ខេត្តសៀមរាប ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា សម្ដេចចុះមូលដ្ឋានគឺជាទម្លាប់របស់សម្ដេច តាំងពីជំនាន់ជិះម៉ូតូលើផ្លូវរដិបរដុបតាំងពីឆ្នាំ១៩៧៩ មក
ខេត្តសៀមរាប ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា សម្ដេចចុះមូលដ្ឋានគឺជាទម្លាប់របស់សម្ដេច តាំងពីជំនាន់ជិះម៉ូតូលើផ្លូវរដិបរដុបតាំងពីឆ្នាំ១៩៧៩ មក គឺតាំងពីបក្សប្រឆាំងមិនទាន់កើត ប៉ុន្តែបែរជាមេបក្សប្រឆាំងរូបនេះថា សម្ដេចធ្ចើតាមគេវិញ ។
សម្ដេចតេជោនាយករដ្ឋមន្ត្រី ហ៊ុន សែន មានប្រសាសន៍បែបនេះ នារសៀលថ្ងៃទី២២ ខែកក្កដា នៅសណ្ឋាគារស៊ីធីអង្គរ ក្រុងសៀមរាប ក្នុងឱកាសអញ្ជើញជួបសំណេះសំណាលជាមួយក្រុមប្រឹក្សាឃុំ សង្កាត់ ក្រុង ខេត្ត អាជ្ញាធរ មន្ត្រីរាជការ និងកងកម្លាំងប្រដាប់អាវុធនៅខេត្តសៀមរាប បន្ទាប់ពីជួបសំណេះសំណាលជាមួយមន្ត្រីរាជការ កងកម្លាំងប្រដាប់អាវុធ នៅខេត្តបាត់ដំបង និងខេត្តបន្ទាយមានជ័យរួចមក ។
សម្ដេចតេជោមានប្រសាសន៍បន្តថា ដំណើរបេសកកម្មរបស់សម្ដេច គឺដើម្បីឈ្វេងយល់អំពីសមិទ្ធផលរីកចម្រើន ផលលំបាក ភាពងាយស្រួលនិងតម្រូវការថ្មីៗនៃការវិវឌ្ឍ និងបញ្ហាទាំងឡាយដែលបានដំណើរការអស់ជាងពាក់កណ្ដាលអាណត្តិមកនេះ ជាពិសេសពិនិត្យមើលបញ្ហាប្រឈមនៅសេសសល់ ដែលត្រូវធ្វើការដោះស្រាយ ។
សម្តេចតេជោមានប្រសាសន៍បញ្ជាក់ថា សន្តិភាពនេះហើយ ជាកត្តាអនុគ្រោះសម្រាប់ការអភិវឌ្ឍរហូតដល់សព្វថ្ងៃ គឺបានកសាងប្រទេសយើងឡើងវិញ បន្ទាប់ពីការបំផ្លិចបំផ្លាញអស់ស្ទើរគ្មានសល់ដោយសង្គ្រាមនិងរបបប្រល័យពូជសាសន៍ខ្មែរក្រហម ។ ការតស៊ូស្វែងរកសន្តិភាពដែលសម្ដេចបានដាក់ចេញនូវនយោបាយបង្រួបបង្រួមជាតិ ជាពិសេសនយោបាយឈ្នះ ឈ្នះ រហូតធ្វើឱ្យប្រទេសយើង ទទួលបាននូវសន្តិភាពយ៉ាងពេញលេញរហូតដល់បច្ចប្បន្ន ។
គោនយោបាយរបស់រាជរដ្ឋាភិបាល នៅតែបន្តការគិតគូជាអាទិភាព ដើម្បីកាត់បន្ថយគម្លាតរវាងអ្នកមាននិងអ្នកក្រ ដែលវិស័យទាំងនេះ មានធនធានមនុស្ស ផ្លូវ ទឹក ភ្លើង ។
ក្នុងន័យនេះ សម្ដេចអគ្គមហាសេនាបតីតេជោ ហ៊ុន សែន បានផ្ដាំផ្ញើឱ្យក្រុមប្រឹក្សាឃុំ សង្កាត់ ក្រុង ខេត្ត អាជ្ញាធរ មន្ត្រីរាជការ កងកម្លាំងប្រដាប់ទាំងអស់ គប្បីរួមគ្នាថែរក្សាសុខសន្តិភាពនេះ ឱ្យបានគង់វង្សជានិរន្តរ៍ ខិតខំធ្វើការឱ្យបានល្អ ខិតខំផ្ដល់សេវាសាធារណៈនានាជូនប្រជាពលរដ្ឋឱ្យឆាប់រហ័សទាន់ពេលវេលា ដើម្បីផ្ដល់ភាពងាយស្រួលក្នុងតម្រូវការប្រើប្រាស់ និងសេចក្ដីសុខ ក្នុងជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើងថែមទៀត ។
