រាជធានីភ្នំពេញ ៖ រិន សារដ្ឋ មកពីក្លិបខេត្តព្រៃវែង ត្រូវគេរៀបចំឱ្យជួបប្រកួតជាមួយកីឡាករថៃឈ្មោះ Chhat Vatcharak ក្នុងប្រភេទទម្ងន់៦៥គីឡូក្រាម រីឯ សែន រ៉ាដេត មកពីក្លិបអប្សរាគុនខ្មែរ ប្រកួតជាមួយកីឡាករថៃឈ្មោះ
រាជធានីភ្នំពេញ ៖ រិន សារដ្ឋ មកពីក្លិបខេត្តព្រៃវែង ត្រូវគេរៀបចំឱ្យជួបប្រកួតជាមួយកីឡាករថៃឈ្មោះ Chhat Vatcharak ក្នុងប្រភេទទម្ងន់៦៥គីឡូក្រាម រីឯ សែន រ៉ាដេត មកពីក្លិបអប្សរាគុនខ្មែរ ប្រកួតជាមួយកីឡាករថៃឈ្មោះ TOTO Moeung Phonthong ក្នុងប្រភេទទម្ងន់៥១គីឡូក្រាម នៅថ្ងៃសៅរ៍ ទី២៣ កក្កដា ខាងមុខនេះ ដោយមានការរំពឹងទុកថា នឹងធ្វើឱ្យកក្រើកសង្វៀនទូរទស្សន៍ CTN ទៀតហើយ ។
អ្នកប្រដាល់ជើងខ្លាំងថៃទាំង២រូបនេះមិនធ្លាប់មកប្រកួតនៅស្រុកខ្មែរទេ ប៉ុន្តែបើនិយាយពីបទពិសោធន៍ប្រកួតនៅលើសង្វៀនវិញ គឺមានច្រើនដាច់ឆ្ងាយពីកីឡាករកម្ពុជា ។ រិន សារដ្ឋ ធ្លាប់ប្រកួតបានត្រឹមតែ១៤ដងប៉ុណ្ណោះ ក្នុងនោះឈ្នះ១១ដង ចាញ់៣ដង និងធ្លាប់ផ្តួលគូប្រកួតឱ្យសន្លប់បាន៦ដង ខណៈកីឡាករថៃដែលជាដៃគូរបស់គេធ្លាប់ប្រកួតបានដល់ទៅ៥០ដង ឈ្នះ៤០ដង ចាញ់៨ដង ស្មើ២ដង និងធ្លាប់ផ្តួលគូប្រកួតឱ្យសន្លប់បាន៥ដង ។ ដូច្នេះបើយោងលើប្រវត្តិប្រកួត កីឡាករកម្ពុជាហាក់ចាញ់ប្រៀបដាច់ឆ្ងាយ ប៉ុន្តែបើមើលលើមាឌនិងកម្ពស់ព្រមទាំងវិជ្ជាគុនវិញនោះ គឺប្រដំប្រសងគ្នា ។ ចាំមើលគូនេះតើកីឡាករកម្ពុជាឬកីឡាករថៃជាអធិរាជនៅលើសង្វៀន ?
ចំណែក សែន រ៉ាដេត និងកីឡាករថៃ TOTO Moeung Phonthong វិញនោះ ក៏មានប្រវត្តិប្រកួតខុសគ្នាមិនតិចដែរ ។ សែន រ៉ាដេត ធ្លាប់ប្រកួតបានត្រឹមតែ៤១ដងប៉ុណ្ណោះ ក្នុងនោះឈ្នះ៣៨ដង ចាញ់៣ដង និងធ្លាប់ផ្តួលគូប្រកួតឱ្យសន្លប់នៅលើសង្វៀនបាន១៣ដង ។ រីឯកីឡាករថៃធ្លាប់ប្រកួតបានរហូតដល់ទៅ៨០ដង ឈ្នះ៦០ដង ចាញ់១៧ដង ស្មើ៣ដង និងធ្លាប់ផ្តួលគូប្រកួតឱ្យសន្លប់បាន៨ដង ។ គូនេះទោះបី សែន រ៉ាដេត មានប្រវត្តិប្រកួតតិចជាងក្តី ក៏អ្នកគាំទ្រនៅតែមានជំនឿចិត្តលើល្បិចប្រយុទ្ធរបស់គេដែរ ដោយសារកីឡាករកម្ពុជារូបនេះមានសមត្ថភាពមិនធម្មតា ទាំងផ្លែកែង និងជង្គង់អាចប្រើការបានយា៉ងស្ទាត់ជំនាញដូចគ្នា ។
ចំណែកគូប្រកួតមិត្តភាពរវាងកីឡាករកម្ពុជា និងកម្ពុជាវិញនោះមាន កីឡាករឌុម កែវដា មកពីក្លិបមកុដរាជសីហ៍ ប្រកួតជាមួយកីឡាករ វ៉ាន់ ចាន់វ៉េត មកពីក្លិបគីសែមានរិទ្ធ។ កីឡាករ ផាត សូដា មកពីក្លិបអេភូថងកីឡា ប្រកួតជាមួយ កីឡាករ ភួង ពិសិដ្ឋ មកពីក្លិបតាឡីដំរីមានរិទ្ធ និងកីឡាករ ពុយ វណ្ណៈ មកពីក្លិបឃ្លាំងមឿងកីឡា ប្រកួតជាមួយកីឡាករ សំណាង វីរៈ មកពីក្លិបដួងសែនសុខ ៕
ចែករំលែកព័តមាននេះ