រាជធានីភ្នំពេញ ៖ លោកម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបានឱ្យដឹងនារសៀលថ្ងៃទី២២ កក្កដា ២០១៦ នេះថា អាជ្ញាធរភ្នំពេញ បានកោះអញ្ជើញតំណាងក្រុមគ្រួសារសពលោកបណ្ឌិត កែម ឡី តំណាងដោយលោកស្រី ប៊ូ រចនា ជាភរិយា
រាជធានីភ្នំពេញ ៖ លោកម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបានឱ្យដឹងនារសៀលថ្ងៃទី២២ កក្កដា ២០១៦ នេះថា អាជ្ញាធរភ្នំពេញ បានកោះអញ្ជើញតំណាងក្រុមគ្រួសារសពលោកបណ្ឌិត កែម ឡី តំណាងដោយលោកស្រី ប៊ូ រចនា ជាភរិយា ដើម្បីប្រជុំពិភាក្សា និងបញ្ជាក់ចុងក្រោយអំពីផែនការ ដែលត្រូវដង្ហែរសពលោកបណ្ឌិត កែម ឡី យកទៅបញ្ចុះនៅខេត្តតាកែវ នៅថ្ងៃទី២៤ កក្កដា ២០១៦ ។
ជាលទ្ធផលនៃកិច្ចប្រជុំលើកទី៣នេះ មិនមានអ្វីប្រែលប្រួល ដូចអ្វីដែលបានសម្រេចរួមគ្នា កាលពីប្រជុំលើកទី២នោះទេ ដែលកិច្ចប្រជុំនេះ គឺជាការបញ្ជាក់ និងបញ្ចប់ ដែលអាជ្ញាធរបញ្ជាក់ពីកិច្ចសហប្រតិបត្តការ និងជួយសម្របសម្រួល ជាមួយក្រុមគ្រួសារសពបន្ថែមទៀត ។
លោកម៉េត មាសភក្តី បានបន្តថា តំណាងគ្រួសារសពបានលើកឡើងអំពីមហាជន ដែលបានចូលរួមដែលអ្នករៀបចំកម្មវិធី នឹងត្រូវរៀបជាផែនៗចំនួន១០ផែន គឺជាផែនសម្រាប់ក្រុមគ្រួសារសព ឥស្សរជន មហាជន និងយុវជនជាដើម ។ អ្នកនាំពាក្យរដ្ឋបាលរាជធានីភ្នំពេញ លោកម៉េត មាសភក្តី បានបញ្ជាក់ថា រដ្ឋបាលរាជធានីភ្នំពេញក្នុងផែនការដង្ហែរសពលោកបណ្ឌិត កែម ឡី នោះ រដ្ឋបាលរាជធានីភ្នំពេញ បានជួយរថយន្តសង្គ្រោះចំនួន២គ្រឿង ម៉ូតូក្បួនប៉ូលិសនាំមុខមួយគ្រឿង និងការជួយឧបត្ថមស្លាកសម្គាល់រថយន្ត សម្រាប់ហែក្បួនផងដែរ ។
គួររំលឹកថា ក្នុងកំណត់ហេតុប្រជុំលើកទីពីរ កាលពីថ្ងៃទី២១ កក្កដា ២០១៦ ដែលមានចុះហត្ថលេខារួមគ្នា រវាងគ្រួសារសពលោកបណ្ឌិតកែម ឡី និងលោកឃួង ស្រេង អភិបាលរងរាជធានីភ្នំពេញ ដែលធ្វើឡើងដោយរដ្ឋបាលរាជធានីភ្នំពេញ បានសរសេរថា ជាកិច្ចចាប់ផ្តើមនៃអង្គប្រជុំលោក ឃួង ស្រេង អភិបាលរងនៃគណៈអភិបាលរាជធានីភ្នំពេញបានមានប្រសាសន៍ថា កិច្ចប្រជុំថ្ងៃនេះគឺពិភាក្សាស្តីពីការដង្ហែសពលោកបណ្ឌិត កែម ឡី យកទៅបញ្ចុះនៅក្នុងខេត្តតាកែវ នៅថ្ងៃទី២៤ កក្កដា ឆ្នាំ២០១៦ ។
