ឃាត់រថយន្តពីរគ្រឿងដឹកផលសមុទ្រឆ្លងដែនខុសច្បាប់
ខេត្តកំពត ៖ រថយន្តម៉ាកហ៊ីយ៉ានដាយ(ទួរីស)ពីរគ្រឿងបានត្រូវកំលាំងសមត្ថកិច្ចមន្ទីរយុត្តិធម៌កងរាជអាវុធហត្ថខេត្តសហការជាមួយស្ថាប័នតុលាការ ដោយមានការចូលរួម
ខេត្តកំពត ៖ រថយន្តម៉ាកហ៊ីយ៉ានដាយ(ទួរីស)ពីរគ្រឿងបានត្រូវកំលាំងសមត្ថកិច្ចមន្ទីរយុត្តិធម៌កងរាជអាវុធហត្ថខេត្តសហការជាមួយស្ថាប័នតុលាការ ដោយមានការចូលរួមពី លោក ខៃ សម្ផស្ស ព្រះរាជអាជ្ញារងអមសាលាដំបូងខេត្តបានចុះពិនិត្យ និងបានឃាត់ក្រោយពីដឹងថារយន្តដឹកជលផលសមុទ្រ(បង្គាស្រស់) ទាំងពីរគ្រឿងនេះគ្មានលិខិតបង់ពន្ធត្រឹមត្រូវតាមច្បាប់។ ការឃាត់រថយន្តទាំងពីរគ្រឿងនេះបានធ្វើឡើងកាលពីវេលាម៉ោង១២និង០០នាទីថ្ងៃត្រង់ ថ្ងៃទី២០ ខែកក្កដា ឆ្នាំ២០១៦ នៅចំណុចច្រកទ្វារតន់ហន់ ស្ថិតក្នុងភូមិព្រែកក្រើស ឃុំព្រែកក្រើស ស្រុកកំពង់ត្រាច ខេត្តកំពត។
លោកវរៈសេនីយទោ ហែម ចន្ទ័ដារ៉ា មេបញ្ជាការរង និងជាប្រធានមន្ទីរយុត្តិធម៌នៃកងរាជអាវុធហត្ថខេត្តបានប្រាប់អ្នកយកពត៌មានថា ដោយមានការសហការជាមួយស្ថាប័នតុលាការ ដោយមានការចូលរួមពីលោក ខៃ សម្ផស្ស ព្រះរាជអាជ្ញារងអមសាលាដំបូងខេត្ត កម្លាំងមន្ទីរយុត្តិធម៌ នៃកងរាជអាវុធហត្ថខេត្តបានចុះដល់ទីតាំងខាងលើដើម្បីពិនិត្យ និងបង្ក្រាបបទល្មើសជាក់ស្តែង ហើយក៏បានឃាត់រថយន្តម៉ាកហ៊ីយ៉ាន់ដាយ(ទួរីស)ពណ៌ស និងពណ៌ខៀវពីរគ្រឿងដឹកផល ជលផល (បង្គាស្រស់) ចេញពីប្រទេសវៀតណាមតាមច្រកទ្វារខាងលើ ដោយគ្មានលិខិតបង់ពន្ធត្រឹមត្រូវពីស្ថាប័នគយ និងរដ្ឋាករខេត្ត។
លោកបន្តទៀតថា រថយន្តពណ៌ខៀវពាក់ស្លាកលេខភ្នំពេញ 2P-4711ម្ចាស់មានឈ្មោះ ចាប ប៊ិន ភេទប្រុស អាយុ២៥ឆ្នាំ ក្រោយពីសមត្ថកិច្ចឃាត់រថយន្តម្ចាស់រថយន្តឈ្មោះនេះបានបង្ហាញឯកសារដល់សមត្ថកិច្ច ក្នុងនោះសមត្ថកិច្ចបានពិនិត្យឃើញលិខិតអនុញាតលេខ០១៨៣៦ជផចុះថ្ងៃទី៤ ខែកក្កដា ឆ្នាំ២០១៦ ក្រៅពីនេះពុំមានឃើញលិខិតស្នាមបង់ពន្ធពីស្ថាប័នគយ និងរដ្ឋាករឡើយ។ ចំណែកម្ចាស់រថយន្តពណ៌សមានឈ្មោះ អ៊ឹង ឈឿន ភេទប្រុស អាយុ៤២ឆ្នាំ ក៏បានបង្ហាញឯកសារ គេឃើញមានលិខិតអនុញ្ញាតលេខ០១៨៣៦ជផចុះថ្ងៃទី៤ ខែកក្កដា ឆ្នាំ២០១៦ ដែលហួសសុពលភាព និងពុំមានលិខិតស្នាមបញ្ជាក់ពីការបង់ពន្ធដែរ។ លោកបានបន្តទៀតថា រថយន្តទាំងពីរគ្រឿងដែលសមត្ថកិច្ចឃាត់នេះមានផ្ទុកផល ជលផលសមុទ្របង្គាស្រស់ចំនួន៥ធុងក្លាស្សេ។
ដោយពិនិត្យឃើញការធ្វើអាជីវកម្មខុសច្បាប់ខាងលើ លោកព្រះរាជអាជ្ញាបានអនុញ្ញាតឲ្យកម្លាំងកងរាជអាវុធហត្ថខេត្តនាំរថយន្តទាំងពីរគ្រឿងនិងផល ជលផលទាំងអស់នាំមកកាន់ទីបញ្ជាការដ្ឋានកងរាជអាវុធហត្ថខេត្តដើម្បីរង់ចាំគោលការណ៍លើករណីនេះជូនទៅសមត្ថកិច្ចសាខាគយ និងរដ្ឋាករខេត្តដើម្បីមានចំណាត់ការបង់ពន្ធត្រឹមត្រូវតាមច្បាប់។ គួររំលឹកផងដែរថា កន្លងមកម្ចាស់បង្គាឈ្មោះ នៅ ម៉ក់ បានធ្លាប់ធ្វើកិច្ចសន្យាកាលពីថ្ងៃទី២ ខែមករា ឆ្នាំ២០១៦កន្លងមកម្តងរួចមកហើយ ដោយសន្យាជាមួយសមត្ថកិច្ចពាក់ពន្ធ័ថា លើកក្រោយៗខ្លួននឹងបំពេញបែបបទឲ្យបានត្រឹមត្រូវតាមផ្លូវច្បាប់។ ប៉ុន្តែមកដល់ពេលនេះម្ចាស់អាជីវកម្មដឹកបង្គាស្រស់ឈ្មោះនេះបានដឹកជញ្ជូនផល ជលផលសមុទ្រ(បង្គាស្រស់)ឆ្លងកាត់ពីប្រទេសវៀតណាមចូលដល់ស្រុកខ្មែរ នៅតែគ្មានលិខិតអនុញ្ញាតត្រឹមត្រូវ និងពុំមានការបង់ពន្ធជូនគយឡើយ៕
ចែករំលែកព័តមាននេះ