រាជធានីភ្នំពេញ ៖ យោងតាមទីភ្នាក់ងារព័ត៌មានចិនស៊ីនហួ បានឲ្យដឹងថា លោក LU KANG អ្នកនាំពាក្យក្រសួងការបរទេសចិនថ្លែងកាលពីថ្ងៃទី២១ ខែកក្កដា ថា ជំនួយរបស់ចិនចំពោះកម្ពុជា
រាជធានីភ្នំពេញ ៖ យោងតាមទីភ្នាក់ងារព័ត៌មានចិនស៊ីនហួ បានឲ្យដឹងថា លោក LU KANG អ្នកនាំពាក្យក្រសួងការបរទេសចិនថ្លែងកាលពីថ្ងៃទី២១ ខែកក្កដា ថា ជំនួយរបស់ចិនចំពោះកម្ពុជាជាជំនួយដែលគ្មានលក្ខខណ្ឌនយោបាយណាមួយឡើយ ។
លោក LU KANG ថ្លែងបែបនេះ ជាការបដិសេធព័ត៌មានរបស់ទីភ្នាក់ងារព័ត៌មាន AP ដែលថា នាយករដ្ឋមន្ត្រីកម្ពុជាសម្តេចតេជោហ៊ុន សែន ប្រកាសថា ចិននឹងផ្តល់ជំនួយជិត៦០០លានដុល្លារដល់រាជរដ្ឋាភិបាលកម្ពុជាដើម្បីជួយទ្រទ្រង់ដល់ការបោះឆ្នោត ការកសាងហេដ្ឋារចនាសម្ព័ន្ធ អប់រំ និងសុខាភិបាលរបស់ប្រទេស ។ AP សរសេរទៀតថា ជាថ្នូរវិញកម្ពុជាត្រូវគាំទ្រចិនក្នុងបណ្តាកិច្ចការអន្តរជាតិ ក្នុងនោះរួមទាំងជម្លោះបច្ចុប្បន្នរវាងក្រុងប៉េកាំង និងប្រទេសអាស៊ីអាគ្នេយ៍ដទៃៗទៀតនៅសមុទ្រចិនខាងត្បូង ។
អ្នកនាំពាក្យក្រសួងការបរទេសចិនរូបនេះអះអាងថា ចិនចង់ឱ្យបណ្តាប្រទេសដែលទាក់ទិនកុំសម្លឹងមើលជំនួយចិនឱ្យកម្ពុជាជាមួយ«វ៉ែនតាផាត់ពណ៌» ។ ចិននិងកម្ពុជាប្រទេសកំពុងអភិវឌ្ឍន៍ទាំង២ជាប្រទេសជិតខាងគ្នា ហើយប្រទេសទាំង២ជាដៃគូសហប្រតិបត្តិការយុទ្ធសាស្ត្រ ដែលមានកិច្ចសហប្រតិបត្តិការដោយស្មោះត្រង់មួយចាប់តាំងពីយូរលង់មកហើយ រួចជួយទ្រទ្រង់គ្នាទៅវិញទៅមក ។
លោក LU KANG បន្តថា រយៈពេលប៉ុន្មានឆ្នាំចុងក្រោយនេះ ចិនបានផ្តល់ជំនួយ និងជួយទ្រទ្រង់ខាងហិរញ្ញវត្ថុដល់កម្ពុជាទៅតាមកម្រិតនៃសមត្ថភាពរបស់ខ្លួន ដើម្បីជួយកម្ពុជាជំរុញការអភិវឌ្ឍនិងកែលម្អជីវភាពប្រជាជន។ ជំនួយនេះ មួយផ្នែកធំសម្រាប់បណ្តាគម្រោងមានលក្ខណៈសង្គមក្នុងវិស័យសុខាភិបាល កសិកម្ម ការស្តុកទឹក វប្បធម៌ និងអប់រំ ដែលទទួលបានការស្វាគមន៍ពីសំណាក់ប្រជាជនកម្ពុជា។
