រាជធានីភ្នំពេញ ៖ នៅយប់ថ្ងៃទី២២ កក្កដា នេះ កីឡាករជើងខ្លាំង២រូប គឺ ពេជ្រ ម្ទេសខ្មាំង និងអាំង សំអាត នឹងបើកឆាកប្រយុទ្ធជាមួយកីឡាករថៃនៅក្នុងព្រឹត្តិការណ៍ប្រដាល់អន្តរជាតិ K- Cement របស់ទូរទស្សន៍អាស៊ីអាគ្នេយ៍ ដើម្បីរំលេចការចាប់អារម្មណ៍។ គេមិនទាន់ដឹងថា រវាងកីឡាករទាំងពីរនឹងមានវាសនាយ៉ាងដូចម្ដេចនោះទេ ដោយសារតែសមាសភាពថៃដែលត្រូវប៉ះជាមួយក៏មិនមែនជើងថ្មី និងមិនធ្លាប់មានប្រវត្តិស៊ីជើងខ្លាំងរបស់កម្ពុជា។
ការប្រកួតដែលនឹងធ្វើឡើងចាប់ពីម៉ោង៥និង៣០នាទីល្ងាចរហូតដល់ម៉ោង៨យប់នេះ ទើបតែបានដំណើរការបាន៤សប្ដាហ៍រាប់ទាំងការប្រដាល់នៅថ្ងៃសុក្រនេះប៉ុណ្ណោះ ដោយសមាសភាពរបស់កីឡាករដែលឡើងប្រកួត គឺមើលទៅទាក់ទាញទាំងកីឡាករកម្ពុជា និងកីឡាករថៃ ។ ការប្រដាល់នៅវេលាយប់នេះ មានការរំពឹងថា នឹងមានអ្នកទស្សនាកកកុញ បើទោះជាប្រដាល់នៅយប់ថ្ងៃសុក្រ ទើបនឹងបានផ្លាស់ប្ដូរពីថ្ងៃសៅរ៍ ដែលអ្នកស្នេហាប្រដាល់របស់ទូរទស្សន៍អាស៊ីអាគ្នេយ៍ខ្លះមិនបានដឹង។ អ្នករៀបចំការប្រកួតបានប្រកាសពីការសម្រិតសម្រាំងកីឡាករសម្រាប់ការប្រកួតយប់ស្អែកនេះ ដោយវត្តមានរបស់កីឡាករកម្ពុជា និងថៃទាំងពីរហាក់ធ្វើឱ្យមានការជឿជាក់ខ្លាំងថាពួកគេនឹងបើកឆាកប្រយុទ្ធកាចសាហាវដាក់គ្នា ដោយសារតែចង់ឈ្នះមិនចង់ចាញ់។
កីឡាករ ពេជ្រ ម្ទេសខ្មាំង ដែលជាជើងខ្លាំងម្នាក់ប្រចាំក្លិបអរុណរះកីឡា នឹងត្រូវជួបប្រកួតជាមួយកីឡាករថៃឈ្មោះ ផុន សាវ៉ាត់ ដែលល្បីឈ្មោះនៅក្នុងប្រទេសថៃ ។ ជំនួបប៉ះគ្នារវាងអ្នកទាំងពីរត្រូវគេមើលឃើញថានឹងបែកផ្កាភ្លើងនៅលើសង្វៀន ដោយសារតែអ្នកទាំងពីរសុទ្ធតែត្រូវការឈ្នះដើម្បីរក្សាមុខមាត់ និងក្រេឌីត ។ ផ្អែកតាមបទពិសោធន៍ អ្នកទាំងពីរមានកម្រិតប៉ុនគ្នាដោយកីឡាករកម្ពុជាក៏មានប្រវត្តិប្រកួតច្រើន ហើយកីឡាករថៃក៏មានប្រវត្តិច្រើន។ លោកញាណ សុធី អ្នករៀបចំការប្រកួតបានអះអាងថា លោកសម្រេចដាក់ឱ្យកីឡាករទាំងពីរប៉ះគ្នា ដោយសារតែពេជ្រ ម្ទេសខ្មាំង ក៏ហ្វឹកហាត់ច្រើនក្នុងការត្រៀមខ្លួន ហើយកីឡាករ ផុន សាវ៉ាត់ ក៏ជាកីឡាករដែលមានស្នាដៃម្នាក់នៅលើសង្វៀនប្រទេសថៃ និងសង្វៀនទូរទស្សន៍អាស៊ីអាគ្នេយ៍នាពេលកន្លងមក ។
