ប៉ុន្មានថ្ងៃប៉ុណ្ណោះក្រោយការបាញ់ប្រហារនៅក្រុងមុយនីក ជនភៀសខ្លួនស៊ីរីអាយុ២៧ឆ្នាំម្នាក់ដែលកើតរោគសរសៃប្រសាទបានស្លាប់កាលពីយប់ថ្ងៃទី២៤ កក្កដា ក្នុងការផ្ទុះមួយដែលគេជាអ្នកធ្វើនៅជិតកន្លែងប្រគំតន្ត្រីមួយនាភាគខាងត្បូងអាល្លឺម៉ង់ ដែលជួបប្រទះនឹងសប្តាហ៍ខ្មៅមួយដោយសារការវាយប្រហារបង្ហូរឈាមជាច្រើន ។
លោក JOACHIM HERMANN រដ្ឋមន្ត្រីមហាផ្ទៃអាល្លឺម៉ង់ដែលមកពីកន្លែងផ្ទុះនៅទីក្រុង ANSBACH តំបន់បាវីយែរថ្លែងទៅកាន់សារព័ត៌មានថា នេះជាការវាយប្រហារភេរវកម្មថ្មីមួយទៀត ដែលបង្កើនការព្រួយបារម្ភរបស់មនុស្សម្នា ។ លោកអះអាងថា អ្នកសុំសិទ្ធិជ្រកកោននេះ ស្លាប់ដោយសារការផ្ទុះគ្រាប់បែករបស់គេ តែមនុស្ស១២នាក់ក៏៏រងរបួសដែរ ក្នុងនោះ៣នាក់របួសធ្ងន់ ។ រដ្ឋមន្ត្រីរូបនេះពន្យល់ថា អាជ្ញាធរខិតខំត្រួតពិនិត្យតើនោះជាការវាយប្រហារភេរវកម្មអ៊ិស្លាមនិយមមួយ ឬយ៉ាងណា ។ គេពុំអាចបដិសេធករណីបែបនេះឡើយ ។
យោងតាមលោក JOACHIM HERMANN ថា ជននេះសាកល្បងចូលទៅកាន់កន្លែងប្រគំតន្ត្រី តែត្រូវបកក្រោយវិញនាពេលយប់ ដោយសារគ្មានសំបុត្រចូល ។ គ្រាប់បែកបានផ្ទុះនាវេលាម៉ោងប្រមាណជា២២ម៉ោងក្នុងស្រុកនៅមុខភោជនីយដ្ឋានមួយនាកណ្តាលក្រុងក្បែរកន្លែងប្រគំតន្ត្រី ។
អាជ្ញាធរនិយាយថា ជនស៊ីរីនោះដែលរស់នៅក្រុង ANSBACH ធ្លាប់ប៉ុនប៉ង២លើកហើយ ដើម្បីបញ្ចប់ជីវិតគេ ហើយធ្លាប់ស្ថិតក្នុងមន្ទីរពេទ្យសរសៃប្រសាទផង ៕
ចែករំលែកព័តមាននេះ