រាជធានីភ្នំពេញ ៖ ក្នុងឱកាសអញ្ជើញសួរសុខទុក្ខយោធិនពិការ និងគ្រួសារកងទ័ពនៅតំបន់អភិវឌ្ឍន៍កសិកម្មតំបន់កោះស្លា ភូមិជ័យសេនា ឃុំតាកែន ស្រុកឈូក កាលពីព្រឹកថ្ងៃទី៥ មីនា ២០១១ សម្តេចតេជោនាយករដ្ឋមន្ត្រីហ៊ុន សែន បានលើកឡើងថា កម្ពុជាបានត្រៀមខ្លួនរួចរាល់ជាស្រេចក្នុងការចូលរួមកិច្ចប្រជុំពិសេសដោះស្រាយបញ្ហាជម្លោះព្រំដែនទូទៅ និងកិច្ចប្រជុំគណៈកម្មការបោះបង្គោលព្រំដែនជាមួយថៃ ដែលបានអញ្ជើញ និងរៀបចំដោយប្រធានអាស៊ាននៅក្រុងហ្សាការតា ប្រទេសឥណ្ឌូណេស៊ីឆាប់ៗនេះ ។
សម្តេចតេជោហ៊ុន សែន បញ្ជាក់ថា កម្ពុជាគាំទ្របែបបទ និងការចាត់ចែងរបស់អាស៊ាន ជាពិសេសគឺចំណាត់ការរបស់ប្រទេសឥណ្ឌូណេស៊ីនេះឯង ដែលបានផ្ញើលិខិត និងរបៀបវារៈមកកាន់ប្រទេសកម្ពុជា និងប្រទេសថៃ ព្រមទាំងរដ្ឋមន្ត្រីការបរទេសអាស៊ានទាំងអស់ផងដែរ…សម្រាប់កម្ពុជាគឺកម្ពុជាបានត្រៀមលក្ខណសម្បត្តិរួចរាល់អស់ហើយ គ្មានអ្វីត្រូវលាក់លៀមទៀតទេ ការឈ្លានពានរបស់សៀមមកលើកម្ពុជា មិនអាចចប់បានដោយងាយៗនេះឡើយ ហើយការប្រជុំនេះមិនអាចបិទទ្វារអាជ្ញាកណ្តាលបានទេ គឺឥណ្ឌូណេស៊ីជាអ្នកអាជ្ញាកណ្តាលទើបត្រូវនឹងសាច់រឿងរបស់អ្នកអញ្ជើញ ។
ឥណ្ឌូណេស៊ីគាំទ្រចំពោះការផ្តល់កន្លែងចុះធ្វើការត្រួតពិនិត្យ ឬសង្កេតការណ៍របស់ប្រទេសកម្ពុជា ដែលមាន១៤ចំណុច (កន្លែង) និងរយៈពេល១២ខែ…។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព.
ចែករំលែកព័តមាននេះ