តាមប្រភពពី odditycentral.com បានឲ្យដឹងថា អ្នកវិទ្យាសាស្ត្របានគូររូបភ្នែកនៅគូទគោខាងក្រោយ ដើម្បីការពារពីការវាយប្រហាររបស់សត្វខ្លា ក៏ដូចជាការពារកុំឲ្យមានការបាញ់បោះទៅលើសត្វខ្លាផងដែរ (ព្រោះជាធម្មតានៅពេលមានសត្វខ្លាមកចាប់គោស៊ី អ្នកភូមិតែងតែបាញ់សម្លាប់សត្វខ្លានោះ) ។
វាស្តាប់ទៅហាក់បីដូចជាយើងចង់ការពារសត្វគោ កុំឱ្យត្រូវខ្លាស៊ី តែតាមការពិត យើងចង់ការពារជីវិតសត្វខ្លា ជិតផុតពូជ ដែលជានិច្ចជាកាល ត្រូវបានបាញ់សម្លាប់ដោយសារប្រជាកសិករ និងអ្នកភូមិពេលចូលមកស៊ីគោ ។ សត្វខ្លាមួយចំនួន កំពុងតែស្ថិតក្នុងតារាងសត្វព្រៃដែលជិតផុតពូជ ដោយមានចំនួនត្រឹមតែពី២៣០០០ ទៅ៣៩០០០ក្បាល តែប៉ុណ្ណោះ ហើយចំនួននេះ កំពុងតែមានការថយចុះយ៉ាងលឿន គួរឲ្យកត់សម្គាល់ ។
លោកដុកទ័រ Neil Jordan ដែលជាអ្នកជំនាញជីវវិទ្យានៅមជ្ឈមណ្ឌល UNSW បាននិយាយថា «ដោយសារតែតំបន់អភិរក្ស និងការពារសត្វព្រៃត្រូវបានរួមតូច ទើបយើងឃើញមានសត្វខ្លា និងតោមួយចំនួន បានចូលមកតំបន់ប្រជាជនរស់នៅ» ។ នៅពេលដែលសត្វទាំងនោះ ធ្វើការវាយប្រហារទៅសត្វពាហនៈចិញ្ចឹមរបស់ប្រជាជន អ្នកភូមិតែងតែយកកាំភ្លើងបាញ់សម្លាប់ពួកវា ។
ដើម្បីជួយដោះស្រាយបញ្ហាមួយនេះ លោកដុកទ័របានរកឃើញគំនិតថ្មីមួយ ដែលចំណាយលុយអស់តិច ហើយអាចការពារកុំឲ្យមានការវាយប្រហារទៅលើសត្វគោ និងការបាញ់សម្លាប់ទៅលើសត្វខ្លា និងតោ ។ លោកបានគូររូបភ្នែកមួយគូនៅពីក្រោយគូទគោ ដោយគាត់គិតថា វាអាចធ្វើឱ្យសត្វខ្លាគិតថា គោកំពុងតែមើលវា ។ អ្នកវិទ្យាសាស្ត្របានដឹងថា ការដែលត្រូវបានឃើញដោយគោលដៅប្រហារ ធ្វើឲ្យអ្នកដែលចង់ប្រហារនោះ មិនហ៊ានចាត់ការភ្លាមៗនោះទេ ។
ការគូររូបភ្នែកនៅពីក្រោយគូទសត្វគោនេះ ត្រូវបានគេហៅថា «iCow» ។ គេបានគូររូបភ្នែកទៅលើសត្វគោចំនួន២០ក្បាល ក្នុងចំនោមគោ៦២ក្បាល ហើយគេបានរាប់ចំនួនគោទាំងអស់ជារៀងរាល់យប់ មុនពេលឱ្យចូលក្រោល ។ រយៈពេល១០អាទិត្យក្រោយមក លទ្ធផលបានបង្ហាញថា សត្វគោដែលមិនមានរូបភ្នែកនៅពីក្រោយ ត្រូវបានខ្លាស៊ីអស់៣ក្បាល និងមិនមានសត្វគោដែលមានរូបភ្នែក មិនត្រូវបានខ្លាស៊ីឡើយ ។ ក៏ប៉ុន្តែ ការពិសោធន៍នេះ ហាក់បីដូចជាមិនគ្រប់គ្រាន់អាចបញ្ជាក់ថា iCow ពិតជាមានប្រសិទ្ធភាពនៅឡើយទេ ព្រោះថា ទំហំនៃការសិក្សាដូចជាមានទំហំតូច ។
ចែករំលែកព័តមាននេះ