ក្នុងឱកាសធ្វើសមយុទ្ធយោធាមួយនៅដែនទឹក GIBRALTAR នាវាមុជទឹកនុយក្លេអ៊ែរអង់គ្លេសមួយគ្រឿង គឺនាវា HMS AMBUSH ពេលមុជក្នុងទឹកបានបុកប៉ះនឹងនាវាពាណិជ្ជកម្មមួយគ្រឿងកាលពីថ្ងៃទី២០ កក្កដា កន្លងមកនេះ នាវេលាម៉ោងប្រមាណជា១៣និង៣០នាទីម៉ោងក្នុងស្រុក ។
រ៉ូយ៉ាល់ណាវីតាមរយៈសេចក្តីប្រកាសមួយគូសបញ្ជាក់ថា នាវាមុជទឹកនេះរងការខូចខាតខ្លះនៅផ្នែកខាងក្រៅ ក៏ប៉ុន្តែរេអាក់ទ័រនុយក្លេអ៊ែររបស់វាពុំរងការខូចខាតណាមួយឡើយ រួចក៏គ្មានសមាជិកក្រុមនាវិកណាម្នាក់រងរបួសដែរក្នុងឧប្បត្តិហេតុនេះ ។ ដោយពុំផ្តល់ភាពលម្អិតផ្សេងទៀតលើនាវាស៊ីវិល កងម៉ារីនអង់គ្លេសអះអាងថា យើងបានទាក់ទងជាមួយនាវាកាហ្គោ ហើយព័ត៌មានដំបូងៗដែលទទួលបានគឺថា នាវានេះពុំរងការខូចខាតឡើយ ។
ទោះបីយ៉ាងណាសម្បកនាវាមុជទឹក HMS, AMBUSH រងការខូចខាតខ្លាំងគួរសម ។ យ៉ាងហោចណាស់នាវាមុជទឹកនេះក៏ត្រូវបង្ខំចិត្តឈប់សំចតដោយគ្មានគ្រោងទុកនៅ GIBRALTAR ដែរ ។
ម្យ៉ាងវិញទៀត ក្រសួងការបរទេសអេស្ប៉ាញក៏បានស្នើឱ្យមានការពន្យល់ជាបន្ទាន់លើការវង្វេងរបស់នាវាមុជទឹក HMS AMBUSH បែបនេះ ព្រមទាំងផ្តល់រាល់ព័ត៌មានចាំបាច់ទាក់ទិននឹងឧប្បត្តិហេតុនោះ ។ ខាងអង្គការការពារបរិស្ថានក៏ស្នើឱ្យមានការបំភ្លឺដែរ។ លោក ANTONIO MUNOZ អ្នកនាំពាក្យរបស់អង្គការ ECOLOGISTAS EN ACCION បញ្ចេញប្រតិកម្មថា យើងពុំដឹងពីកន្លែងដែលមានការបុកគ្នានេះឡើយរួច ប្រសិនបើនាវាកាហ្គោនេះជានាវាដឹកប្រេង រងការបុក ហើយធ្លាយប្រេងវាពិតជាធ្វើឱ្យប៉ះពាល់ខ្លាំងបំផុតដល់បរិស្ថាន ។
ពុំមែនជាលើកដំបូងទេដោយនាវាមុជទឹកមួយគ្រឿងរបស់អង់គ្លេសទៅកាន់ GIBRALTAR ដោយសារហេតុផលបច្ចេកទេសនោះ ៕
ចែករំលែកព័តមាននេះ