ខេត្តបាត់ដំបង ៖ ជនម្នាក់ដែលគេសង្ស័យថា ជាចោរបានស្លាប់ដោយសារតែឆក់ខ្សែចរន្តអគ្គិសនី ក្នុងគ្រាដែលប៉ុនប៉ងចូលលួចទ្រព្យសម្បត្តិស្ត្រីមេម៉ាយម្នាក់ កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី១ មីនា នេះ នៅក្នុងក្រុមទី៨ ភូមិបោះពោធិ៍ ឃុំអូរដំបង១ ស្រុកសង្កែ ។
មន្ត្រីនគរបាលមូលដ្ឋានបាននិយាយថា ជនសង្ស័យនោះ បានស្លាប់ផ្កាប់មុខក្រោមសំយាបផ្ទះស្ត្រីមេម៉ាយកូនមួយម្នាក់ឈ្មោះ ឈួន សាលី ហៅច្រិប អាយុ៤៣ឆ្នាំ រស់នៅភូមិ-ឃុំខាងលើ ។ ឯជនសង្ស័យត្រូវគេស្គាល់ថា ឈ្មោះឈូក សារឿន ហៅភ័ក្រ អាយុ២៣ឆ្នាំ រស់នៅឃុំព្រែកនរិន្ទ ស្រុកឯកភ្នំ ។ ជននេះស្លាប់ដោយសារឆក់ខ្សែចរន្តអគ្គិសនី ដែលស្ត្រីមេម៉ាយខាងលើដាក់ពង្រាយក្រោមផ្ទះរបស់គាត់ ដើម្បីការពារទ្រព្យសម្បត្តិ ហើយបុរសនេះទំនងប៉ុនប៉ងចូលក្រោមផ្ទះក្នុងគោលបំណងមិនល្អ ទើបជួបសំណាងអាក្រក់បែបនេះ ។
តាមការបំភ្លឺពីម្ចាស់ផ្ទះ អ្នកស្រីឈួន សាលី បានប្រាប់សមត្ថកិច្ចថា គាត់ដេកតែម្នាក់ឯងនៅលើផ្ទះនេះ ដោយសារកន្លងមកមានចោរចូលលួចទ្រព្យសម្បត្តិរបស់គាត់មិនឈប់ឈរសោះ ដូច្នេះហើយទើបគាត់ប្រើវិធីនេះដើម្បីរកមុខចោរម្តង ។ អ្នកស្រីនិយាយថា ក្នុងគ្រាដែលគាត់សម្រាកលក់នាវេលានោះ ស្រាប់តែឮសំឡេងស្រែកក្រោមផ្ទះ រួចគាត់បើកភ្លើងបំភ្លឺខាងក្រៅ ហើយចុះមកមើលក៏ឃើញបុរសនោះដេកស្តូក ហើយរូបគាត់ក៏ប្រាប់អ្នកជិតខាង និងរាយការណ៍ទៅសមត្ថកិច្ចមូលដ្ឋានទាំងយប់តែម្តង ៕
ចែករំលែកព័តមាននេះ