ខេត្ដកណ្ដាល ៖ ចាត់ទុកថា ជាបាតុភាពហិង្សាមួយដែលមិនធ្លាប់កើតមានកន្លងមករវាងក្រុមអុងឌៀ(ទីងមោង) រៃអង្គាស ក្នុងរដូវហែទៀនវស្សា ។ ការផ្ទុះហិង្សានេះ ខណៈដែលក្បួនទាំង២មកពីវត្ដផ្សេងគ្នាបាន កើតជាជំលោះដាក់គ្នារហូតដល់ក្រុមអ្នក លោតអុងឌៀដោះទីងមោងអុងឌៀចេញ ហើយវាយតប់គ្នាយ៉ាងអនាធិបតេយ្យ ។ តាមប្រភពព័ត៌មានជុំវិញហេតុការណ៍នេះ ត្រូវបានរាយការណ៍ឱ្យដឹងថា ក្រុមយុវជន ដង្ហែទៀនព្រះវស្សារៃអង្គាស ប្រាក់២ក្រុម ដែលមានគ្នាជាង១០នាក់បានបើកឆាក ប្រយុទ្ធគ្នា ខណៈពេលក្បួនដង្ហែរបស់ពួកគេជួបគ្នា ហើយអុងឌៀទាំងពីរក្រុមដែលរាំ បែបចំអកឱ្យគ្នាបានស្ទុះទៅវាយតប់គ្នា ចំណែកអ្នកវាយស្គរ និងអ្នកជួយដង្ហែក៏បាន ជួយក្រុមរបស់ខ្លួនដែរ ធ្វើឱ្យក្លាយទៅជាឆាក ប្រយុទ្ធកាន់តែធំ បើទោះបីជាតាអាចារ្យ ទាំងសងខាងបានព្យាយាមឃាត់ក៏មិនស្ដាប់ ។ ការប្រទូស្ដរ៉ាយដាក់គ្នានេះបណ្ដាលឱ្យខូចខាតអុងឌៀ(ទីងមោង) និងរងរបួសយុវជន អ្នកប្រយុទ្ធ៦នាក់ ។ សមត្ថកិច្ចប៉ូលិសដែល ត្រូវបានបញ្ជូនទៅធ្វើអន្ដរាគមន៍បានឃាត់ ខ្លួនយុវជនទាំងពីរក្រុមចំនួន១៦នាក់ ។
ហេតុការណ៍ក្រុមយុវជនរៃអង្គាសប្រាក់ បើកឆាកប្រយុទ្ធគ្នានេះកើតឡើងកាលពី វេលាម៉ោង៧ និង២០នាទីព្រឹក ថ្ងៃទី២២ ខែកក្កដា ឆ្នាំ២០១០ នៅលើដងផ្លូវជាតិ លេខ២១ព នៅភូមិព្រែកថ្មី ឃុំទឹកវិល ស្រុកស្អាង ។ ហេតុការណ៍ នេះបានធ្វើឱ្យផ្អើល ប្រជាពលរដ្ឋនៅទីនោះ និងអ្នកដំណើរឈប់ ចោមរោមមើលគ្រប់ៗគ្នា ។ លោកម៉ាំង ពេច អធិការប៉ូលិសស្រុកស្អាងបានឱ្យដឹងថាក្រោយពីបានទទួលសេចក្ដីរាយការណ៍ថា មានករណីក្រុមអ្នកដង្ហែទៀន ព្រះវស្សា២ក្រុមបានប៉ះទង្គិចគ្នា នឹងក្លាយទៅជាអំពើហិង្សានោះ លោកបានបញ្ជាឱ្យកំលាំងប៉ូលិស ស្រុកស្អាងចុះទៅធ្វើការចាប់ខ្លួនយុវជនទាំងពីរក្រុមបាន១៦នាក់ ។ លោកបានឱ្យដឹងទៀតថា ក្រុមដង្ហែទៀនព្រះវស្សា មួយក្រុមមកពីវត្ដកំពង់ស្វាយ នៅឃុំកំពង់ស្វាយ ស្រុកកៀនស្វាយឃាត់បានយុវជន១១នាក់ និងអុងឌៀ (ទីងមោង)មួយគូ ។ ចំណែកមួយក្រុមទៀត គឺមកពីវត្ដជម្ពូវ័ន ហៅវត្ដតាកុយ នៅឃុំស្វាយប្រទាលស្រុកស្អាង ឃាត់បាន យុវជន៥នាក់ និងអុង ឌៀមួយគូ ព្រមទាំងរទេះរុញ និងមេក្រូផងដែរ ។