បន្ទាប់មក ប្រធានអង្គប្រជុំបានអនុញ្ញាតឱ្យក្រុមគ្រួសារនៃសពជម្រាបជូនអំពី ដំណើរការរៀបចំពិធីដង្ហែនេះ និងតម្រាយផ្លូវដែលត្រូវហែឆ្លងកាត់ ព្រោះរាជធានីភ្នំពេញសព្វថ្ងៃ កំពុងប្រឈមបញ្ហាចរាចរ ហើយម្យ៉ាងវិញទៀត អាជ្ញាធរខិតខំធ្វើយ៉ាងណា ឱ្យការដង្ហែក្បួនមានសុវត្ថិភាព និងស្នើសុំបញ្ជាក់អំពីកម្លាំងជួយក្នុងការដង្ហែសព និងញាតិមិត្តដែលចូលរួមដង្ហែ ។
លោកនឿន ចាន់នី បងថ្លៃសពបានលើកឡើងថា យើងខ្ញុំទាំងអស់គ្នា ដែលមានគ្រួសារសព និងគណៈកម្មការរៀបចំបុណ្យសព បាននិងកំពុងរៀបចំជាបណ្តើរនូវសម្ភារ សម្រាប់បម្រើឱ្យការងារដង្ហែសព ដូចជាបានទទួលរថយន្តចំនួន៣០គ្រឿង ក្នុងការដង្ហែ និងមានការឧបត្ភម្ថជាបន្តបន្ទាប់ទៀត តែគ្រួសារសពមិនទាន់បានទាក់ទង ។ គ្រួសារសព និងគណៈកម្មការរៀបចំបុណ្យសពនៅតែប្រកាន់ជំហរដដែល ដោយធ្វើការរំកិលសពរបស់លោកបណ្ឌិត ដើម្បីយកទៅបញ្ចុះនៅក្នុងភូមិអង្គតាកុប ឃុំលាយបូ ស្រុកត្រាំកក់ ខេត្តតាកែវ ដោយមានការចូលរួមពីគណៈកម្មការ និងអង្គការសង្គមស៊ីវិល ហែចេញពីវត្តចាស់ ឆ្លងកាត់លើស្ពានមិត្តភាពកម្ពុជា-ចិន (ជ្រោយចង្វារ) តាមបណ្ដោយមហាវិថីព្រះមុនីវង្ស រហូតដល់ស្តុបបត់ស្តាំតាមបណ្ដោយមហាវិថីសហព័ន្ធរស្ស៊ី រហូតដល់រង្វង់មូលចោមចៅតម្រង់ឆ្ពោះទៅកាន់ផ្លូវជាតិលេខ៣ ដើម្បីបន្តដំណើរទៅកាន់ភូមិអង្គតាកុប ឃុំលាយបូ ស្រុកត្រាំកក់ ខេត្តតាកែវ ។
ដូច្នេះ យើងខ្ញុំតំណាងនៃក្រុមគ្រួសារសព ស្នើសុំកិច្ចសហការពីអាជ្ញាធរមូលដ្ឋានលើ បញ្ហាការការពារសន្តិសុខនៃការដង្ហែសពលោកបណ្ឌិត និងទំនាក់ទំនងជាមួយអាជ្ញាធរខេត្តពាក់ព័ន្ធ ដើម្បីឱ្យសព បានទៅដល់ទីតាំងបញ្ចុះដោយសុវត្ថិភាព។ លោក ស៊ឹម
វុទ្ធី ស្នងការរងនគរបាលរាជធានីភ្នំពេញបានលើកឡើងដែរថា ក្នុងនាមជាសមត្ថកិច្ច ពិតជាមានការព្រួយបារម្ភ ព្រោះថ្មីៗនេះ មានជនឆ្លៀតឱកាសបានធ្វើការអំពាវនាវឱ្យមានការដង្ហែសពពេញរាជធានី ភ្នំពេញ ។
