប្រកាន់គណបក្សប្រជាជនកម្ពុជា និងប្រកាសថា ចង់ផ្តួលរំលំរដ្ឋាភិបាលនោះ មិនសំខាន់ទេគេចង់ថាអីថាទៅអ្វីដែលសំខាន់ គឺមហាជនគេគិតយ៉ាងណានោះបានវាសំខាន់ ។
សមត្ថកិច្ចបានហៅករណីនេះថា៖ «មានលក្ខណៈញុះញ៉ុង និងមានចរិតជាលក្ខណៈកុបកម្មបះបោរ ដោយហិង្សាប្រឆាំងនឹងរដ្ឋាភិបាលស្របច្បាប់ »។ នគរបាលជាតិ ក៏បានអំពាវនាវដល់មហាជនទូទៅសូមកុំឲ្យជឿ និងចូលរួមតាមការអំពាវនាវនេះ ដែលជាសកម្មភាពខុសច្បាប់ ។ អំពាវនាវដល់អ្នកប្រើប្រើប្រាស់បណ្តាញសង្គមទាំងអស់ ត្រូវមានការប្រុងប្រយ័ត្ន ជាពិសេសការចែកចាយបន្តសេចក្តីប្រកាសនេះ គឺមានន័យស្មើនឹងចូលរួមគាំទ្រសកម្មភាពនេះផងដែរ ។
មន្ត្រីក្រសួងមហាផ្ទៃបានលើកឡើងថា បុរសម្នាក់ក្នុងសំលៀកបំពាក់ទារហានផង ស៊ីវិលផង បានបញ្ចេញវីដេអូមួយតាមយូធូបដែលប្រកាសថា ឈ្មោះ (VP9) ដែលក្នុងវីដេអូនោះ បានប្រកាសឲ្យមានការផ្តួលរំលំរដ្ឋាភិបាលដឹកនាំដោយសម្តេចតេជោ ហ៊ុន សែន និងបានចោទប្រកាន់គណបក្សប្រជាជនកម្ពុជា ដែលកំពុងគ្រប់គ្រងប្រទេសបច្ចុប្បន្ន ។ ទង្វើរបស់បុរសនោះ មិនអាចអត់ឱនឲ្យបានទ េពេលនេះសមត្ថកិច្ចកំពុងស្រាវជ្រាវ ។
អ្នកនាំពាក្យនគរបាលជាតិលោក គៀត ច័ន្ទថារិទ្ធ កោះសន្តិភាពមិនអាចទាក់ទងសុំការពន្យល់បានទេ នៅថ្ងៃទី២៤ ខែកក្កដា នេះ ព្រោះទូរស័ព្ទរបស់លោកគ្មានអ្នកទទួល។ តែមន្ត្រីនគរបាលក្រសួងមហាផ្ទៃានថ្លែងថា សមត្ថកិច្ចកំពុងស្វែងរកចាប់ខ្លួនជនសង្ស័យ និង បក្ខពួកដែលបានប្រកាសអំពីការប្រើប្រាស់កម្លាំងក្នុងការផ្តួលរំលំរដ្ឋាភិបាលស្របច្បាប់តាមរយៈបណ្តាញសង្គមហ្វេសប៊ុក កាលពីថ្ងៃទី១៧ ខែកក្កដា កន្លងមកនេះ ។
មន្ត្រីនគរបាលនៃអគ្គស្នងការនគរបាលជាតិ បានថ្លែងបែបនេះ នៅក្រោយពេលដែលមានការផ្សព្វផ្សាយ តាមរយៈបណ្តាញសង្គមហ្វេសប៊ុករបស់បុរសម្នាក់ ដែលបានដាក់ឈ្មោះខ្លួនឯងថា វ៉េប៉េ៩ (VP9) នៅអង្គភាពភូមិភាគនីរតី បានអំពាវនាវដល់មហាជន និងកងកម្លាំងប្រឆាំងនឹងរដ្ឋាភិបាលស្របច្បាប់ ។