សាក្សីបានឱ្យដឹងថា ក្រុមរៃអង្គាសបច្ច័យ វត្ដជម្ពូវ័នដង្ហែពីត្បូង ទៅជើងលើផ្លូវជាតិ ដោយមានចាក់មេក្រូ និងវាយស្គរផង ចំណែកក្រុមរៃអង្គាសរបស់វត្ដកំពង់ស្វាយ ដង្ហែពីជើងទៅត្បូង ដោយមានអុងឌៀ (ទីង មោង) និងចាក់មេក្រូវាយស្គរដូចគ្នា ។ ខណៈ នោះក្រុមរៃអង្គាសទាំងពីរក្រុមមកទល់គ្នា នៅភូមិព្រែកថ្មី ឃុំទឹកវិល អុងឌៀទាំងពីរ ក្រុមបានរាំកុងគ្នារហូតដល់អុងឌៀទាំងពីរ ក្រុមវាយគ្នាទៅវិញទៅមកបណ្ដាលឱ្យអុងឌៀ ខាងក្រុមវត្ដជម្ពូវ័នបាក់.កក្រពឹតក្បាល ។ ពេលនោះក្រុមយុវជនដែលជួយដង្ហែទាំងពីរ ក្រុមបានចូលទៅជួយក្រុមរបស់ខ្លួន ហើយបានបើកឆាកប្រយុទ្ធគ្នា ដោយខ្លះប្រើដំបង វាយស្គរជាអាវុធ ខ្លះទៀតប្រយុទ្ធគ្នាដោយ ផ្ទាល់ដៃ ចំណែកអ្នកនៅក្នុងអុងឌៀបាន ចេញពីក្នុងអុងឌៀប្រយុទ្ធគ្នាដោយផ្ទាល់តែម្ដង ។ ចំណែកតាអាចារ្យទាំងសងខាងបាន ព្យាយាមឃាត់ក្រុមយុវជនរបស់ខ្លួនដែរ ។ តែដោយឆាកប្រយុទ្ធកាន់តែក្ដៅខ្លាំងទៅ ហើយការឃាត់នោះមិនមានប្រសិទ្ធភាពនោះឡើយ ។ បន្ទាប់មកតាអាចារ្យក៏កាន់ផ្ដិលដាក់ ប្រាក់រៃអង្គាសរត់ចែកផ្លូវគ្នាបាតជើងសព្រាត ។ ចំណែកលទ្ធផលនៃការប្រយុទ្ធបណ្ដាលឱ្យរបួសយុវជនទាំងសងខាង៦នាក់ស្រាល។
ក្រោយកើតហេតុ ប៉ូលិសស្រុកស្អាងបាន ចុះទៅដល់ និងបានធ្វើការឃាត់ខ្លួនយុវជន ខាងក្រុមវត្ដកំពង់ស្វាយ១១នាក់ និងយុវជនខាងក្រុមវត្ដជម្ពូវ័ន៥នាក់ ។ លោកម៉ាំង ពេច បានឱ្យដឹងទៀតថា ក្រោយពីឃាត់ខ្លួនក្រុម ដង្ហែទៀនព្រះវស្សារៃប្រាក់រួចមកលោក បានសហការជាមួយមន្ទីរធម្មការស្រុកស្អាង ធ្វើការត្រួតពិនិត្យលើលិខិតស្នាមអនុញ្ញាតសុំ ច្បាប់ហែទៀនព្រះវស្សា ឃើញថា ខាងក្រុមវត្ដកំពង់ស្វាយមានលិខិតអនុញាតចេញ ដោយមន្ទីរធម្មការស្រុកកៀនស្វាយ ចំណែកវត្ដជម្ពូវ័នមានលិខិតអនុញ្ញាតចេញដោយ មេឃុំស្វាយប្រទាល ។ លោកបានបញ្ជាក់ទៀតថា ក្រោយពីត្រួតពិនិត្យលើលិខិតស្នាម រួចមក លោកនិងខាងធម្មការស្រុកបានធ្វើការអប់រំ ហើយប្រគល់សំភារដង្ហែទៀនព្រះវស្សា និងក្រុមយុវជនទាំងអស់ឱ្យត្រឡប់ ទៅវិញ ដោយសារភាគីទាំងសងខាងមិនបាន ធ្វើការប្ដឹងប្ដល់គ្នាទេ ។ មានការកត់សំគាល់ថា ការដង្ហែទៀន ព្រះវស្សាឆ្នាំនេះមានវត្ដជាច្រើនបានចាប់ ផ្ដើមចេញដង្ហែដើម្បីរៃអង្គាសបច្ច័យច្រើន ជាងឆ្នាំមុនៗនៅតាមភូមិ-ឃុំក្នុងស្រុកស្អាង និងស្រុកកោះធំ ពិសេសតាមផ្លូវជាតិលេខ ២១B និងត្រើយខាងកើតទន្លេបាសាក់ ៕
ចែករំលែកព័តមាននេះ