រាជធានីភ្នំពេញ ៖ រយៈពេលប៉ុន្មានឆ្នាំចុងក្រោយនេះ បណ្តាប្រទេសទាំងក្នុង និងក្រៅតំបន់នៅលើពិភពលោកបានស្គាល់កម្ពុជាកាន់តែច្បាស់ តាមរយៈផលិតផលកសិឧស្សាហកម្ម និងកសិកម្ម ។ តួយ៉ាងដូចជា
រាជធានីភ្នំពេញ ៖ រយៈពេលប៉ុន្មានឆ្នាំចុងក្រោយនេះ បណ្តាប្រទេសទាំងក្នុង និងក្រៅតំបន់នៅលើពិភពលោកបានស្គាល់កម្ពុជាកាន់តែច្បាស់ តាមរយៈផលិតផលកសិឧស្សាហកម្ម និងកសិកម្ម ។ តួយ៉ាងដូចជា ម្រេចកំពត ស្ករត្នោតកំពង់ស្ពឺ និងអង្ករកម្ពុជា ជាដើម ។ ទន្ទឹមនឹងផលិតផលមានគុណភាព កម្ពុជាបានពង្រឹងនូវកិច្ចសហប្រតិបត្តិការអន្តរជាតិជាមួយប្រទេសជាដៃគូពាណិជ្ជកម្មមានលក្ខណៈល្អប្រសើរ បានជំរុញឱ្យការធ្វើពាណិជ្ជកម្មនាំចេញ-នាំចូលមានការកើនឡើងជាបន្ដបន្ទាប់ ។ ជាក់ស្តែង ទំហំពាណិជ្ជកម្មរវាងកម្ពុជា-ជប៉ុន ក្នុងឆមាសទី១ឆ្នាំ២០១៦នេះ មានកំណើនគួរឱ្យកត់សម្គាល់ ។
តាមស្ថិតិប្រព័ន្ធអាស៊ីគូដារបស់អគ្គនាយកដ្ឋានគយ និងរដ្ឋាករកម្ពុជា បង្ហាញថា ក្នុងឆមាសទី១នេះ ទំហំពាណិជ្ជកម្មរវាងកម្ពុជា-ជប៉ុន មានទឹកប្រាក់ប្រមាណ១៤៨លានដុល្លារកើនឡើងប្រមាណ៣០% បើប្រៀបធៀបនឹងរយៈពេលដូចគ្នានៅឆ្នាំ២០១៥ មានប្រមាណ១៤៤លានដុល្លារ ។ កំណើនពាណិជ្ជកម្មដែលកម្ពុជា-ជប៉ុនទទួលបាន បើទោះបីក្រសួងពាក់ព័ន្ធពុំទាន់បង្ហាញ ឬចេញរបាយការណ៍ជាផ្លូវការពិតប្រាកដណាមួយ តែកំណើននេះបានបង្ហាញឱ្យឃើញថា ការនាំចេញ-ចូលទំនិញពីកម្ពុជាទៅជប៉ុន ឬពីជប៉ុនមកកម្ពុជា ផ្អែកលើបរិយាកាសពាណិជ្ជកម្ម និងការវិនិយោគនៅកម្ពុជា គឺមានលក្ខណៈល្អ ហើយថ្មីៗនេះប្រទេសកម្ពុជាទទួលបានវិនិយោគិនជប៉ុនមកដាក់ទុនប្រមាណ១លានដុល្លារបើករោងចក្រផលិតបេតុងបម្រើក្នុងវិស័យអចលនទ្រព្យនៅប្រទេសកម្ពុជាបន្ថែម ។
តាមប្រធានសមាគមពាណិជ្ជកម្ម និងវិនិយោគកម្ពុជា-ជប៉ុន លោក គឹម អឿន បានសាទរចំពោះកំណើនពាណិជ្ជកម្មដែលប្រទេសទាំងពីរទទួលបានក្នុងឆមាសទី១ឆ្នាំនេះ ។
លោកគិតថា៖ « ប្រសិនបើស្ថានភាពសេដ្ឋកិច្ច នយោបាយមានដំណើរការល្អដដែលនោះ ការធ្វើពាណិជ្ជកម្មរវាងប្រទេសទាំងពីរគ្មានអ្វីជាបញ្ហាចោទទេ ព្រោះជប៉ុនច្បាស់លាស់មុននឹងមកវិនិយោគនៅកម្ពុជា ពួកគេអាចទស្សន៍ទាយបានមុនថា ក្នុងរយៈពេល១០ឆ្នាំទៀត កម្ពុជានឹងឈានដល់កម្រិតណា » ។
លោកបន្ដថា ៖ « ប្រសិនបើយើងធ្វើត្រូវ គាត់[អ្នកវិនិយោគិនជប៉ុន]អាចមកវិនិយោគនៅកម្ពុជាច្រើន ហើយវាជាចំណុចមួយល្អ និងសប្បាយចិត្ត ប៉ុន្តែក៏បារម្ភដែរ នៅពេលគាត់មក តែបែរជាជួបបញ្ហា ។ ពេលខ្លះគាត់បង្ហាញក្តីបារម្ភនេះទៅខាងមន្ត្រីស្ថានទូតជប៉ុន តែពេលខ្លះទៀត មិននិយាយពីបញ្ហាអ្វីទាំងអស់ដែលចំណុចនេះធ្វើឱ្យខ្ញុំមានការបារម្ភ » ។
ទោះបីយ៉ាងណា លោកបន្ថែមថា ៖ « យើងត្រូវប្រឹងទាំងអស់គ្នា ទាំងវិស័យរដ្ឋ និងឯកជន ធ្វើយ៉ាងណាឱ្យជប៉ុនមើលឃើញ ។ ដូច្នេះនៅថ្ងៃខាងមុខ កម្ពុជានឹងទទួលបានវិនិយោគិនជប៉ុនច្រើនបន្ថែមទៀត » ។
តាមប្រធានសមាគមថា បច្ចុប្បន្ន សមាជិកសមាគមពាណិជ្ជកម្មជប៉ុនដែលបានវិនិយោគនៅកម្ពុជាមានចំនួន២២២ក្រុមហ៊ុន កំពុងវិនិយោគលើផ្នែកធំៗមួយចំនួនដូចជា រោងចក្រ, ឧស្សាហកម្ម, ហិរញ្ញវត្ថុ និងធានារ៉ាប់រង, ផ្នែកសាងសង់, ផ្នែកពាណិជ្ជកម្ម, ផ្នែកសេវាកម្ម និងផ្នែកដឹកជញ្ជូន ជាដើម ៕
ចែករំលែកព័តមាននេះ