រាជធានីភ្នំពេញ ៖ ជនសង្ស័យជាឃាតករ ដែលបានកាប់សម្លាប់យុវជនជាសិស្សសាលាជម្ពូវ័នម្នាក់ស្លាប់ក្នុងថ្លុកឈាម កាលពីជាង១ខែមុននោះ ត្រូវកម្លាំងនគរបាលព្រហ្មទណ្ឌខណ្ឌពោធិ៍សែនជ័យ សហការជាមួយកម្លាំងនគរបាលប៉ុស្តិ៍ចោមចៅ និងកម្លាំងនគរបាលព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួនបានចំនួន៣នាក់ហើយ និងបក្សពួក៤នាក់ទៀតកំពុងបន្តរក ព្រោះគេចខ្លួននៅឡើយ ។
ប្រតិបត្តិការនេះធ្វើឡើង កាលពីវេលាម៉ោង២រសៀលថ្ងៃទី២១ កក្កដា ២០១៦ ដែលម្នាក់ចាប់បាន គឺនៅចំណុចក្នុងភូមិត្រពាំងពោធិ៍ សង្កាត់ចោមចៅ និងម្នាក់ទៀតចាប់បាននៅចំណុចម្ដុំរោងចក្រកាត់ដេរសាន់ស្កាយ ក្នុងភូមិត្រពាំងជ្រៃ សង្កាត់កាកាប និងភូមិសំរោង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យដែលត្រូវចាប់ខ្លួននោះ ១-ឈ្មោះនឿន មករា អាយុ២៥ឆ្នាំ ជាជាងជួសជុលរថយន្ត មានទីលំនៅក្នុងភូមិសំរោង សង្កាត់សំរោងក្រោម ខណ្ឌពោធិ៍សែនជ័យ ២-ឈ្មោះសៅ វត្តី អាយុ២០ឆ្នាំ ស្នាក់នៅម្ដុំរោងចក្រ QMI ភូមិត្រពាំងពោធិ៍ ខណ្ឌពោធិ៍សែនជ័យ និង៣-ឈ្មោះហុង សៀងអ៊ី អាយុ១៦ឆ្នាំ ជាសិស្សសាលាជម្ពូវ័ន មានទីលំនៅក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ ទាំង៣នាក់នេះត្រូវចាប់ខ្លួនបាននៅផ្ទះរបស់ខ្លួនតែម្ដង ។
ដោយឡែកបក្សពួក៤នាក់ទៀតកំពុងរត់គេចខ្លួន រីឯយុវជនរងគ្រោះដែលត្រូវក្រុមឃាតករកាប់រហូតដល់ស្លាប់នោះឈ្មោះអឿន សាមន អាយុ២២ឆ្នាំ គឺជាសិស្សនៅសាលាជម្ពូវ័ន និងមានទីលំនៅក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ។
គួររំលឹកថា ហេតុការណ៍កាប់សម្លាប់គ្នានោះ បានកើតឡើង កាលពីវេលាម៉ោង៧ និង៥០នាទីយប់ ថ្ងៃទី១៣ មិថុនា ២០១៦ ស្ថិតនៅតាមផ្លូវបេតុងចូលផ្សារឯករាជ្យ២ មុខហាងលក់ស៊ុបយីហោ «ស្រីខួច» ស្ថិតនៅក្នុងភូមិព្រៃព្រីខាងជើង សង្កាត់ចោមចៅ ខណ្ឌពោធិ៍សែនជ័យ ។