ប្រធានរដ្ឋសភាកម្ពុជា សម្តេចអគ្គមហាពញាចក្រី ហេង សំរិន នឹងដឹកនាំប្រតិភូជាន់ខ្ពស់រដ្ឋសភាទៅបំពេញទស្សនកិច្ចផ្លូវការនិងមិត្តភាពនៅសាធារណរដ្ឋប្រជាមានិតចិនរយៈពេល៥ថ្ងៃ ដែលការធ្វើទស្សនកិច្ចនេះ គឺបន្ទាប់ពីចិនបានប្រកាសផ្តល់ជំនួយដល់កម្ពុជាជិត៦០០លានដុល្លារ ។
ក្នុងសេចក្តីជូនដំណឹងមួយរបស់រដ្ឋសភាចុះថ្ងៃទី២២ ខែកក្កដា គឺសម្តេចពញាចក្រី ហេង សំរិន នឹងដឹកនាំគណៈប្រតិភូទៅកាន់ប្រទេសចិនចាប់ពីថ្ងៃទី២៥ដល់ថ្ងៃទី២៩ ខែកក្កដា ឆ្នាំ២០១៦ ។ ក្នុងដំណើរទស្សនកិច្ចផ្លូវការនេះ សម្តេចពញាចក្រីគ្រោងជួបជាមួយអនុប្រធានាធិបតីចិនលោក Li Yuanchao ប្រធានក្រុមប្រឹក្សាពិគ្រោះយោបល់នយោបាយប្រជាជនចិន លោក Yu Zhensheng និងលោក Zhang Dejiang ប្រធានសភាប្រជាជនចិន ។
ជាមួយគ្នានេះ សម្តេចប្រធានរដ្ឋសភា ក៏នឹងចូលរួមកិច្ចប្រជុំរវាងអគ្គលេខាធិការដ្ឋានរដ្ឋសភានៃប្រទេសទាំងពីរកម្ពុជា-ចិនផងដែរ ។
គួររំឭកថា កាលពីថ្ងៃទី១៥ កក្កដា កន្លងទៅ ក្រោយពីការជួបពិភាក្សាគ្នារវាងសម្តេចតេជោនាយករដ្ឋមន្ត្រី ហ៊ុន សែន និងលោកនាយករដ្ឋមន្ត្រីចិន លី ខឺឈាង នៅក្នុងឱកាសនៃកិច្ចប្រជុំកំពូលអាស៊ី-អឺរ៉ុបនៅប្រទេសម៉ុងហ្គោលី ចិនបានប្រកាសផ្តល់ជំនួយឥតសំណងដល់កម្ពុជានូវទឹកប្រាក់ជិត៦០០លានដុល្លារសម្រាប់ពីឆ្នាំ២០១៦ដល់ឆ្នៃ២០១៨ ដោយផ្តោតលើវិស័យទឹកស្អាត ដំណើរការបោះឆ្នោត និងការអប់រំជាដើម ។
ទោះជាយ៉ាងណា ជំនួយនេះត្រូវបានមជ្ឈដា្ឋនមួយចំនួនមើលឃើញថា បានធ្វើឡើងក្រោយពីកម្ពុជាបានប្រកាសជំហរម្តងហើយម្តងទៀតថា បញ្ហាជម្លោះនៅសមុទ្រចិនខាងត្បូងមិនទាក់ទងនឹងអាស៊ាន និងជំហរមិនគាំទ្រដល់សេចក្តីសម្រេចរបស់តុលាការមជ្ឈត្តិការអន្តរជាតិដែលកាត់សេចក្តីឲ្យហ្វ៊ីលីពីនឈ្នះចិនក្នុងជម្លោះសមុទ្រចិនខាងត្បូង ដោយកម្ពុជាចង់ឲ្យភាគីទាំង២ដោះស្រាយទំនាស់ជាទ្វេភាគី ៕
ចែករំលែកព័តមាននេះ