រាជធានីភ្នំពេញ ៖ ខុន លីហ៊ុយ មកពីក្លិបកងពលតូចលេខ៨ភ្នំទ្រព្យ និងកុយ ចាន់តូ មកពីក្លិបគីសែមានរិទ្ធ ត្រូវគេរៀបចំឱ្យជួបប្រកួតជាមួយអ្នកប្រដាល់ជើងខ្លាំងមកពីប្រទេសបារាំងនៅលើសង្វៀនទូរទស្សន៍
រាជធានីភ្នំពេញ ៖ ខុន លីហ៊ុយ មកពីក្លិបកងពលតូចលេខ៨ភ្នំទ្រព្យ និងកុយ ចាន់តូ មកពីក្លិបគីសែមានរិទ្ធ ត្រូវគេរៀបចំឱ្យជួបប្រកួតជាមួយអ្នកប្រដាល់ជើងខ្លាំងមកពីប្រទេសបារាំងនៅលើសង្វៀនទូរទស្សន៍CNCនាថ្ងៃសៅរ៍ ទី២៣ កក្កដា ខានស្អែកនេះ ។ អ្នកនិយមទស្សនាការប្រកួតប្រដាល់ភាគច្រើនកំពុងរង់ចាំមើលថាតើកីឡាករកម្ពុជាទាំងពីររូបនេះ មានសមត្ថភាពតតាំងជាមួយជើងខ្លាំងមកពីបារាំងដែរឬយ៉ាងណា ។
ខុន លីហ៊ុយ នឹងជួបប្រកួតជាមួយកីឡាករបារាំងឈ្មោះLouis Renaultក្នុងប្រភេទទម្ងន់៦០គីឡូក្រាម រីឯ កុយ ចាន់តូ ប្រកួតជាមួយកីឡាករបារាំងឈ្មោះSamuel Hardy Dessouresក្នុងប្រភេទទម្ងន់៦០គីឡូក្រាមដូចគ្នា ។ តាមការឱ្យដឹង កីឡាករបារាំងទាំង២រូបនេះមិនធ្លាប់មកប្រកួតនៅស្រុកខ្មែរទេពីមុនមក ទើបគ្មានអ្នកណាស្គាល់ពីប្រវត្តិប្រកួតរបស់ពួកគេទាំង២ច្បាស់លាស់ ។
ខុន លីហ៊ុយ ទាំងមាឌ និងកម្ពស់គឺចាញ់ប្រៀប Louis Renault ប៉ុន្តែបើនិយាយពីល្បិច ប្រយុទ្ធវិញប្រហែលមិនចាញ់ឡើយ ។ ជាក់ស្ដែងលោកមាស សុខគ្រី កាលពីប៉ុន្មានថ្ងៃ មុនបានអះអាងថា កីឡាករបារាំងទាំង២រូបនេះ ធ្លាប់ឡើងសង្វៀនមិនច្រើននោះទេ ដូច្នេះទោះបីពួកគេមានកម្លាំងខ្លាំង និងល្បិចប្រកួតមិនអាចមើលស្រាលបាន ប៉ុន្តែពេលមកប៉ះជាមួយអ្នកប្រដាល់ជើងចាស់ដូចជាខុន លីហ៊ុយ នឹងអាចជួបលទ្ធផលអាក្រក់ច្រើនជាងល្អ ។
ចំណែកការជួបគ្នារវាង កុយ ចាន់តូ និងកីឡាករបារាំងឈ្មោះSamuel Hardy Dessouresវិញនោះ ក៏អត់មានអ្នកណាហ៊ានទាយទុកមុននោះដែរ ។ កុយ ចាន់តូ ជាអ្នកប្រដាល់ជើងខ្លាំងមួយរូបដែលមានបទពិសោធន៍ប្រកួតនៅលើសង្វៀនយ៉ាងក្រាស់ក្រែលក្នុងចំណោមអ្នកប្រដាល់ទម្ងន់ធ្ងន់ដូចគ្នាមិនងាយមានអ្នកណាផ្ដួលគេបានឡើយ ។ ប៉ុន្តែសម្រាប់ការមកជួបកីឡាករបារាំងលើកនេះគេមិនហ៊ានអួតទុកមុនពីលទ្ធចាញ់-ឈ្នះទេ បានត្រឹមតែសន្យាថា នឹងព្យាយាមប្រកួតឱ្យអស់ពីសមត្ថភាពមិនឱ្យអ្នកគាំទ្រខកចិត្តឡើយ ។
នៅលើសង្វៀនដដែលក៏មានការប្រកួតរវាងកីឡាករក្នុងស្រុកជាច្រើនគូទៀតដូចជាកីឡាករ លាស់ យីន មកពីក្លិបតាព្រហ្មមានជ័យ ប្រកួតជាមួយកីឡាករ ឡុង សំណាង មកពីក្លិបសាលវ័ន្តកីឡា និងកីឡាករ ធន់ ចាន់តាក់ មកពីសមាគមកីឡាប្រដាល់ក្រសួងការពារជាតិប្រកួតជាមួយកីឡាករ ទេស ឧត្តម មកពីក្លិបកងពលតូចលេខ៧០ ។
ដោយឡែក សម្រាប់ការប្រកួតថ្ងៃអាទិត្យទី២៤ កក្កដា នៅលើសង្វៀនដដែលនេះដែរកីឡាករ ខុន សុវណ្ណ មកពីក្លិបកងពលតូចលេខ៨ភ្នំទ្រព្យ ត្រូវជួបប្រកួតជាមួយកីឡាករ កូយ ឡាយ មកពីក្លិបកងទ័ពពិសេសឆត្រយោង៩១១ ។ កីឡាករ សំខាន់ រដ្ធា មកពីក្លិបរ៉ាហាប់ស្វាយប៉ាក ប្រកួតជាមួយកីឡាករ សិទ្ធ ជាស្រេង មកពីក្លិបសាមគ្គីកូនខ្មែរ ។ កីឡាករ យ៉ន ពិសី មកពីក្លិបសាលវ័ន្តកីឡា ប្រកួតជាមួយកីឡាករ សេក គឹមសាន មកពីក្លិបអង្គរមានជ័យ ខេត្តសៀមរាប ។ កីឡាករ សុខុន រីហ្គាវុត្ថា មកពីក្លិបកុមារទេព ប្រកួតជាមួយកីឡាករ សៅ ដាវុធ មកពីក្លិបទីបញ្ជាការកងទ័ពជើងទឹក ។ កីឡាករ ផន ភឿត មកពីក្លិបឃ្លាំងមឿងកីឡា ប្រកួតជាមួយកីឡាករ ជឹម សារ៉ាយ មកពីក្លិបខ្លាខិនមានរិទ្ធ និងគូចុងក្រោយកីឡាករ ឡុង ប៊ុនហេង មកក្លិបខ្លារខិនមានរិទ្ធ ប្រកួតជាមួយកីឡាករ សន គឹមស៊ាន មកពីក្លិបអង្គរមានជ័យខេត្តសៀមរាប ៕
ចែករំលែកព័តមាននេះ