រាជធានីភ្នំពេញ ៖ លទ្ធផលឈ្នះទីម័រខាងកើតក្នុងលទ្ធផល៣ទល់នឹងសូន្យ បានរុញឱ្យក្រុមកម្ពុជា កាលពីយប់ថ្ងៃទី១៩ កក្កដា ឈានឡើងវគ្គពាក់កណ្ដាលផ្ដាច់ព្រ័ត្រជាប្រវត្តិសាស្ត្រលើកដំបូងនៅក្នុងព្រឹត្តិការណ៍ AFF Smart U16 Championship 2016 ក្នុងនាមជាម្ចាស់ផ្ទះ ។ ដោយឡែកនៅល្ងាចនេះ ក្រុមកម្ពុជានឹងប៉ះជាមួយក្រុមវៀតណាមនៅលើសមរភូមិវាលស្មៅក្នុងពហុកីឡដ្ឋានជាតិអូឡាំពិក ដើម្បីដណ្ដើមឱកាសឡើងទៅប្រកួតវគ្គផ្ដាចព្រ័ត្រយកពាន ។ អីុចឹងហើយ ទើបការប្រកួតល្ងាចស្អែកនេះ ត្រូវបានមហាជនផ្ដោតការចាប់អារម្មណ៍យ៉ាងខ្លាំង ។
នៅល្ងាចថ្ងៃទី២១ កក្កដា ស្អែកនេះ គឺជាឱកាសកាត់ក្ដីចុងក្រោយសម្រាប់ក្រុមកម្ពុជាដែលជាម្ចាស់ផ្ទះ ថា តើនឹងមានវាសនាបោះជំហានទៅកាន់វគ្គដណ្ដើមពានជាប្រវត្តិសាស្ត្រ ឬក៏អត់។ ការប្រកួតឈ្នះទីម័រខាងកើត កាលពីថ្ងៃទី១៩ កក្កដា គឺជាហេតុផលមួយដែលជួយឱ្យក្រុមកម្ពុជា បានភ្លក់រសជាតិឈានឡើងមកកាន់វគ្គពាក់កណ្ដាលផ្ដាច់ព្រ័ត្រ ហើយក៏នឹងធ្វើឱ្យមានការភ្ញាក់ផ្អើលផងដែរប្រសិនបើការប្រកួតជាមួយវៀតណាមនៅល្ងាចស្អែកនេះទទួលបានលទ្ធផលល្អបន្ថែមទៀតនោះ ។ ការប្រកួតនៅវេលាល្ងាចស្អែកនេះ នឹងធ្វើឱ្យអ្នកគាំទ្រក្រុមកម្ពុជាក្ដុកក្ដួលក្នុងចិត្តមិនតិចឡើយ ដោយសារតែពួកគេមិនចង់ឱ្យការប្រកួត AFF Smart U16 Championship 2016 មិនមានវត្តមានក្រុមកម្ពុជាក្នុងវគ្គផ្ដាច់ព្រ័ត្រនោះឡើយ បើទោះជាត្រូវប៉ះជាមួយក្រុមខ្លាំងនៅក្នុងតំបន់ក្ដី។
យ៉ាងណាក៏ដោយ គេមើលឃើញថា ឱកាសឈានឡើងរបស់ក្រុមម្ចាស់ផ្ទះ នឹងស្ថិតក្នុងភាពប្រទាញប្រទង់ខ្លាំងណាស់ ដោយសារតែក្រុមវៀតណាម មិនមែនជាក្រុមអន់ឡើយនៅក្នុងព្រឹត្តិការណ៍នេះ ។ ការប្រកួតកន្លងមក មានតែវៀតណាម និងថៃទេ ដែលត្រូវគេមើលឃើញមានឱកាសកាន់ពានច្រើនជាងគេ ហើយកម្ពុជាក៏ទំនងនឹងត្រូវប្រឈមខ្ពស់ផងដែរ សម្រាប់ការប្រកួតដែលនឹងធ្វើឡើងនៅថ្ងៃស្អែកនេះ ។ កម្ពុជាបានសាងប្រវត្តិឈានឡើងវគ្គ៤ក្រុមចុងក្រោយ ហើយក៏ចង់បន្តឈានឡើងវគ្គផ្ដាច់ព្រ័ត្រជាប្រវត្តិសាស្ត្រផងដែរ ដើម្បីបំបែកកំណត់ត្រាអតីតកាលដែលមិនធ្លាប់មានសំណាងទាល់តែសោះនោះ ។ អ្នកគាំទ្រកម្ពុជាត្រូវការឈ្នះការប្រកួតសម្រាប់ល្ងាចស្អែកនេះខ្លាំងណាស់ ប៉ុន្តែអ្នកជឿថា ចាញ់ក៏មានចំនួនច្រើនដែរ ដោយសារតែវៀតណាម មិនមែនជាក្រុមដែលកម្ពុជាប្រដូចបានទាំងផ្នែកបច្ចេកទេស និងកម្លាំងរត់។ មានការប៉ាន់ស្មានថា ក្រុមកម្ពុជានឹងត្រូវក្រុមវៀតណាមស៊ីមិនតិចជាង៣គ្រាប់នោះទេ ប៉ុន្តែក៏មានអ្នកបន់ស្រន់ឱ្យការទស្សន៍ទាយនោះ កុំឱ្យកើតមានឡើងផងដែរ ដោយសារតែក្រុមកម្ពុជាមិនចង់បាក់មុខ និងមិនចង់យកត្រឹមលេខ៣ ឬលេខ៤ ក្នុងនាមជាម្ចាស់ផ្ទះ ។ ការប្រកួតនេះ នឹងធ្វើឱ្យមានការតាមដានខ្លាំងក្លា បើទោះជាក្រុមកម្ពុជាអាចគេចផុតពីការរិះគន់នៅពេលបរាជ័យក្រោមថ្វីជើងរបស់ក្រុមវៀតណាមក្ដី ។