គួរបញ្ជាក់ថា បុរសម្នាក់បានថ្លែងជារូបភាពវីដេអូក្នុងបណ្តាញសង្គមហ្វេសប៊ុក ជាសេចក្តីប្រកាសព័ត៌មានថ្ងៃទី១៧ ខែកក្កដា ឆ្នាំ២០១៦នេះ ដោយចោទប្រកាន់រដ្ឋាភិបាលនូវពាក្យសម្តីធ្ងន់ៗ និងប្រទេសវៀតណាមផងដែរ ថាបានរំលោភបំពានសិទ្ធិពលរដ្ឋផ្តាច់ការ និងធ្វើឲ្យប្រទេសជាតិជួបប្រទះការលំបាក ។
ក្នុងវីដេអូដែលកោះសន្តិភាពទទួលបានឃើញ បុរសដែលដាក់ឈ្មោះខ្លួនឯងថា វ៉េប៉េ៩ (VP9) ថាខ្លួនគេនៅអង្គភាពភូមិភាគនីរតី បានអំពាវនាវដល់មហាជន ក្រសួងមន្ទីនានា និងកងកម្លាំងទាំងអស់ ត្រៀមខ្លួនប្រឆាំងនឹងរដ្ឋាភិបាល ដើម្បីរំដោះជាតិ ។
ដោយឡែកពេលនេះ មិនទាន់មានការអះអាងផ្លួវការចំពោះបុរសរូបនោះនៅឡើយទេ ។ដែលពេលនេះថា មេក្លោងដែលជាអតីតយោធា ប្រកាសធ្វើរដ្ឋប្រហារផ្តួលរំលំរាជរដ្ឋាភិបាល បានរត់គេចខ្លួនចេញទៅក្រៅប្រទសបាត់ហើយ បន្ទាប់ពីបានប្រកាស កាលពីថ្ងៃទី១៧ ខែកក្កដា ឆ្នាំ២០១៦ តាមបណ្តាញសង្គមហ្វេសប៊ុក អំពាវនាវឱ្យកងកម្លាំងប្រដាប់អាវុធ ក្រសួងស្ថាប័ននានា ត្រៀមខ្លួនចូលរួមផ្តួលរំលំរាជរដ្ឋាភិបាល ។
យោងតាមបណ្តាញព័ត៌មានក្នុងស្រុកបានផ្សាយថា មេក្លោងដែលប្រកាសអំពីផែនការផ្តួលរំលំរាជរដ្ឋាភិបាល បានប្រើឈ្មោះ៣ គឺឈ្មោះ សោម វ៉ាន់ឌឿន, ស៊ិន សុវណ្ណារ៉ា និងឈ្មោះ សោម សុវណ្ណារ៉ា ជាអតីតទាហានកងពលអន្តរាគមន៍លេខ៣ ។ ឈ្មោះដែលប្រើផ្លូវការ គឺសោម សុវណ្ណារ៉ា។
មេក្លោងរូបនោះ គឺជាសមាជិកនៅក្នុងរណសិរ្សរំដោះជាតិខ្មែរ ដែលមានមូលដ្ឋាននៅក្រៅប្រទេស ។ ពេលកន្លងមក គណបក្សសង្គ្រោះជាតិធ្វើបាតុកម្ម គឺតែងតែឃើញមានវត្តមាន ឈ្មោះ សោម សុវណ្ណារ៉ា ចូលរួម ។ ហើយមេក្លោងរូបនេះ ធ្លាប់បានទំនាក់ទំនងជាមួយសមាជិកគណបក្សប្រឆាំងមួយចំនួនផងដែរ គឺរាល់ពេលធ្វើបាតុកម្មរបស់គណបក្សសង្គ្រោះជាតិកន្លងមក គេតែងតែណាត់ជួបគ្នា ដើម្បីរៀបបចំផែនការ ។
ស្របពេលជាមួយគ្នានេះដែរ ពាក់ព័ន្ធករណីនេះ សារព័ត៌មានក្នុងស្រុកខាងលើ បានអះអាងតុលាការបានចេញដីកាបញ្ជាឲ្យឈ្មោះ សោម សុវណ្ណារ៉ា ចូលខ្លួន ដើម្បីឆ្លើយបំភ្លឺពាក់ព័ន្ធការអំពាវនាវឱ្យកងកម្លាំងប្រដាប់អាវុធ ក្រសួង ស្ថាប័ននានា ត្រៀមខ្លួនចូលរួមផ្តួលរំលំ រាជរដ្ឋាភិបាល នៅពេលដ៏ខ្លីខាងមុខនេះ ។