ក្រោយពេលកើតហេតុ កម្លាំងនគរបាលបានឃាត់ខ្លួនជនសង្ស័យ៤នាក់ មាន១-ឈ្មោះយន់ ចាន់ណារ៉ុង អាយុ៣០ឆ្នាំ ស្នាក់នៅសង្កាត់ចោមចៅ ខណ្ឌពោធិសែនជ័យ ២-ឈ្មោះប៉ែន សុផាន់ណា អាយុ១៧ឆ្នាំ ជាសិស្ស ៣-ឈ្មោះប៉ែន សុផានិត អាយុ ១៧ឆ្នាំ មុខរបរសិស្ស ទាំង២នាក់ជាបងប្អូនភ្លោះ និង៤-ឈ្មោះសុង គិមហៀក អាយុ១៧ឆ្នាំ ជារោងចក្រផលិតបារី យកទៅសាកសួរ នៅផ្នែកនគរបាលព្រហ្មទណ្ឌ ខណ្ឌពោធិ៍សែនជ័យភ្លាមៗដែរ ប៉ុន្តែក្រោយពេលសួរនាំ ទើបដឹងថាអ្នកដែលឃាត់ខ្លួននោះ គឺមិនមែនក្រុមជនដៃដល់ឡើយ គឺជាមិត្តភក្ដិជនរងគ្រោះទាំងអស់ ។
បន្ទាប់ពីប្រមូលបានព័ត៌មាន នគរបាលបានឱ្យមិត្តភក្ដិជនរងគ្រោះត្រឡប់ទៅផ្ទះវិញ និងបន្តធ្វើការស្រាវជ្រាវរហូតមកដល់ពេល នេះ ទើបចាប់ខ្លួនបាន២នាក់ ។ ប្រភពដដែលបន្តថា នៅមុនពេលឈានដល់ការកាប់សម្លាប់គ្នានោះ២ថ្ងៃ គឺនៅវេលាល្ងាចថ្ងៃទី១១ មិថុនា រវាងក្រុមជនរងគ្រោះ និងក្រុមជនសង្ស័យ បានមានទំនាស់វាយតប់គ្នាម្តង ប៉ុន្តែមិនដឹងថា ដោយសារតែរឿងអ្វីនោះទេ ហើយក៏មានការស្ងប់ស្ងាត់ទៅវិញ ។
លុះដល់ថ្ងៃកើតហេតុ ពួកគេបានណាត់ជួបគ្នាម្ដងទៀត នៅក្រោយសាលាបង្រៀនអង់គ្លេស DPSC ក្បែរចំណុចកើតហេតុខាងលើ ដើម្បីធ្វើការសម្របសម្រួលគ្នា កុំឲ្យមានគំនុំគ្នាទៅថ្ងៃក្រោយទៀត ។ ក្រុមជនរងគ្រោះបាននាំគ្នាទៅតាមការណាត់ ដោយមិនមានការប្រុងប្រយ័ត្ននោះឡើយ ។
ដោយឡែក ក្រុមជនសង្ស័យវិញ បានទៅតាមលារណាត់ដែរ ប៉ុន្តែពួកគេក៏បានត្រៀមនូវប្រដាប់ឈ្នះ គឺដាវសាមូរ៉ៃ ទៅជាមួយផងដែរ ដោយគិតថា បើសិនការសម្របសម្រួលគ្នាត្រូវរ៉ូវនោះ មិនអីទេ ប៉ុន្តែក្រែងមិនត្រូវគ្នាអាចប្រយុទ្ធគ្នាម្តងទៀត ។ ប្រភពខាងលើបានបន្តទៀតថា លុះពេលបានជួបនិយាយគ្នាហើយ ក្រោយពេលនិយាយគ្នារួចមក ពួកគេក៏បែកផ្លូវគ្នា ហើយជនរងគ្រោះបានឡើងជិះម៉ូតូត្រឡប់ទៅផ្ទះវិញរៀងខ្លួន ។
ដោយឡែក ក្រុមជនសង្ស័យ ប្រដាប់ដោយដាវសាមូរ៉ៃ និងដំបង បានជិះម៉ាកយ៉ាម៉ាហា FZ មួយគ្រឿងតាមក្រោយ រហូតដល់ចំណុចកើតហេតុមុខហាងលក់ស៊ុប «ស្រីខួច» វាយកាប់ទៅលើក្រុមជនរងគ្រោះទាំងកម្រោល ហើយមិត្តភក្ដិជនរងគ្រោះជិះម៉ូតូរត់រួច ។ រីឯជនរងគ្រោះជិះរត់មិនទាន់ ព្រោះជិះម៉ូតូតូចជាងគេម៉ាក Today កម្លាំង៥០CC ក៏ត្រូវជនបង្កព្រួតគ្នាកាប់រហូតដេក ស្លាប់ក្នុងថ្លុកឈាមតែម្តង ៕
ចែករំលែកព័តមាននេះ