នាយករដ្ឋមន្ត្រីនេប៉ាល់ លោក SHARMA OLI ប្រកាសកាលពីយប់ថ្ងៃទី២៤ កក្កដា ក្នុងឱកាសនៃសម័យប្រជុំសភាពីការសុំលាលែងរបស់លោកហើយ ។
ការសុំលាលែងនេះធ្វើឡើងមុនញត្តិសម្តែងការមិនជឿទុកចិត្តមួយប្រឆាំងលោក OLI អាយុ៦៤ឆ្នាំ តាមការផ្តួចផ្តើមគំនិតរបស់សភានេប៉ាល់ និងគណបក្សកុំមុយនីស្តនេប៉ាល់ម៉ៅនិយម ហើយញត្តិនេះត្រូវអនុម័តក្នុងសភាដែលមាន៦០១កៅអី ។
លោក OLI អះអាងក្នុងសភាថា លោកបានដាក់ពាក្យសុំលាលែងជូនចំពោះប្រធានាធិបតីលោក BIDYA DEVI BHANDARI នាថ្ងៃជាមួយគ្នានេះ មុនសម័យប្រជុំសភា ។ ថ្លែងទៅកាន់សភា លោក OLI មានប្រសាសន៍ថា លោកបានថែរក្សាទំនាក់ទំនងជិតស្និទ្ធជាមួយចិន និងឥណ្ឌា ដោយការពារផលប្រយោជន៍ជាតិកុំឱ្យមានការប៉ះពាល់ក្នុងអាណត្តិរបស់លោក ។
ដោយគូសបញ្ជាក់ពីសមិទ្ធផលធំៗមួយចំនួនដែលរដ្ឋាភិបាលលោកសម្រេចបានរយៈពេល៩ខែចុងក្រោយនេះ ប្រមុខរដ្ឋាភិបាលនេប៉ាល់អះអាងថា រដ្ឋាភិបាលលោកបានធ្វើការខិតខំប្រឹងប្រែងដោយស្មោះ ដើម្បីកសាងបណ្តាហេដ្ឋារចនាសម្ព័ន្ធដែលរងការបំផ្លាញដោយការរញ្ជួយដី ផ្តល់ការជួយសង្គ្រោះដល់ប្រជាជននៃតំបន់រងគ្រោះ ហើយខិតខំបង្កើតរដ្ឋធម្មនុញ្ញថ្មី ។
កាលពីប៉ុន្មានសប្តាហ៍មុននេះ គណបក្សកុំមុយនីស្តនេប៉ាល់ម៉ៅនិយមបានសម្រេចដកការគាំទ្រចំពោះរដ្ឋាភិបាលចម្រុះ ដោយចោទប្រកាន់នាយករដ្ឋមន្ត្រីថា ពុំគោរពកិច្ចព្រមព្រៀងស្តីពីការបង្កើតរដ្ឋធម្មនុញ្ញថ្មី ដំណើរការសន្តិភាព និងការកសាងប្រទេសឡើងវិញ ក្រោយការរញ្ជួយដីយ៉ាងបំផ្លិចបំផ្លាញកាលពីខែមេសា ឆ្នាំ២០១៥ ៕
ចែករំលែកព័តមាននេះ