រាជធានីភ្នំពេញ ៖ ចំនួនភ្ញៀវទេសចរបរទេសឆ្លងកាត់ច្រកចូលអាកាសយានដ្ឋានអន្តរជាតិភ្នំពេញបានកើនឡើងជាង១០% ក្នុងរយៈពេល៦ខែដំបូងដើមឆ្នាំ២០១០នេះ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ នេះបើតាមស្ថិតិរបស់មន្ត្រីប្រចាំនាយកដ្ឋានអន្តោប្រវេសន៍ប្រាប់អោយដឹងកាលពីពេលថ្មីៗនេះ។យោងតាមស្ថិតិរបស់នាយកដ្ឋានអន្តោប្រវេសន៍អោយដឹងថា ក្នុងរយៈពេល៦ខែដំបូងដើមឆ្នាំនេះ ភ្ញៀវទេសចរដែលធ្វើដំណើរឆ្លងកាត់អាកាសយាន្តដ្ឋានអន្តរជាតិភ្នំពេញសរុបមានចំនួន៥៨០.៦០០នាក់ កើនឡើងជាង១០% បើប្រៀបធៀបនឹងរយៈពេលដូចគ្នាកាលពីឆ្នាំ២០០៩ ដែលពេលនោះមានតែ៥២១.៣៨៧នាក់ប៉ុណ្ណោះ។
បើតាមស្ថិតិដដែលអោយដឹងទៀតថា ក្នុងរយៈពេល៦ខែដើមឆ្នាំ២០១០នេះ ចំនួនភ្ញៀវទេសចរចូលតាមអាកាសយានដ្ឋាននេះមានចំនួន២៨៤.៩៩១នាក់ ហើយភ្ញៀវដែលចេញពីកម្ពុជាវិញមានចំនួន២៩៥.៦០៩នាក់។ ចំណែកភ្ញៀវទេសចរបរទេសដែលចូលមកតាមអាកាសយានដ្ឋាននេះច្រើនជាងគេ គឺជនជាតិចិន និងបន្ទាប់មក ជនជាតិអាមេរិក។លោកពិន ពិសិដ្ឋ ប្រធាននាយកដ្ឋានអន្តោប្រវេសន៍បានថ្លែងប្រាប់កោះសន្តិភាពកាលពីពេលថ្មីៗនេះថា មូលហេតុដែលនាំអោយភ្ញៀវទេសចរបរទេសឆ្លងកាត់តាមច្រកនេះកាន់តែច្រើននោះដោយសារមានការរៀបចំសណ្តាប់ធ្នាប់ សន្តិសុខបានល្អ និងមានការយកចិត្តទុកដាក់យ៉ាងខ្លាំងពីមន្ត្រីជំនាញដែលប្រចាំការនៅទីនោះ រួមទាំងមានការរាក់ទាក់ និងមិនអោយភ្ញៀវមានការអន់ចិត្តដោយប្រការផ្សេងៗឡើយ ដូចជាការធ្វើអោយភ្ញៀវរង់ចាំយូរ ឬមានការយឺតយ៉ាវជាដើម។ ម្យ៉ាងទៀតដោយមានការលើកលែងទិដ្ឋាការចំពោះប្រទេសដែលចូលជាសមាជិកអាស៊ានលើកលែងតែប្រទេសប្រុយណេ ដែលមិនទាន់បានធ្វើ។
លោកបានមានប្រសាសន៍បន្ថែមទៀតថា ដើម្បីជំរុញអោយភ្ញៀវទេសចរបរទេសចូលមកទស្សនានៅកម្ពុជាអោយកាន់តែច្រើនជាងនេះ លោកបានព្រមានដល់មន្ត្រីអន្តោប្រវេសន៍នៅអាកាសយានដ្ឋានភ្នំពេញ រួមទាំងច្រកទ្វារអន្តរជាតិផ្សេងៗទៀតនៅទូទាំងប្រទេស មិនអោយមន្ត្រីណាម្នាក់បង្កភាពអសកម្មដល់ភ្ញៀវឡើយ ហើយប្រសិនបើមានមន្ត្រីណាម្នាក់ប្រព្រឹត្តអ្វីខុសឆ្គងនោះ លោកណែនាំអោយភ្ញៀវរាយការណ៍មកនាយកដ្ឋានអន្តោប្រវេសន៍ជាបន្ទាន់ ដើម្បីលោកចាត់វិធានការចំពោះមន្ត្រីនោះ។
អាកាសយាន្តដ្ឋានអន្តរជាតិភ្នំពេញ គឺជាអាកាសយានដ្ឋានមួយធំជាងគេបង្អស់នៅកម្ពុជា ហើយស្ថិតនៅក្នុងរាជធានីភ្នំពេញ។លោកថោង ខុន រដ្ឋមន្ត្រីក្រសួងទេសចរណ៍ បានប្រាប់កោះសន្តិភាពកាលពីពេលថ្មីៗនេះដែរថា ដើម្បីទាក់ទាញភ្ញៀវទេសចរអោយចូលមកទស្សនាកម្ពុជាកាន់តែច្រើនឡើង “យើងត្រូវធ្វើការផ្សព្វផ្សាយអោយបានច្រើនអំពីតំបន់ទេសចរណ៍នានា សំរួលបែបបទការធ្វើដំណើរ និងការដឹកជញ្ជូនភ្ញៀវ ពង្រឹងផលិតផលទេសចរណ៍ធ្វើអោយថ្មី និងប្លែកជានិច្ច បណ្តុះបណ្តាលធនធានមនុស្សអោយបានច្រើន និងផ្តល់សេវាដ៏ល្អដល់អ្នកទេសចរ និងមានការធានាសន្តិសុខអោយបានល្អ ដើម្បីចូលស្តង់ដាអាស៊ាន។លោករដ្ឋមន្ត្រីមានប្រសាសន៍ទៀតថា សព្វថ្ងៃក្រសួងទេសចរណ៍កំពុងជំរុញអោយមានការតភ្ជាប់ជើងហោះហើរតាមផ្លូវអាកាសរវាងកម្ពុជា និងប្រទេសនានានៅក្នុងតំបន់ ដើម្បីបង្កើនចំនួនភ្ញៀវទេសចរកាន់តែច្រើនឡើងថែមទៀត។ ចំពោះភ្ញៀវបរទេសដែលចូលមកតាមអាកាសយានដ្ឋានអន្តរជាតិភ្នំពេញមានគោលដៅទេសចរណ៍ដូចជានៅរាជធានីភ្នំពេញ ខេត្តសៀមរាប និងខេត្តព្រះសីហនុជាដើម៕
ចែករំលែកព័តមាននេះ