សមត្ថកិច្ចជំនាញនៃនាយកដ្ឋានប្រឆាំងភេវរកម្ម និងឧក្រិដ្ឋកម្មឆ្លងដែន នៃក្រសួងមហាផ្ទៃ បានបញ្ជូនសំណុំរឿងជនប្រកាសផ្តួលរំលំ រដ្ឋាភិបាល ទៅសាលាដំបូង រាជធានីភ្នំពេញ ដើម្បីឲ្យតុលាការចាត់វិធានតាមនីតិវិធី ។ បន្ទាប់ពីទទួលបានសំណុំរឿងនេះ ព្រះរាជអាជ្ញាបាននចេញដីកាបញ្ជាឲ្យជន
ប្រកាសផ្តួលរំលំរដ្ឋាភិបាលចូលខ្លួន។ ហើយចំពោះសំណុំរឿងនេះ គឺ លោក សៀង សុខ ព្រះរាជអាជ្ញារងជាអ្នកកាន់ ។
មន្ត្រីជាន់ខ្ពស់ក្រសួងការពារជាតិបានបញ្ជាក់ថា សមត្ថកិច្ចជំនាញបានកំណត់មុខសញ្ញា និងអត្តសញ្ញាណក្រុមជនដែលប្រកាសផ្តួលរំលំរដ្ឋាភិបាលស្របច្បាប់បានអស់ហើយ ដើម្បីឈានទៅដល់ការចាប់ខ្លួន ។ ក្រៅពីកំណត់មុខសញ្ញា សមត្ថកិច្ចក៏បានស្គាល់ទីតាំងលាក់ខ្លួនរបស់ពួកគេផងដែរ ។
កោះសន្តិភាពមិនអាចសុំការពន្យល់ពីលោកនាយឧត្តមសនីយ៍ ឈុំ សុជាតិ អ្នកនាំពាក្យក្រសួងការពារជាតិបានទេ កាលពីថ្ងៃទី២៤ខែកក្កដា ទូរស័ព្ទរបស់លោកគ្មានអ្នកទទួល។ តែលោកត្រូវបានដកស្រង់សំដីដោយលោកថ្លែងថា ខាងជំនាញរបស់ក្រសួងការពារជាតិ បានកំណត់អត្តសញ្ញាណក្រុមជនដែលប្រកាស ផ្តួលរំលំរដ្ឋាភិបាលស្របច្បាប់បានអស់ហើយ និងកំពុងតែធ្វើការបន្ត ដើម្បីឈានដល់ការចាប់ខ្លួន ពីព្រោះបានស្គាល់ទីតាំងរបស់ពួកគេអស់ហើយ។
លោកបានលើកឡើងថា «យើងកំណត់អត្តសញ្ញាណបានអស់ហើយ យើងកំពុងតែធ្វើការបន្តទៀត យើងយកអត្តសញ្ញាណបានហើយ យើងដឹងកន្លែងរបស់វានិយាយរួមយើងដឹងអត្តសញ្ញាណអស់ហើយ យើងកំពុងតែឲ្យអង្គភាពរបស់យើងធ្វើការបន្ត» ។ ការប្រកាស ផ្តួលរំលំរដ្ឋាភិបាលស្របច្បាប់ គឺជាការខុសច្បាប់ និងជាបទល្មើសព្រហ្មទណ្ឌមួយ ធ្វើឲ្យប៉ះពាល់ដល់សេចក្តីសុខ និងប៉ះពាល់ដល់រដ្ឋធម្មនុញ្ញ នៃព្រះរាជាណាចក្រកម្ពុជា ។
មន្ត្រីក្រសួងការពារជាតិលើកឡើងថា ការប្រកាសនេះ គឺជាខុសច្បាប់ ហើយយើងនឹងចាត់ការទៅតាមផ្លូវច្បាប់ យើងមិនអាចអនុញ្ញាតឲ្យមនុស្សនឹងបុគ្គលនឹងធ្វើបែបនេះបានទេ ។ ពីព្រោះរដ្ឋាភិបាលកើតចេញពីការបោះឆ្នោត ហើយធ្វើនេះវាប៉ះពាល់ដល់សន្តិសុខជាតិ ប៉ះពាល់អធិបតេយ្យភាព យើងមិនអាចទទួលយកបានឡើយ ៕
ចែករំលែកព័តមាននេះ