ខេត្តកំពង់ធំ ៖ បន្ទាប់មកនៅព្រឹកថ្ងៃទី២៣ ខែកក្កដា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើដំណើរពីខេត្តសៀមរាប ឆ្ពោះមកកាន់ខេត្តកំពង់ធំ ។ សម្ដេចតេជោ បានចូលផ្សារស្ទឹងសែនក្នុងក្រុងស្ទឹងសែន ជួបសំណេះសំណាលផ្ទាល់ជាមួយអាជីវករនិងប្រជាពលរដ្ឋយ៉ាងស្និទ្ធស្នាល ។ ក្នុងជំនួបផ្ទាល់នោះដែរ សម្ដេចតេជោបានទទួលសំណើពីអាជីវករម្ចាស់តូប ដោយសុំកុំឱ្យមានអាណត្តិក្នុងការលក់ដូរតូបនីមួយៗរបស់ពួកគាត់ ។
ទាក់ទងនឹងបញ្ហានេះ សម្តេចតេជោនាយករដ្ឋមន្ត្រី បានបន្ទោសមន្ត្រីខេត្តកំពង់ធំថា មន្ត្រីទាំងនោះមិនមានការពន្យល់ឱ្យប្រជាពលរដ្ឋ អាជីវករ គាត់បានយល់អំពីបញ្ហានេះ ។ សម្ដេចតេជោមានប្រសាសន៍ថា ផ្សារនេះសម្ដេចបានធ្វើដំបូលឱ្យតែប្រជាពលរដ្ឋជាម្ចាស់តូប ដូច្នេះផ្សារនេះអត់ត្រូវមានអាណត្តិទេ ។
តាមរបាយការណ៍របស់អភិបាលខេត្តកំពង់ធំ បានឱ្យដឹងថា សម្ដេចតេជោបានជួយសាងសង់ផ្សារស្ទឹងសែនឡើងវិញ បន្ទាប់ពីផ្សារនេះបានឆេះនៅថ្ងៃទី២ ខែមិថុនា ឆ្នាំ២០១០។ អាជីវករបានប្រកបមុខរបរនិងរំលស់ទុនដែលបាត់បង់បានបណ្ដើរៗ និងកន្លែងខ្លះទទួលបានការលក់ដូរជោគជ័យរួចខ្លួនពីការខាតបង់ដោយអគ្គិភ័យ។ បច្ចុប្បន្ន ផ្សារស្ទឹងសែន ក៏ដូចជាផ្សារកំពង់ធំ អាជីវករបានរួមគ្នាកសាងបណ្ដាញទឹកដាក់បង្ការអគ្គិភ័យនៅនឹងកន្លែង ព្រមទាំងបំពាក់កាមេរ៉ាសុវត្ថិភាពនៅក្នុងផ្សារ ដូច្នេះហើយបងប្អូនអាជីវករកំពុងមានសុទិដ្ឋិនិយមអំពីសុវត្ថិភាព ។
មានប្រសាសន៍សំណោះសំណាលនៅសាលាខេត្តកំពង់ធំ សម្ដេចតេជោនាយករដ្ឋមន្ត្រី បានផ្ដាំផ្ញើដល់មន្ត្រីរាជការគ្រប់លំដាប់ថ្នាក់ក្នុងខេត្ត ត្រូវយកចិត្តទុកដាក់ដោះស្រាយសេវាសាធារណៈ តម្រូវការចាំបាច់នានាជូនប្រជាពលរដ្ឋឲ្យបានឆាប់រហ័សនិងមានប្រសិទ្ធភាព។ ពិសេសត្រូវតែលុបបំបាត់រាល់កំហុសឆ្គង ការថ្នាំងថ្នាក់ ភាពអសកម្មទាំងឡាយ ព្រមទាំងត្រូវយកចិត្តទុកដាក់ខិតខំរក្សាសន្តិសុខ សណ្ដាប់ធ្នាប់សាធារណៈ ពង្រឹងការអនុវត្តគោលនយោបាយភូមិ ឃុំ មានសុវត្ថិភាពឱ្យបានកាន់តែប្រសើរ ៕
ចែករំលែកព័តមាននេះ