គូនេះ កីឡាករកម្ពុជាធ្លាប់ប្រកួតបាន៨២លើក ឈ្នះ៧៦លើក ចាញ់៥លើក និងស្មើ១លើក ក្នុងពេលដែលកីឡាករថៃធ្លាប់ប្រកួតបាន៧៣លើក ឈ្នះ៦៨លើក និងចាញ់៥លើក ។ កីឡាករកម្ពុជាបានប្រកាសប្រាប់ថា នឹងប្រឹងយកឈ្នះលើកីឡាករថៃឱ្យខាងតែបាន ដោយសារតែមុនផ្គូផ្គងលោកហ្វឹកហាត់ច្រើននៅលើសង្វៀនក្នុងក្លិប ។
យ៉ាងណាក៏ដោយកីឡាករថៃក៏មានជំនឿចិត្តបែបនេះផងដែរ នេះបើយោងតាមការអះអាងរបស់ថៃ អ៊ូ ជាអ្នកដឹកនាំកីឡាករថៃឱ្យមកប្រកួត និងផ្អែកតាមថ្វីដៃដែលកីឡាករថៃធ្វើបាននាពេលកន្លងមក ។ គូនេះត្រូវគេរំពឹងច្រើនថា នឹងវាយអស់ពីសមត្ថភាព ដោយសារតែពេជ្រ ម្ទេសខ្មាំង ថ្វីបើខានឡើងរេញក្នុងមួយរយៈចុងក្រោយ តែអ្វីដែលគេធ្វើបានគឺមិនដែលបណ្ដោយឱ្យគូប្រកួតទៅរួចដោយស្រួលនោះឡើយ។
កីឡាករអាំង សំអាត មកពីក្លិបតាព្រហ្មមានជ័យ នឹងត្រូវជួបប្រកួតជាមួយកីឡាករថៃឈ្មោះ ឌេន សាយ៉ាម នៅក្នុងព្រឹត្តិការណ៍នេះដែរ។ អ្នកទាំងពីរប៉ះគ្នាក្នុងតំណែងគូឯក ដោយកីឡាករម្ខាងៗសុទ្ធតែអួតរៀងខ្លួនថា ពួកគេនឹងប្រឹងឱ្យឈ្នះ។ ទោះបីយ៉ាងណា គេមិនទាន់ដឹងថា អ្នកណានឹងឈ្នះអ្នកណាសម្រាប់ការប្រកួតនេះនៅឡើយទេ ដោយសារតែអះអាងថា កីឡាករម្ខាងសុទ្ធតែត្រូវបានមហាជនស្គាល់ថាមិនធម្មតាដូចគ្នា ។ គាប់ជួនជាការប្រកួតចុងក្រោយរបស់អាំង សំអាត ជួនបានលទ្ធផលល្អ និងជួនបានលទ្ធផលអវិជ្ជមាននោះផង ទើបការប្រាកដចិត្តថាកីឡាករកម្ពុជានឹងឈ្នះកីឡាករថៃគឺមិនមែនរឿងងាយ។ កីឡាករថៃ ឌេន សាយ៉ាម ត្រូវបានប្រកាសថាជាជើងខ្លាំងម្នាក់នៅក្នុងប្រទេសថៃផងដែរ បើទោះជាបទពិសោធន៍របស់គេតិចជាងកីឡាករកម្ពុជា។ អាំង សំអាត ធ្លាប់ប្រកួត៧៧លើក ឈ្នះ៦៤លើក ចាញ់១២លើក និងស្មើ១លើក ខណៈដែលកីឡាករថៃក៏ឡើងរេញបាន៤២លើក ឈ្នះ៣៥លើក ចាញ់៥លើក និងស្មើ២លើក៕
ចែករំលែកព័តមាននេះ