រាជធានីភ្នំពេញ ៖ នៅទីស្តីការក្រសួងរៀបចំដែនដីនគរូបនីយកម្ម និងសំណង់ កាលពីថ្ងៃទី២២ មីនា មានរៀបចំពិធីប្រគល់-ទទួលឯកសាររបាយការណ៍ចុងក្រោយ ស្តីពីយុទ្ធសាស្ត្រជាតិសមាហរណកម្មតំបន់ឆ្នេរ និងប្លង់គោលខេត្តព្រះសីហនុ សម្រាប់អភិវឌ្ឍន៍ប្រកបដោយចីរភាព ក្រោមអធិបតីភាពលោកអ៊ឹម ឈុនលឹម ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់។
តាមរបាយការណ៍របស់លោកឌុច វនទីតូ អគ្គនាយកនៃអគ្គនាយកដ្ឋានរៀបចំដែនដី និងនគរូបនីយកម្មបានឱ្យដឹងថា ដោយអនុវត្តតាមអនុស្សរណៈយោគយល់គ្នារវាងភ្នាក់ងារសហប្រតិបត្តិការជប៉ុន (JICA) ជាមួយនឹងក្រសួងរៀបចំដែនដី នគរូបនីយកម្ម និងសំណង់លើកទី១កាលពីថ្ងៃទី៧ មីនា ឆ្នាំ២០០៨ និងលើកទី២ នៅថ្ងៃទី៥ ធ្នូ ឆ្នាំ២០០៨ ក្រុមការងារបច្ចេកទេសរបស់ JICA និងក្រសួងរៀបចំដែនដី នគរូបនីយកម្ម និងសំណង់ ចាប់ផ្តើមធ្វើកិច្ចសហប្រតិបត្តិការសិក្សាយុទ្ធសាស្ត្រជាតិសមាហរណកម្មតំបន់ឆ្នេរ និងប្លង់គោលខេត្តព្រះសីហនុ សម្រាប់ការអភិវឌ្ឍប្រកបដោយចីរភាព ដោយចាប់ផ្តើមពីថ្ងៃទី ២២ មីនា ឆ្នាំ២០០៩ ។ ការសិក្សានេះមានរយៈពេល១៦ខែ គិតចាប់ពីថ្ងៃទី២២ មីនា ឆ្នាំ២០០៩ រហូតដល់ចុងខែកក្កដា ឆ្នាំ២០១០ ។
ក្នុងការសិក្សានេះ មានការគាំទ្រដោយក្រុមបច្ចេកទេសរបស់អង្គការ JICA ទាំងអស់ចំនួន១៩នាក់ ទៅតាមជំនាញដោយឡែកពីគ្នា រួមមាន ផែនការអភិវឌ្ឍន៍តំបន់ ផែនការប្រើប្រាស់ដី និងនគរូបនីយកម្ម ផែនការគ្រប់គ្រងទឹកស្អាត និងកាកសំណង់រឹង/រាវ ផែនការដឹកជញ្ជូន និងភស្តុភារ ផ្នែកវិភាគសេដ្ឋកិច្ច សង្គមកិច្ច ជំនាញ GIS ផ្នែកវាយតម្លៃផលប៉ះពាល់សង្គម និងបរិស្ថាន និងផ្នែកអភិវឌ្ឍន៍សមត្ថភាព។
ការសិក្សាខាងលើនេះ រួមមាន ៣ផ្នែកសំខាន់ៗគឺ ទី១-ការកសាងយុទ្ធសាស្ត្រជាតិសមាហរណកម្មតំបន់ឆ្នេរនៃខេត្តចំនួន៤ គឺខេត្តព្រះសីហនុ ខេត្តកំពត ខេត្តកោះកុង និងខេត្តកែប ចាប់ពីខែមីនាដល់ខែវិច្ឆិកា ឆ្នាំ២០០៩ ទី២-ការកសាងប្លន់គោលខេត្តព្រះសីហនុ និងយុទ្ធសាស្ត្រអភិវឌ្ឍន៍សម្រាប់ខេត្តកំពត ចាប់ពីខែតុលា ឆ្នាំ២០០៩ ដល់ខែមីនា ឆ្នាំ២០១០ និងទី៣-ការកសាងផែនការពង្រឹងសមត្ថភាពមន្ត្រីចាប់ពីខែមីនា ឆ្នាំ២០០៩ ដល់ខែមីនា ឆ្នាំ២០១០ ។
ដោយការសិក្សាគម្រោងនេះ មានលក្ខណៈអន្តរវិស័យ ក្រុមការងារបានរៀបចំឱ្យមានការចូលរួមពីក្រសួង ស្ថាប័ន អាជ្ញាធរដែនដី និងភាគីពាក់ព័ន្ធទាំងអស់តាមរយៈ ១-កិច្ចប្រជុំអន្តរក្រសួងចំនួន៤លើក ដើម្បីពិភាក្សា អំពីគោលបំណង លទ្ធផលរំពឹងទុក វិធីសាស្ត្រសិក្សា វឌ្ឍនភាពគម្រោង បញ្ហាប្រឈម ចក្ខុវិស័យ និងយុទ្ធសាស្ត្រសម្រាប់ការអភិវឌ្ឍ ការការពារបរិស្ថាន ផែនការអភិវឌ្ឍន៍សមត្ថភាពមន្ត្រី និងអនុសាសន៍នានាលើការសិក្សា។ ២-សិក្ខាសាលាថ្នាក់ខេត្តចំនួន៣លើក ដើម្បីធ្វើការពិគ្រោះយោបល់ជាសាធារណៈ លើរំបកគំហើញនានានៃការសិក្សារបស់ក្រុមការងារជាមួយស្ថាប័នពាក់ព័ន្ធនៅមូលដ្ឋានក្នុងខេត្តទាំង៤នៃតំបន់ឆ្នេរ។ ៣-សិក្ខាសាលាថ្នាក់ជាតិចំនួន២លើក ដើម្បីបង្ហាញនូវលទ្ធផលនៃការសិក្សាស្តីពីយុទ្ធសាស្ត្រជាតិសមាហរណកម្មតំបន់ឆ្នេរ ប្លង់គោលខេត្តព្រះសីហនុ និងយុទ្ធសាស្ត្រអភិវឌ្ឍន៍សម្រាប់ខេត្តកំពត ។
