រាជធានីភ្នំពេញ ៖ មានការភ័យខ្លាច ដោយសារការនិយាយតៗគ្នា ពីសារធាតុវិទ្យុសកម្មដែលបានសាយភាយដោយការផ្ទុះរោងចក្រអគ្គិសនីដើរដោយថាមពលនុយក្លេអ៊ែរនៅប្រទេសជប៉ុន និងជំរុញឱ្យក្រសួងធនធានទឹក និងឧតុនិយមនៃប្រទេសកម្ពុជា ចេញសេចក្តីជូនដំណឹងជាបន្ទាន់មួយ នៅថ្ងៃទី១៦ មីនា ដែលចុះហត្ថលេខាដោយលោករដ្ឋមន្ត្រី លឹម គានហោ។
យោងតាមសេចក្តីជូនដំណឹងនេះបង្ហាញថា ប្រទេសកម្ពុជា មិនបានរងផលប៉ះពាល់ពីឥទ្ធិពលណាមួយនៃការផ្ទុះនៅប្រទេសជប៉ុននោះទេ។ សេចក្តីជូនដំណឹងបានបញ្ជាក់ថា បន្ទាប់ពីមានការផ្ទុះរោងចក្រអគ្គិសនីដើរដោយថាមពលនុយក្លេអ៊ែរនៅប្រទេសជប៉ុន ដោយសារឥទ្ធិពលនៃការរញ្ជួយដី និងរលកយក្សស៊ូណាមី បានបង្កឱ្យប្រជាពលរដ្ឋកម្ពុជាមានការនិយាយតៗគ្នា និងសម្តែងនូវការព្រួយបារម្ភអំពីផលប៉ះពាល់ផ្សេងៗដែលអាចកើតមានឡើងដោយសារឥទ្ធិពលនៃការផ្ទុះខាងលើនេះ។
ក្រសួងធនធានទឹក និងឧតុនិយមសូមជម្រាបថា បច្ចុប្បន្នព្រះរាជាណាចក្រកម្ពុជាបាននិងកំពុងទទួលឥទ្ធិពលពីលំហូរខ្យល់តំបន់ត្រូពិច ដែលលំហូរខ្យល់នេះពុំមានការពាក់ព័ន្ធនឹងលំហូរខ្យល់ដែលបក់មកពីប្រទេសជប៉ុនឡើយ។
យោងលើលំហូរខ្យល់ដូចបានជម្រាបជូនខាងលើ ក្រសួងធនធានទឹក និងឧតុនិយមសូមជម្រាបជូនសាធារណជនមេត្តាជ្រាបថា ព្រះរាជាណាចក្រកម្ពុជាពុំមានទទួលរងនូវឥទ្ធិពលវិទ្យុសកម្មដែលបណ្តាលមកពីការផ្ទុះរោងចក្រអគ្គិសនីដើរដោយថាមពលនុយក្លេអ៊ែរនៅប្រទេសជប៉ុននោះទេ។ អាស្រ័យដូចបានជម្រាបជូនខាងលើ សូមអាជ្ញាធរដែនដី និងប្រជាពលរដ្ឋកម្ពុជាទាំងអស់មេត្តាជ្រាបជាព័ត៌មាន។ យោងតាមសេចក្តីជូនដំណឹងខាងលើនេះបានបញ្ជាក់យ៉ាងច្បាស់ថា ទឹកដីព្រះរាជាណាចក្រកម្ពុជាយើងពុំបានរងផលប៉ះពាល់ណាមួយពីវិទ្យុសកម្មបរមាណូនេះឡើយ៕
ចែករំលែកព័តមាននេះ