នៅក្នុងពូល A វៀតណាមបានឈរលេខ១ និងមិនធ្លាប់ប្រកួតចាញ់ទាល់តែសោះ ដោយធ្លាប់ស្មើជាមួយហ្វីលីពីនតែម្ដងគត់ ហើយបើក្រឡេកទៅមើលការប្រកួតរបស់ពួកគេក៏មិនធម្មតាដែរ។ ប៉ុន្តែគេជឿជាក់ថា បើកីឡាករកម្ពុជាមានទម្រង់លេងល្អ នោះក្រុមវៀតណាមនឹងមិនអាចឈ្នះគ្រាប់បាល់ក្នុងរយៈពេល៩០នាទី និងបញ្ចប់ម៉ោងបន្ថែមបានទេ ដែលពិតជានឹងធ្វើឱ្យការឈ្នះចាញ់ត្រូវកាត់ក្ដីដោយគ្រាប់បាល់ប៉េណាល់ទីមិនខាន ។
ទោះបីយ៉ាងណា ប្រសិនបើឈានដល់ការស៊ុតបាល់បញ្ចូលទី គេមើលមិនឃើញក្រឡាវៀតណាមចាញ់ម្ចាស់ផ្ទះកើតទេ ដោយសារតែកីឡាករវៀតណាមភាគច្រើន គឺមានថ្វីជើងល្អជាងកីឡាករកម្ពុជា ។ ឱកាសឈ្នះវៀតណាមសម្រាប់វគ្គនេះ គឺមានតែសំណាងហុចឱ្យដូចគេថា បាល់មូលប៉ុណ្ណោះ អីុចឹងហើយទើបអ្នកគាំទ្រហាក់បុកពោះខ្លាំងនៅពេលគិតដល់ការប្រកួតដែលនឹងកើតឡើងនៅវេលាល្ងាចនេះ។ ម្នាក់ៗមិនហ៊ានរំពឹងច្រើនទេថាឈ្នះ ប៉ុន្តែបើឈ្នះវៀតណាមហើយបានឈានឡើងទៅកាន់វគ្គផ្ដាច់ព្រ័ត្រ គឺពិតជាធ្វើឱ្យកក្រើកនៅក្នុងស្រទាប់មហាជនកម្ពុជា ។ ម្នាក់ៗបានបន់ស្រន់កុំឱ្យកម្ពុជាស្ថិតក្នុងលំដាប់លេខ៤ ក្រោយការបញ្ចប់ពាន ដោយសារតែការឈានឡើងវគ្គ៤ក្រុមចុងក្រោយ គឺជាលើកទី១ របស់កម្ពុជាដែលគួរតែមានសំណាងជាងនេះ នៅក្រោយការប្រកួតត្រូវបញ្ចប់ ។
កម្មវិធីប្រកួតនៅល្ងាចថ្ងៃទី២១ កក្កដា ស្អែកនេះ មានការផ្លាស់ប្ដូរម៉ោងប្រកួត ដោយក្រុមថៃត្រូវប៉ះក្រុមអូស្ត្រាលីនៅវេលាម៉ោង៣និង៣០នាទីរសៀល ក្នុងពេលដែលក្រុមម្ចាស់ផ្ទះកម្ពុជា នឹងប៉ះក្រុមវៀតណាមនៅវេលាម៉ោង៦និង៣០នាទីល្ងាច ។ ការប្រកួតរបស់២ក្រុមនេះត្រូវគេរំពឹងថា នឹងមានអ្នកទស្សនាកកក្ដាំងបើទោះនេះមិនមែនជាការប្រកួតរបស់ក្រុមជម្រើសជាតិឈុតធំ ។ នោះគឺដោយសារតែនេះជាការប្រកួតដណ្ដើមឱកាសឡើងទៅកាន់វគ្គផ្ដាច់ព្រ័ត្រដើម្បីកាន់ពាន ។ បើឱ្យមហាជនទស្សន៍ទាយ គឺក្រុមថៃនឹងឈ្នះក្រុមអូស្ត្រាលី ហើយក្រុមវៀតណាម នឹងឈ្នះក្រុមកម្ពុជាដូចគ្នា ។ អ្នកស្នេហាវិស័យបាល់ទាត់បានត្រឹមតែរំពឹងថា ក្រុមកម្ពុជាអាចឈ្នះក្រុមអូស្ត្រាលី ហើយឈរលេខ៣ប៉ុណ្ណោះ ប៉ុន្តែអ្នកព្យាករណ៍ដដែលនេះសុទ្ធតែបានបន់ស្រន់សុំឱ្យប្រវត្តិសាស្ត្រកែប្រែដោយកុំឱ្យក្រុមវៀតណាមទាត់ឈ្នះក្រុមកម្ពុជាវិញម្ដង សម្រាប់ការប្រកួតល្ងាចស្អែកនេះ ៕
ចែករំលែកព័តមាននេះ