ទន្ទឹមនឹងនេះ គម្រោងក៏បានផ្តល់ការបណ្តុះបណ្តាលរយៈពេលខ្លីអំពីចំណេះដឹង និងបទពិសោធន៍នៃការរៀបចំផែនការប្រើប្រាស់ដី និងការអភិវឌ្ឍទីក្រុងនៅប្រទេសជប៉ុន ដល់មន្ត្រីជំនាញថ្នាក់ជាតិ អាជ្ញាធរខេត្ត និងមន្ត្រីរបស់មន្ទីររៀបចំដែនដី នគរូបនីយកម្ម សំណង់ និងសុរិយោដីនៃខេត្តតំបន់ឆ្នេរទាំង៤ទៀតផង ។ ជាលទ្ធផលនៃការសិក្សាគម្រោងខាងលើនេះ នៅចុងឆ្នាំ២០១០ ក្រុមការងារបានបញ្ចប់នូវការចងក្រងឯកសាររបាយការណ៍ចុងក្រោយដែលបានរៀបចំជា៣ប្រភេទ គឺ ឯកសាររបាយការណ៍ពិស្តារជាភាសាអង់គ្លេស ឯកសាររបាយការណ៍សង្ខេបជាភាសាអង់គ្លេស និងឯកសាររបាយការណ៍សង្ខេបជាភាសាខ្មែរ ដែលតាមផែនការក្រសួងគ្រោងដាក់ស្នើសុំការអនុម័តពីរាជរដ្ឋាភិបាលក្នុងឆ្នាំ២០១១ នេះ ។
លោកទេសរដ្ឋមន្ត្រី អ៊ឹម ឈុនលឹម បានថ្លែងថា តំបន់ឆ្នេរនៃព្រះរាជាណាចក្រកម្ពុជា គឺជាប៉ូលសេដ្ឋកិច្ចមួយដ៏មានសក្តានុពលក្នុងចំណោមប៉ូលសេដ្ឋកិច្ចធំៗទាំង៣ រួមមានរាជធានីភ្នំពេញ ខេត្តសៀមរាប និងខេត្តព្រះសីហនុ ដែលចូលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ។ ការសិក្សានេះក៏បានផ្តល់នូវរបកគំហើញដ៏មានសារប្រយោជន៍ និងបានរួមចំណែកយា៉ងច្រើនចំពោះការចូលជាសមាជិកពេញសិទ្ធិរបស់ក្លឹបឆ្នេរសមុទ្រដែលស្អាតបំផុតលើសាកលលោករបស់កម្ពុជា ដែលនឹងត្រូវទទួលសញ្ញាបត្រជាផ្លូវការនៅប្រទេសសេណេហ្គាល់ នៅខែឧសភា ឆ្នាំ២០១១ខាងមុខនេះ ។ គម្រោងសិក្សានេះកាន់តែដើរតួនាទីយ៉ាងសំខាន់ថែមទៀត សម្រាប់នាំផ្លូវឆ្ពោះទៅរកតុល្យភាពរវាងការអភិវឌ្ឍ និងការអភិរក្សក្នុងតំបន់ឆ្នេរ ។ ទន្ទឹមនឹងនេះ ការសិក្សាលំអិតអំពីផែនការប្រើប្រាស់ដីក្នុងតំបន់ក្រុងនីមួយៗ គឺជាប្រការដ៏ចាំបាច់មិនអាចខ្វះបាន ដែលទាមទារឱ្យធ្វើការសិក្សាក្នុងជំហានបន្តបន្ទាប់ទៀត ដើម្បីធានាការអនុវត្តឱ្យមានប្រសិទ្ធភាព ។
លោកអ៊ឹម ឈុនលឹម បញ្ជាក់ថា ពិធីប្រគល់ និងទទួលឯកសាររបាយការណ៍ចុងក្រោយដែលបានរៀបចំនាឱកាសនេះ ធ្វើឡើងក្នុងគោលបំណងផ្សព្វផ្សាយអំពីលទ្ធផលនៃការសិក្សាគម្រោងយុទ្ធសាស្ត្រជាតិសមាហរណកម្មតំបន់ឆ្នេរ និងប្លង់គោលខេត្តព្រះសីហនុ សម្រាប់ការអភិវឌ្ឍប្រកបដោយចីរភាពទៅដល់គ្រប់សមាជិកនៃគណៈកម្មការអន្តរក្រសួង និងស្ថាប័នពាក់ព័ន្ធទាំងអស់ ដើម្បីត្រួតពិនិត្យ ផ្តល់សំណូមពរ និងអនុសាសន៍ជាចុងក្រោយ មុននឹងឯកសាររបាយការណ៍ចុងក្រោយនេះ បានរៀបចំ និងបោះពុម្ពជាផ្លូវការជាភាសាជាតិ ៕
ចែករំលែកព័តមាននេះ