ដូចនេះ ក្រោយពីការឯកភាពធ្វើការដង្ហែតាមតម្រាយផ្លូវណាមួយគ្រួសារសព និងអ្នករៀបចំត្រូវអនុវត្តតាម ចៀសវាងមានជនមួយចំនួនឆ្លៀតឱកាសបង្វែរការហែសពខុសពីគោលដៅ ហើយនៅពេលហែខុសផ្លូវសមត្ថកិច្ចនិងធ្វើការឃាត់ព្រមទាំងណែនាំឱ្យហែ សពឱ្យបានត្រឹមត្រូវជាហេតុធ្វើឱ្យព្រលឹងសពមិនស្ងប់ ដូច្នេះក្នុងនាមសមត្ថកិច្ចសំណូមពរដល់គ្រួសារសពត្រូវមានជំហរ ច្បាស់លាស់ក្នុងការដង្ហែសព។
លោក កែម រិទ្ធិសិត ប្អូនប្រុសសព បាននិយាយថា លោកនៅតែមានជំហរដង្ហែសពតាមតម្រាយផ្លូវដែលបានស្នើសុំ ព្រោះថា កន្លងមក លោកតែងតែទទួលបានទូរស័ព្ទសំណូមពរ ពីមហាជនឱ្យមានការដង្ហែសពតាមដងផ្លូវនេះ ព្រោះនេះជាសពរបស់មហាជន។
លោក នឿន ចាន់នី បងថ្លៃសព បានស្នើសុំឱ្យអាជ្ញាធរ សមត្ថកិច្ចខិតខំជួយការពារឱ្យបានខ្លាំងក្លាក្នុងការដង្ហែសពនេះ ព្រោះមានការចូលរួមពីប្រជាពលរដ្ឋចម្រុះហើយមិនដឹងថាអ្នកណាខ្លះមាន បំណងបែបណាទេ ក្នុងនាមគ្រួសារនៃសព សូមថ្លែងអំណរគុណ អភិបាលរាជធានីភ្នំពេញ ដែលបានអនុញ្ញាតតាមតម្រាយផ្លូវដែលបានស្នើសុំ និងស្នើសុំឱ្យមានរថយន្តពេទ្យតាមក្បួនដង្ហែដើម្បីងាយស្រួលក្នុង ការសង្គ្រោះ។
ចំណែកលោក មាន ចាន់យ៉ាដា នាយករដ្ឋបាលសាលារាជធានីភ្នំពេញ បានមានប្រសាសន៍ថា សមត្ថកិច្ចពិតជាមានការព្រួយបារម្ភ ដូចការលើកឡើងរបស់លោកស្នងការរង ខាងលើ ហើយឃាតកម្មទៅលើលោកបណ្ឌិតកំពុងស្ថិតនៅក្នុងការស្រាវជ្រាវរបស់ សមត្ថកិច្ចនៅឡើយ។
ដោយឡែកសពរបស់បណ្ឌិតគឺជាសពរបស់គ្រួសារសព ចំពោះការ លើកឡើង ថា សពនេះជាសពរបស់មហាជននោះ គឺសូមបដិសេធន៍ទាំងស្រុង ។ ដូចនេះក្នុងនាមសមត្ថកិច្ចស្នើសុំឱ្យគ្រួសារសព និងគណៈកម្មការរៀបចំបុណ្យសពធ្វើការដង្ហែសពដោយប្រើប្រាស់រថយន្ត និងម៉ូតូ ហាមដាច់ខាតការ ដង្ហែសពដោយថ្មើរជើង និងត្រូវគោពតាមស្មារតីអង្គប្រជុំ ហើយការទទួលខុសត្រូវក្នុងក្បួនដង្ហែជាការទទួលខុសត្រូវរបស់គ្រួសារ និងអ្នករៀបចំ។
