ពលរដ្ឋប្រទះឃើញ គ្រាប់មិនទាន់ផ្ទុះ១៤គ្រាប់នៅវាលស្រែ
ខេត្តសៀមរាប ៖ ប្រជាពលរដ្ឋប្រទះឃើញគ្រាប់យុទ្ធភ័ណ្ឌមិនទាន់ផ្ទុះចំនួន ១៤គ្រាប់ នាថ្ងៃទី២០ ខែកក្កដា ឆ្នាំ២០១៦ ខណៈដែលគាត់ទៅភ្ជួរដីស្រែ ក្រោយបន្ទាយចាស់
ខេត្តសៀមរាប ៖ ប្រជាពលរដ្ឋប្រទះឃើញគ្រាប់យុទ្ធភ័ណ្ឌមិនទាន់ផ្ទុះចំនួន ១៤គ្រាប់ នាថ្ងៃទី២០ ខែកក្កដា ឆ្នាំ២០១៦ ខណៈដែលគាត់ទៅភ្ជួរដីស្រែ ក្រោយបន្ទាយចាស់រថក្រោះភូមិភាគ៤ ស្ថិតនៅក្នុងភូមិខ្វៀន សង្កាត់គោកចក ក្រុង-ខេត្តសៀមរាប។ បន្ទាប់ពីបានប្រទះឃើញគ្រាប់យុទ្ធភ័ណ្ឌនៅទីតាំងខាងលើនេះភ្លាម រួបគាត់រត់ទៅរាយការណ៍ជូនកម្លាំងនគរបាលប៉ុស្តិ៍រដ្ឋបាលសង្កាត់គោកចក ភ្លាមៗនោះ ដើម្បីឱ្យជួយមកអន្តរាគមន៍យកគ្រាប់នោះចេញ។
លោកវរសេនីយ៍ឯក ឆេត ញ៉ា នាយការិយាល័យនគរបាលគ្រប់គ្រងអាវុធជាតិផ្ទុះ ជាតំណាងលោកវរសេនីយ៍ឯក សំ សុជាតិ ស្នងការរង ជាប្រធានការិយាល័យកណ្ដាល អាវុធជាតិផ្ទុះ និងអគ្គីភ័យ នៃស្នងការដ្ឋាននគរបាលខេត្តសៀមរាប បានប្រាប់ឱ្យដឹងនារសៀលថ្ងៃទី២០ ខែកក្កដា ឆ្នាំ២០១៦នេះថា ក្រោយពីបានទទួលសេចក្តីរាយការពីកម្លាំងនគរបាលប៉ុស្តិ៍រដ្ឋបាលរួចមក លោកបានដឹកនាំកម្លាំងចុះទៅដល់កន្លែងកើតហេតុ ដើម្បីប្រមូលគ្រាប់ទាំងនោះយកទៅទុកនៅកន្លែងដែលមានសុវត្ថិភាព។ លោកបានឱ្យដឹងទៀតថា គ្រប់យុទ្ធភ័ណ្ឌដែលប្រជាពលរដ្ឋប្រទះឃើញនាពេលនេះ ជាប្រភេទក្បាលគ្រាប់ ៨៥មីលីម៉ែត្រ ដែលខូចគុណភាព។
បច្ចុប្បន្ន លោកវរសេនីយ៍ឯក ឆេត ញ៉ា នាយការិយាល័យបានធ្វើការទំនាក់ទំនងទៅកម្លាំងអង្គការស៊ីម៉ាក់មកទទួលយកទៅរក្សាទុកកន្លែងមានសុវត្ថិភាព រង់ចាំធ្វើការកម្ទេចចោល។ ក្នុងនាមកងកម្លាំងនគរបាលខេត្តសៀមរាប សូមធ្វើការអំពាវនាវដល់បងប្អូនប្រជាពលរដ្ឋទាំងអស់នៅពេលដែលបានប្រទះឃើញគ្រាប់យុទ្ធគ្រប់ប្រភេទសូមធ្វើការ រាយការណ៍ជូនអាជ្ញាធរមូលដ្ឋាន ឬកម្លាំងនគរបាលជំនាញ ដើម្បីឱ្យកម្លាំងសមត្ថកិច្ចយើងចុះទៅត្រួតពិនិត្យ និងយកមករក្សាទុកកន្លែងដែលមានសុវត្ថិភាពដូចករណីខាងលើនេះជាដើម។ ម្យ៉ាងវិញទៀតដើម្បីជៀសវាងបង្កគ្រោះថ្នាក់ដល់បងប្អូនប្រជាពលរដ្ឋ ដែលអាចបណ្ដាលឱ្យពិការភាពអស់មួយជីវិត ឬបាត់បង់ជីវិតទៀតផង៕
ចែករំលែកព័តមាននេះ