ចៅក្រមតម្កល់ទោស២ឆ្នាំ ជនជាប់ចោទថាអយុត្តិធម៌
រាជធានីភ្នំពេញ ៖ ចៅក្រមជំនុំជម្រះសាលាឧទ្ធរណ៍ តម្កល់សាលក្រមសាលាដំបូងរាជធានីភ្នំពេញទុកជាបានការដដែល ដោយសម្រេចផ្តន្ទាទោស
រាជធានីភ្នំពេញ ៖ ចៅក្រមជំនុំជម្រះសាលាឧទ្ធរណ៍ តម្កល់សាលក្រមសាលាដំបូងរាជធានីភ្នំពេញទុកជាបានការដដែល ដោយសម្រេចផ្តន្ទាទោសលោក អ៊ុកពេជ្រ សំណាង អាយុ៥២ឆ្នាំជាសកម្មជនគណបក្សសង្គ្រោះជាតិដាក់ពន្ធនាគារ២ឆ្នាំ ក្រោមការចោទប្រកាន់ចំនួន៤បទល្មើស ។ ជនជាប់ត្រូវបានសាលាដំបូងរាជធានីភ្នំពេញផ្តន្ទាទោសក្នុងចំនូន១១នាក់ ដែលត្រូវបានចោទប្រកាន់ចាប់ខ្លួន និងឃុំខ្លួនក្នុងអំពើហិង្សានៅទីលានប្រជាធិបតេយ្យក្នុងឆ្នាំ២០១៤។
ប្រធានក្រុមប្រឹក្សាជំនុំជម្រះសាលាឧទ្ធរណ៍លោក សំរិទ្ធ សុផល នៅព្រឹកថ្ងៃទី២០ ខែកក្កដា ឆ្នាំ២០១៦នេះ សម្រេចតម្កល់សាលក្រមសាលាដំបូងរាជធានីភ្នំពេញចុះថ្ងៃទី១០ ខែកក្កដា ឆ្នាំ២០១៥ ទុកជាបានការដដែល។ តែជនជាប់ចោទបានស្រែកថាការសម្រេចរបស់តុលាការមិនយុត្តិធម៌ទេ លោកមិនបានប្រព្រឹត្តនោះទេ។ លោកចៅក្រមបញ្ជាក់ថា ជនជាប់ចោទអាចប្តឹងសារទុក្ខទៅតុលាការកំពូលរយៈពេល១ខែ ប្រសិនបើមិនសុខចិត្តនឹងសេចក្ដីសម្រេចនេះ។ ភ្លាមៗក្រោយការប្រកាសសាលដីកាលោក អ៊ុកពេជ្រ សំណាង សកម្មជនគណបក្សសង្គ្រោះជាតិស្រែកថាជាការសម្រេចដោយអយុត្តិធម៌ជាការសម្រេចធ្វើបាបរូបលោកតែជនស្លូតត្រង់ ។
គួររំលឹកថា លោក អ៊ុកពេជ្រសំណាង ត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគាររយៈពេល២ឆ្នាំ ដោយចោទប្រកាន់៤បទល្មើស គឺបទ ហិង្សាដោយចេតនាមានស្ថានទម្ងន់ទោស បទធ្វើឲ្យខូតខាតដោយចេតនាមានស្ថានទម្ងន់ទោស បទប្រឆាំងនឹង អ្នករាជការសាធារណៈ និងបទចូលរួមសមាគមនៃជនទុច្ចរិត យោងតាមមាត្រា២១៨ , ៤១១ , ៥០៣, ៤៩៩ នៃក្រមព្រហ្មទណ្ឌ។ តែភរិយារបស់លោក អ៊ុកពេជ្រ សំណាង គឺអ្នកស្រី ទិត្យ ណារិន្ទ បានឲ្យដឹងថា គ្រួសារអ្នកស្រីកំពុងជួបការលំបាកខ្លាំងដោយសារតែស្វាមីដែលជាបង្គោលគ្រួសារត្រូវបានតុលាការឃុំខ្លួនដាក់ពន្ធនាគារ។
អ្នកស្រីអំពាវនាវឲ្យតុលាការដោះលែងស្វាមីឲ្យមានសេរីភាពឡើងវិញ ព្រោះពេលនេះគ្រួសារលោកស្រីកំពុងជួបការលំបាកខ្លាំង ។ សកម្មជនគណបក្សសង្គ្រោះជាតិ លោក អ៊ុក ពេជ្រ សំណាង ត្រូវបានកងសន្តិសុខខណ្ឌដូនពេញ ចោទប្រកាន់ពីបទបើកម៉ូតូកង់បីបុកទម្លុះរនាំងដែករបស់ពួកគេ នៅក្នុងការតវ៉ាបញ្ហាដីធ្លីមួយរបស់ប្រជាពលរដ្ឋមកពីខេត្តព្រះវិហារ កាលពីខែតុលា ឆ្នាំ២០១៤ កន្លងទៅ ៕
ចែករំលែកព័តមាននេះ