ក្នុងកិច្ចប្រជុំនោះ លោក ឃួង ស្រេង អភិបាលរង រាជធានី និងជាប្រធានអង្គប្រជុំមានប្រសាសន៍បន្ថែមទៀតថា ក្នុងនាមអាជ្ញាធរដែនដី បានខិតខំយកចិត្តទុកដាក់ក្នុងការរក្សាសន្តិសុខ សណ្តាប់ធ្នាប់ ពិសេសបញ្ចៀសការកកស្ទះចរាចរណ៍ក្នុងរាជធានីភ្នំពេញ ដូចនេះគ្រួសារសពត្រូវធ្វើការអំពាវនាដល់អ្នកចូលរួមដង្ហែត្រូវ រក្សាភាពស្ងប់ស្ងាត់ និងអនុវត្តតាមបែបព្រះពុទ្ធសាសនាដើម្បីបង្ហាញឱ្យឃើញថា ប្រជាពលរដ្ឋដែលចូលរួមដង្ហែពិតជាមានសីលធម៌សាកសមជាប្រជាពលរដ្ឋដែល មានវប្បធម៌ខ្ពង់ខ្ពស់ ។
ប្រសិនបើមានជនឆ្លៀតឱកាសប្រើប្រាស់ការដង្ហែសពបំរើឱ្យឆន្ទៈ នយោបាយ អាជ្ញាធរ និងចាត់វិធានការ ក្នុងគោលដៅ រក្សាសន្តិសុខ ក្នុងរាជធានីភ្នំពេញ ដោយឡែកសមត្ថកិច្ចពាក់ព័ន្ធមាន កងរាជអាវុធហត្ថរ នគរបាលរាជធានីភ្នំពេញ និងអាជ្ញាធរខណ្ឌពាក់ព័ន្ធត្រូវដាក់កម្លាំងការពារតាមដងផ្លូវដែល ក្បួនឆ្លងកាត់ ដើម្បីរក្សាបាននូវសន្តិសុខ និងសណ្តាប់ធ្នាប់។
ក្រោយពីពិភាក្សាគ្នារួចគ្រួសារសពបានឯកភាពជាមួយអង្គប្រជុំដូច ខាងក្រោម៖ ទី១-គ្រួសារនៃសព និងអ្នករៀបចំកម្មវិធីដង្ហែ បានឯកភាពជាមួយរដ្ឋបាលរាជធានីភ្នំពេញ ធ្វើការដង្ហែសពលោកបណ្ឌិតកែម ឡី នៅថ្ងៃទី២៤ កក្កដា ឆ្នាំ២០១៦ ដោយចាប់ចេញដំណើរពីវត្តពោធិ៍យារាម (ហៅវត្តចាស់) នៅវេលាម៉ោង០៧ព្រឹក ដោយប្រើរថយន្ត និងម៉ូតូ រួចចាប់ចេញដំណើរតាមផ្លូវជាតិលេខ៦ ឆ្លងកាត់ស្ពានមិត្តភាពកម្ពុជា-ចិន រួចបន្តដំណើតាមមហាវិថីព្រះមុនីវង្ស មហាវិថីសហព័ន្ធរុស្ស៊ីឆ្ពោះទៅរង្វង់មូលចោមចៅរួចបន្ត ។
ទី២ -ឯកភាពតាមសំណូមពរគ្រួសារនៃសព ត្រូវបង្កើតគណៈកម្មការការរៀបចំពិធីដង្ហែសព សម្រាប់ដោះស្រាយបញ្ហាផ្សេងៗ។ ទី៣-ដើម្បីឱ្យពិធីដង្ហែសពប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ របៀបរៀបរយសាធារណៈ គ្រួសារសពនិងអ្នករៀបចំពិធីដង្ហែត្រូវគោរពតាមលក្ខខណ្ឌដូចជា៖ កិច្ចការពារសន្តិសុខ សុវត្ថិភាព និងសណ្តាប់ធ្នាប់សាធារណៈក្នុងការដង្ហែសពអ្នករៀបចំកម្មវិធីជាអ្នក ទទួលខុសត្រូវការពារខាងក្នុងក្បួន សមត្ថកិច្ចទទួលខុសត្រូវការពារពីខាងក្រៅ ក្នុងករណីមានជនអុកឡុកក្នុងក្បួនដង្ហែ ត្រូវរាយការណ៍ជូនសមត្ថកិច្ចដើម្បីចាត់វិធានការបានទាន់ពេលវេលា -ក្បួនដង្ហែត្រូវដំណើរតែផ្នែកម្ខាងនៃដងផ្លូវដោយទុកផ្នែកម្ខាង ទៀត សម្រាប់ឱ្យសាធារណជនធ្វើចរាចរជាធម្មតាចៀសវាងបង្កការកកស្ទះចរាចរ – ចំពោះបដាដែលចូលរួមត្រូវមានខ្លឹមសារបែបចូលរួមមរណទុក្ខ និងមិនពាក់ព័ន្ធនឹងនយោបាយឡើយ -គ្រួសារសព និងអ្នករៀបចំកម្មវិធីដង្ហែសព ត្រូវធ្វើការជូនដំណឹងដល់សាធារណៈជន ឱ្យបានជ្រាបពីការដង្ហែសពគឺដង្ហែដោយរថយន្ត និងម៉ូតូមិនមានការដង្ហែដោយថ្មើរជើងឡើយ ហើយត្រូវរក្សាភាពស្ងៀមស្ងាត់ដោយអនុវត្តតាមបែបព្រះពុទ្ធសាសនា ប្រពៃណី និងទំនៀមទំលាប់ខ្មែរ – មន្ទីរធម្មការនិងសាសនារាជធានីភ្នំពេញ ត្រូវសហការជាមួយអាចារ្យវត្តព្រមទាំងគ្រួសារនៃសព ដើម្បីរៀបចំការដង្ហែឱ្យបានគ្រប់ជ្រុងជ្រោយតាមបែបព្រះពុទ្ធសាសនា – មន្ទីរសុខាភិបាលរាជធានីភ្នំពេញត្រូវចាត់រថយន្តសង្គ្រោះចំនួន ០២គ្រឿង សម្រាប់តាមក្បួននិងត្រៀម មន្ទីរពេទ្យបង្អែកជុំវិញដងផ្លូវក្បួនដង្ហែសពដើម្បីងាយស្រួលក្នុង ការសង្គ្រោះ។ ដោយឡែកស្នងការនគរបាលរាជធានីភ្នំពេញត្រូវចាត់ម៉ូតូស៊ឺរែន០១គ្រឿង ដើម្បីនាំក្បួន – ស្នងការនគរបាល និងកងរាជអាវុធហត្ថរាជធានីភ្នំពេញត្រូវទំនាក់ទំនងទៅអាជ្ញាធរ ខេត្តកណ្តាល កំពង់ស្ពឺ តាកែវ ដើម្បីសម្របសម្រួលក្នុងដែនសមត្ថកិច្ចរបស់ខ្លួនធ្វើយ៉ាងណាឱ្យក្បួន ដង្ហែសពតាមទៅដល់គោលដៅបញ្ចុះតែម្តង ។ ចំណែកខណ្ឌពាក់ព័ន្ធត្រូវចាត់កម្លាំងការពារតាមដងផ្លូវក្នុងដែន សមត្ថកិច្ចរបស់ខ្លួនផងដែរ ។
សូមបញ្ជាក់ថា មានរយៈពេលពីរថ្ងៃហើយ គឺថ្ងៃទី២០ និង២១កក្តដា ដែលអាជ្ញាធរភ្នំពេញបានកោះប្រជុំ រវាងក្រុមគ្រួសារសពលោកបណ្ឌិត កែម ឡី តំណាងដោយ លោកស្រី ប៊ូ រចនា ជាភរិយា និងលោក នឿន ចាន់នី បងថ្លៃសព និងលោក កែម រិទ្ធិសិត ប្អូនប្រុសសព ជាមួយលោក ឃួង ស្រេង អភិបាលរងរាជធានីភ្នំពេញ និងមន្ត្រីពាក់ពន្ធ័មួយចំនួនទៀត ដើម្បីពិភាក្សាអំពីតម្រាយផ្លូវ និងការរៀបចំផែនការជួយសម្រួលសន្តិសុខ និងសណ្តាប់ធ្នាប់ចរាចរណ៏ ឲ្យដំណើរការដង្ហែរសព្វ លោកបណ្ឌិត កែម ឡី បានទៅដល់គោលដៅដោយសុវត្ថិភាពតែម្តង ។
ចែករំលែកព័តមាននេះ