មេជាងស្លា.ប់ កូនជាងសន្លប់ ដោយសារខ្សែភ្លើងឆក់
ខេត្តឧត្តរមានជ័យ ៖ ជាងជួសជុលម៉ូតូម្នាក់បានស្លា.ប់ភ្លាមៗនៅនឹងកន្លែងកើតហេតុ និងកូនជាងម្នាក់ទៀតបាន រងរបួសធ្ងន់រហូតសន្លប់ ខណៈទាំង២នាក់បានរុញទូដែកច្នៃគាបខ្សែភ្លើងលើពិដានផ្ទះ
ខេត្តឧត្តរមានជ័យ ៖ ជាងជួសជុលម៉ូតូម្នាក់បានស្លាប់ភ្លាមៗនៅនឹងកន្លែងកើតហេតុ និងកូនជាងម្នាក់ទៀតបាន រងរបួសធ្ងន់រហូតសន្លប់ ខណៈទាំង២នាក់បានរុញទូដែកច្នៃគាបខ្សែភ្លើងលើពិដានផ្ទះបណ្ដាលឲ្យឆក់ទាំង២នាក់តែម្តង ។ ហេតុការណ៍នេះបានកើតឡើងនៅវេលាម៉ោង៧ និង៣០នាទីយប់ នាថ្ងៃទី១៨ ខែកក្កដា ឆ្នាំ២០១៦ នៅភូមិសំរោង សង្កាត់សំរោង ក្រុងសំរោង ខេត្តឧត្តរមានជ័យ ។
ជនរងគ្រោះដែលស្លាប់បាត់បង់ជីវិតឈ្មោះ គុណ ហេង ភេទប្រុស អាយុ១៧ឆ្នាំ មុខរបរជាងជួសជុលម៉ូតូ ស្នាក់នៅបណ្តោះអាសន្នក្នុងភូមិកើតហេតុខាងលើ មានស្រុកកំណើតនៅភូមិរកាកោង ឃុំមហាលាភ ស្រុកកោះសូទិន ខេត្តកំពង់ចាម ។ ចំណែកកូនជាងឈ្មោះ តូ រ៉ូ ភេទប្រុស អាយុ១៧ឆ្នាំ មុខរបរបិទស្កុតម៉ូតូ ស្នាក់នៅបណ្តោះអាសន្នក្នុងភូមិកើតហេតុខាងលើ មានស្រុកកំណើតជាមួយគ្នា បានរងរបួសធ្ងន់ បច្ចុប្បន្នកំពុងសម្រាកព្យាបាលនៅមន្ទីរពេទ្យបង្អែកខេត្តឧត្តរមានជ័យ ។
តាមការរៀបរាប់ពីជនរងគ្រោះឈ្មោះ តូ រ៉ូ បានឲ្យដឹងថា រូបគេនិងមេជាងបានរុញទូដែកសម្រាប់ដាក់មួកសុវត្ថិភាពនៅមុខរោងជាងចូលក្នុងផ្ទះដើម្បីបិទទ្វារ តែនៅពេលកំពុងរុញទូរដែកចូលដល់ក្នុងផ្ទះ ស្រាប់តែឃើញផ្កាភ្លើង ភ្លាមៗនោះចរន្តអគ្គិសនីបានឆក់មេជាងស្លាប់ ហើយខ្លួនក៏ត្រូវឆក់រហូតសន្លប់ដែរ ។
ក្រោយពីធ្វើកោសល្យវិច្ច័យរួច សមត្ថកិច្ចបានប្រគល់សាកសពជនរងគ្រោះទៅសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